«ەلىمايدىڭ» ەكپىنى كۇشتى

باستاۋىن وتكەن عاسىردىڭ ونىن­شى جىلدارىنان الاتىن, «يارىش» ساپىندا تەڭبىل دوپ تەپ­كەن مۇحتار اۋەزوۆكە بارىپ تاريح­تىڭ ءبىر ۇشى تىرەلەتىن الاش فۋتبولىنىڭ وتانىنا بالانعان سەمەي فۋتبولىنىڭ جاعدايى 2022 جىلعا دەيىن ون-ون بەس جىلدىڭ مۇعدارىندا السىرەپ كەتكەنى راس. بىلتىر ءوز الاڭىندا بىردە-ءبىر جەڭىلىس تىركەمەي, جانكۇيەرلەرىن ءتانتى ەتكەن «ەلىمايدىڭ» ەكپىنى قاتتى ەكەنى راس. سودان كەيىن دە «اقتوبە» مەن «ەلىماي» اراسىنداعى ويىن فۋتبول اۋەسقويلارىنان بولەك مامانداردىڭ ەرەكشە ماڭىز بەرەتىن ماتچتارىنىڭ ءبىرى بولدى.

ءۇش مارتە قازاقستان چەمپيونى, ەل كۋبوگىنىڭ يەگەرلەرى ويىن باستالا سالا قوناقتاردىڭ قاقپاسىن تورۋىلداپ ابدەن ساستىردى. العاشقى مينۋتتاردا-اق دۇر­كىن-دۇركىن شابۋىلداي ءتۇستى. «اقتوبە» قورعاۋشىلارى اراسىنان سۋىرىلىپ شىققان نديپ تامبتىڭ سوققان گولى تورەشى شەشىمىمەن ەسەپكە الىنبادى. ويتكەنى ويىننان تىس قالعان. ەسەپ اشۋدى كوزدەگەن اقتوبەلىكتەر دەگەنىنە جەتىپ, 25-مينۋتتا ايىپ الاڭىنىڭ سىرتىنان ايلاسىن اسىرعان جايرو جان جانكۇيەرلەرىن قۋانتىپ كومانداسىن العا سۇيرەدى. ءبىرىنشى تايمنىڭ قالعان جيىرما مينۋتىندا جاندارمەن شابۋىلداعان «ەلىماي» تورەشى قوسقان ەكىنشى مينۋتتا ەسەپتى تەڭەستىردى. سەمەيدەگى «سپارتاك» ستاديونىنداعى توعىز مىڭ كورەرمەننىڭ كوزايىمىنا اينالعان بەلورۋسسيالىق جارتىلاي قورعاۋشى نيكيتا كورزۋن.

وسىلايشا, ماتچتىڭ ءبىرىنشى تايمى تەڭ اياقتالسا, ويىننىڭ ەكىنشى جارتىسى تىپتەن تارتىسقا تولى بولدى. قوس كوماندا دا دوپ وتكىزىپ الماۋدىڭ قامىن جاساپ باقسا دا, جارتىلاي قورعاۋشى ماكسيم سامورودوۆ 78-مينۋتتا «اقتوبەنىڭ» مەيماناسىن تاسىتتى. بۇگىنگى كۇنگە دەيىن ءوز الاڭىندا ەش جەڭىلمەي جۇرگەن «ەلىماي» ويىننىڭ سوڭىنا قاراي تىپتەن ەكىلەنە شابۋىلداۋعا كوشتى. ەڭبەگى ەش كەتپەگەن برازياليالىق لەگيونەر 86-مينۋتتا باس­پەن گول سوعىپ, ەسەپتى تەڭەستىردى.

ون ءبىرىنشى تۋر ويىندارىنىڭ ناتي­جەسىنە وراي ەل ءۇمىتىن اقتاۋعا بارىن سالىپ كەلە جاتقان «ەلىماي» تۋرنير كەستەسىندە 17 ۇپايمەن ءتورتىنشى ورىنعا تابان تىرەدى. ال قازاقستان سۋپەركۋبوگىنىڭ ءۇش دۇركىن يەگەرلەرى «اقتوبە» بولسا 19 ۇپايمەن كوش باستاپ كەلەدى.

P.S. جالپى العاندا وتكەن اپتا سەمەي فۋتبول جانكۇيەرلەرى ءۇشىن وتە ءساتتى اياقتالدى. اپتا سوڭىندا «سەمەي» فۋتبولزال كلۋبى الماتىلىق «قاي­راتتى» جەڭىپ, قازاقستان چەمپيونى اتاندى. قاتارىنان جيىرما مارتە چەم­پيوندىق اتاقپەن قانجىعاسىن مايلاعان «قايرات» سەمەيدىڭ فۋتزال كلۋبىنا ەسە جىبەرىپ, 2023/24 ماۋسىمنىڭ ەكىنشى ورىنىن مىسە تۇتتى.

اباي وبلىسى