شالعايداعى شەبەر

ءيا, شىن ونەردە شارت تا جوق, شەكارا دا جوق. ونەر اتاۋ­لىعا ەرەجە, زاڭدىلىق سىن­دى قاساڭ دۇنيەلەر ەنەر بولسا, شى­عارماشىلىق شىنايىلىعىنان, بولمىسىنان ايىرىلارى حاق. كوركەمدىك كەڭىستىگىنىڭ شەت-شەگىنە كوزىڭ جەتپەيدى, تەرەڭىنە ويىڭ بويلامايدى. تىلسىم قىل­قالامنىڭ سىرىن تەك سەزگەن بىلەدى, سىرلى بوياۋدىڭ ءتىلىن تەك ۇققان تۇسىنەدى.

سۋرەتشى تىلەك ءحاليننىڭ شى­عارماشىلىق ەركىندىگى – دالا. قىلقالامىنىڭ تىنىسى سول دالانىڭ قۇشاعىندا, تابيعاتتىڭ اياسىندا اشىلادى. بودەنە اۋى­لىندا تۇراتىن سۋرەتشى ءومىر بويى مەكتەپتە بەينەلەۋ جانە سىزۋ پانىنەن ساباق بەردى. ولەڭ دە جازادى. بەس كىتابى جارىق كورىپتى. كەز كەلگەن سۋرەتشىنىڭ العاشقى ارمانى – جەكە شەبەرحانا بولسا كەرەك. تىلەك حالين دە ۇنەمى ۇيىندە جۇمىس ىستەيتىن. 2017 جىلى الاقانداي اۋىلىنان ءتۇرلى جانرداعى تۋىندىلارى قويىلعان ءوز گالەرەياسىن اشتى. سول اۋىلدىڭ ىرگەسىن, سول اسپان, سول مەكەن, سول ادامدار, سول دالانى بەينەلەگەن اۆتور بار شىعارماشىلىعىن تۋعان توپىراعىندا پاش ەتىپ جات­قانىنىڭ ءوزى كوڭىل تەبىرەنتەدى. ءوزى دە ءبىر سۇحباتىندا تالانتتىڭ قاينار بۇلاق كوزى تابيعاتتان باس­تاۋ الاتىنىن ايتادى.

«شىنى كەرەك, كوپ ادام اۋىل­دىڭ مادەنيەتىن قالاعا قارا­عاندا تومەندەۋ سانايدى. اۋىل­دى دامىماعان, وركەنيەتتەن تىس قالعان «ارال» كورەدى. شىن مانىندە, رۋحاني كۇشتىڭ ءبارى اۋىلدا جاتىر. « ۇلى دالا» دەگەن تىركەس تەگىننەن ايتىلعان ءسوز ەمەس. اۋىل – رۋحانياتتىڭ وزەگى. بىراق ۇلى دالانىڭ وسىناۋ رۋحىن كەز كەلگەن ادام سەزىنە بەرمەيدى. سۋرەت الەمىنىڭ وزىندە بىرنەشە ءتۇس قولدانىلىپ, بىرنەشە جانر­­دى بىرىكتىرگەن كارتينالار بەينەلەنىپ جاتادى عوي. سول سياقتى ءومىر سىزىلىپ قويعان سحەماعا سىيماۋى كەرەك. سونىڭ ىشىندە سۋرەتشىلەر تابيعاتتان, ۇلى دالادان جىلۋلىق, شابىت الۋ ارقىلى, ءوزىن دامىتادى دەپ ويلايمىن», دەيدى تىلەك حالين.

ءيا, بۇل شەبەرحانا بۇگىندە بودەنەگە جولى تۇسكەندەردىڭ ما­دەني ايالداماسىنا اينالىپ وتىر. 

جەتپىستەن اسسا دا شەبەر­حاناسىنان شىقپايتىن سۋرەت­شىنىڭ جەكە قورىندا 100-دەن استام كارتينا بار. اۆتور تۋىندىلارى تۇركيا, يتاليا, گەر­مانيا سەكىلدى شەتەلدەرگە تانىمال. ال ءوزى كەزىندە ماس­كەۋدە وتكەن بۇكىلوداقتىق شى­عار­ماشىلىق كونكۋرستىڭ لاۋرەاتى اتانعان.

تابيعاتتىڭ ءتۇرلى تىلسىم كۇيىن بەينەلەگەن اۆتور كە­نەپتە تا­ريحي تاقىرىپقا دا جول سالدى. ماحامبەت باتىر, ايشا بيبىگە ارنالعان شى­عارمالارىنان ەرەك­­شە ءبىر ۇلتتىق سارىن ەسىپ تۇرادى. قا­­زاق­تىڭ دارقان دالا­سى­نىڭ عالامات كۇشى ءار بوياۋدىڭ تۇسى­مەن ۇندەسە كەلىپ, رۋحتانا تۇ­سەتىندەي.

وسى قاتارداعى «حان قىزىنىڭ سەرۋەنى» دەپ اتالاتىن تۋىندىسى سارايشىق جەرىندەگى مۋ­زەيدە ساقتالعان. اۋىل سۋ­رەت­شىسىنىڭ تاريحي تاقىرىپتاعى بى­ر­­نەشە كارتيناسى بۇگىندە الەم­­­نىڭ ءار تۇكپىرىندە ءىلىنىپ تۇر. ما­سەلەن, ونىڭ ىشىندە «ابى­لايحان تۋرالى اڭىز» اتتى الىپ كار­تيناسى دا بار.

شىعارماشىل ادامنىڭ تۋعان جەرىن, تۋعان حالقىن, تۋعان توپىراعى دارىتقان ونەرىن قۇلاي ءسۇيۋى قىلقالامىنا اسەر ەتپەي قويماسى انىق. بۇل ءسوزىمىزدىڭ ءدال مىسالى – تىلەك ءحاليننىڭ تۇتاس گالەرەياسى. ۇلتىنا دا, ونە­رىنە دە ادال سۋرەتشى تالانتى ارقىلى قازاقتىڭ اتىن شى­عار­عىسى كەلەدى. كەنەپتە دە ءوز اينالاسىن, ءوز قوعامىن, ءوز اۋىلىن, ءوز تابيعاتىن, ءوز بولمىسىن, ءوز تاريحىن سۋرەتتەدى. اتاعى اسپانعا ۇشقان اڭىز-تۇل­عالارعا ەلىكتەگەن جوق, ءتۇرلى جاڭا مودەرنيستىك باعىتتارعا بۇ­رىلعان جوق. ءوز قولتاڭباسىن ءوز بويىنان, ءوز اينالاسىنان تاۋىپ, شەبەرلىگىن شىڭداي ءتۇستى. تابيعاتتان, دالا ۇنىنەن قۋات الدى. سۋرەتشىنىڭ وسى كۇنگە دەيىن تۋعان توپىراعىنان كىندىك ۇزبەي وتىرعانى سودان بولار, ءسىرا.