كوكشەتاۋ. 26 ءساۋىر. كوكشەتاۋداعى №6 سايلاۋ ۋچاسكەسىنە داۋىس بەرۋشىلەر تاڭعى ساعات 6.30-دان باستاپ كەلدى. العاش بولىپ جينالعان 40 شاقتى سايلاۋشىنىڭ اراسىندا جاستاردىڭ قاتارى قالىڭ. بۇل تۋرالى egemen.kz حابارلادى.
اتالعان ۋچاسكە ورنالاسقان قالاداعى №1 مەكتەپتىڭ ەسىگى ساعات تۋرا 7:00-دە اشىلدى. داستۇرگە سايكەس مەملەكەتتىك گيمن شىرقالدى. مۇندا داۋىس بەرۋشىلەرگە كوميسسيانىڭ بەس مۇشەسى الفاۆيتتىك تارتىپپەن قىزمەت كورسەتەدى. كوگىلدىر شىمىلدىقتى بەس كابينا جابدىقتالعان.
ۋچاسكەلىك سايلاۋ كوميسسياسىنىڭ ءتورايىمى يرينا گولوۆچەنكو ءوز ارىپتەستەرىمەن جانە «سايلاۋدىڭ بارىسىنا باقىلاۋ جاساۋ جونىندەگى قازاقستان رەسپۋبليكاسى قوعامدىق كوميسسياسىنىڭ مۇشەسى» ۆيكتور گەيدىڭ قاتىسۋىمەن داۋىس بەرۋ بيۋللەتەندەرى سالىنعان سەيفتى اشىپ, داۋىس بەرۋ جاشىگىن مورمەن بەكىتتى. مۇنىڭ بارلىعى كوميسسيانىڭ №1 قاۋلىسىندا كورىنىس تاۋىپ, ءىلىنىپ قويىلدى.
ءتورايىمنىڭ ايتۋىنشا, داۋىس بەرۋگە 2 635 ادام تىركەلگەن. سونىڭ ىشىندەگى 40 كىسىگە جول جۇرۋىنە بايلانىستى وزگە وڭىرلەردە داۋىس بەرۋگە رۇقسات بەرىلىپتى. سايلاۋشىلاردىڭ 12-ءسى ماڭىزدى ناۋقانعا تۇڭعىش رەت قاتىسادى ەكەن. سونداي-اق, 31 كىسى جىلجىمالى داۋىس بەرۋ جاشىگىنىڭ قىزمەتىن پايدالانادى.
كوكشەتاۋ قالاسىنىڭ تۇرعىنى, ستۋدەنت حايرات ايدىن ءبىرىنشى بولىپ داۋىس بەردى. جۇرتشىلىق وعان قوشەمەتپەن قول سوقسا, ۋچاسكە تاراپىنان ارنايى سىيلىق تاپسىرىلدى. ال ا.مىرزاحمەتوۆ اتىنداعى ۋنيۆەرسيتەتتىڭ 3-كۋرس ستۋدەنتى كەڭەس ءمولدىر اتا-اناسىمەن بىرگە كەلىپ داۋىس بەردى.
وسى ۋچاسكەدە داۋىس بەرگەن اقمولا وبلىسىنىڭ اكىمى سەرگەي كۋلاگين جۇرتشىلىقتى ەل تاعدىرىنداعى ماڭىزدى وقيعامەن قۇتتىقتادى.
سايلاۋ بارىسىن بايقاۋعا قاتىسىپ وتىرعان «نۇر وتان» پارتياسىنىڭ وكىلى بورانباي بەگالين مەن ابىلعازى قۇسايىنوۆتىڭ وكىلى سەرىك ەسماعامبەتوۆتى سوزگە تارتقانىمىزدا, ايتۋلى شارانىڭ جوعارى دەڭگەيدە ۇيىمداستىرىلعانىن, داۋىس بەرۋدىڭ بەلسەندىلىكپەن ءارى زاڭدىلىققا ساي وتكىزىلىپ جاتقانىن ايتتى.
باقبەرگەن امالبەك.
دەرەك: egemen.kz.
سۋرەت: تولەگەن قوسشىعۇلوۆ.