ناعاشىمنىڭ كەنجە بالاسى اسكەري مىندەتىن ابىرويمەن اتقارىپ, ەلگە ورالعان. بۇرىنعى ءداستۇردى قاتتى ساقتايتىن ناعاشىم وزىمىزگە قاراعان تىلەكتەس, نيەتتەس ەت جاقىن اعايىن-تۋىستى شاقىرىپ, قۇرمالدىق بەردى. الپىس ءۇيلى اۋىلدى تەگىس قامتىعانعا ۇقسايدى. مۇندايدا قوڭسىلاس وتىرعان اعايىندى قالاي تاستاپ كەتەرسىڭ؟ داستارقان باسىندا بيىلعى جاۋىننىڭ جيىلىگى, ءشوپتىڭ شىعىمى تۋرالى كۇندەلىكتى تىرشىلىكتىڭ جاي-جاپسارى اڭگىمە بولدى. ءدام قايىرىپ شىققان سوڭ انىق كوردىك, كەيبىر يەلەرى كوشىپ كەتكەن سوڭ, بوساپ قالعان ۇيلەردىڭ اراسىن قالىڭ ءشوپ باسىپ كەتىپتى. بۇرىن شىلدە تۋماي ايتاقىر بولىپ جاتۋشى ەدى. رابايسىز وسكەن ءشوپ ءبىرتۇرلى كورىنەدى ەكەن.
قوناقتار رازى بولىپ اتتاندى. ولاي بولماعاندا شە؟ ناعاشىمنىڭ قىزدارى مەن كەلىن-كەپشىكتەرى كىسى كۇتىپ ابدەن ۇيرەنىپ قالعان ەكەن. ءبىز دە ۇزەڭگىگە اياعىمىزدى سالماقشى بولىپ ۇمتىلعاندا ناعاشىم «تويتارقاردىڭ ىشىندە بولىڭدار», دەدى. ءبىزدىڭ جاقتا قوناق شاقىرعاننان كەيىن ەلگە قىزمەت ەتكەن كەلىن-كەپشىكتىڭ وڭاشا وتىرىپ شاي ىشەتىن ادەتى بولۋشى ەدى. بۇل جولى ناعاشىم تويتارقارعا الىستان كەلگەن بىرەر كىسىمەن قوسا بالالارىن دا ورتاقتاستىردى.
– سابىر, سەن كىسىنىڭ قولىنا سۋ قۇيعاندا ەپتىلىگىڭ كورىنىپ تۇرادى ەكەن. سۋدى شاشىراتپاي, سۇلگىنىڭ دە تازاسىن, قۇرعاعىن جاڭالاپ بەرىپ تۇردىڭ. ۇلكەندەردەن باتا العان بالا جامان بولمايدى, – دەپ ناعاشىم جەتى-سەگىز جاسار نەمەرەسىنىڭ ماڭدايىنان ءبىر سيپاپ قويدى.
سودان سوڭ قىزمەت قىلعان بارشا اعايىننىڭ بۇگىنگى قوناق كۇتۋ بارىسىندا اتقارعان قىزمەتىن تالداپ, جىكتەپ, كەم-كەتىگىن قاتتى ايتپاسا دا, ءسوز استارىنا سالىپ بايانداپ شىقتى. قۇتتى ءبىر وندىرىستىك جينالىس وتكىزىپ, ۇجىم مۇشەلەرىنىڭ ءىسىن تالداپ وتىرعان ادام ءتارىزدى.
تويتارقاردان كەيىن قاس قارايماي تۇرعاندا بارار جەرىمىزگە جەتىپ قالايىق دەپ ىلە اتتاندىق. جول ۇستىندەگى جولاۋشىعا وي سەرىك. كوپتى كورگەن كوشەلى ادامنىڭ ءتالىم-تاربيەسى ەكەن عوي بۇل. سايىپ كەلگەندە تويتارقار شاي ءىشۋ عانا ەمەس, كادىمگى تاربيە مەكتەبى بولىپ شىقتى. قاشاننان داستارقانى جيىلمايتىن دارقان قازاقتىڭ كىسى كۇتۋ مادەنيەتى, ادەمى ءادىبى, مەيمانعا كورسەتەر ىستىق ىقىلاسى وسىندايدان تۋىندايدى. سان سالالى شارۋا ءبىر ارنادا توعىسقان كەزدە جالپى جۇرتتىڭ باسىن قوساتىن بىرلىكتىڭ قۋاتىن ارتتىرا تۇسەتىندەي. دارقان دالانىڭ دانالىعىن بويىنا جيعان وسى مەنىڭ ناعاشىمداي قازىنالى قارتتار باردا الميساقتان جالعاسىپ كەلە جاتقان ءتالىمدى تاربيەنىڭ ارقاۋ ءجىبى ۇزىلمەيتىن شىعار.
تويتارقاردىڭ تۇپكى ماقساتى وسى ەكەن عوي.
كوكشەتاۋ