پاۆلودار. 26 ءساۋىر. وبلىس ورتالىعىنداعى, №1 مەكتەپتە ورنالاسقان №59 سايلاۋ بولىمشەسىنە بۇگىن تاڭعى 7.00-دەن باستاپ العاشقى سايلاۋشىلار داۋىس بەرە باستادى. بۇل تۋرالى egemen.kz ءتىلشىسى حابارلادى.
ءبىز كەلگەن ساعات 8.30 شاماسىندا سايلاۋشىلاردىڭ بەلسەندىلىگى كورىنىپ تۇردى. بىرىنەن سوڭ ءبىرى نەمەرلەرىن جەتەكتەپ كەلىپ جاتقاندار بار. ءبارى دە كوتەرىڭكى كوڭىل كۇيدە.
وسى ۋچاسكەدە العاشقىلاردىڭ ءبىرى بولىپ داۋىس بەرگەن زەينەتكەر ۆالەنتينا ۆەرشينينانىڭ جاسى 80-دە ەكەن. قارت سايلاۋشى قوبالجىپ, كوڭىلى بوساپ كوزىنە جاس الدى. «وسى جاسقا جەتەمىن, داۋىس بەرەمىن دەپ كىم ويلاپتى» - دەيدى. پاۆلودارعا سوناۋ ءبىر جىلدارى تومسكىدەن وقۋ ءبىتىرىپ جولدامامەن كەلىپتى. ۇزاق جىلدار «ەنەرگو» ورتالىعىندا ەنەرگەتيكا سالاسىندا قىزمەت ەتىپتى. بۇل كۇننىڭ ءوزى ءۇشىن دە, قازاقستاندىقتار ءۇشىن ماڭىزدى كۇن ەكەنىن ايتتى. «ءبىزدىڭ ۇرپاقتارىمىز باقىتتى كۇندە ءومىر ءسۇرسىن. مەن داۋىس بەرىپ دۇرىس تاڭداۋ جاسادىم», - دەدى اجەي.
ال, سايلاۋ ۋچاسكەسىنىڭ توراعاسى نۇربول وماروۆتىڭ ايتۋىنشا, بارلىق قازاقستاندىقتار ءۇشىن ەرەكشە ەستە قالاتىن كۇن ەكەنىن سايلاۋشىلاردىڭ سايلاۋ بولىمشەسى اشىلا سالىسىمەن ەرتە كەلگەن بەلسەندىلىكتەرى, ەل تاعدىرى ءۇشىن بەي-جاي قارمايتىندارى ايقىن اڭعارتادى. ءبىرىنشى كەلگەن جانە 18 جاسقا بيىل تولىپ, ءبىرىنشى رەت داۋىس بەرۋگە قاتىسىپ وتىرعان ازاماتتارعا بەلسەندىلىك تانىتقاندارى ءۇشىن سىيلىقتار بەرىلىپتى. وبلىس ورتالىعىنىڭ جاستارى دا بۇگىن ەرەكشە بەلسەندىلىك كورسەتۋدە. وبلىستىق سايلاۋ كوميسسياسىنىڭ ءتورايىمى ءاليا سابىرحانوۆانىڭ ايتۋىنشا, تاڭەرتەڭ وبلىس ورتالىعىندا ارالاپ شىققان كەزدە 5 سايلاۋ بولىمشەلەرىندە داۋىس بەرۋگە سايلاۋشىلار كوپتەپ كەلىپ جاتتى. اعا ۇرپاق وكىلدەرىمەن قاتار جاستارىمىزدىڭ وزدەرىنىڭ ازاماتتىق كوزقاراستارىن, جاۋاپكەرشىلىكتەرىن كورسەتىپ, بەلسەندىلىك تانىتىپ جاتقاندارى قۋانىشتى. وبلىستا العاشقىلاردىڭ ءبىرى بولىپ, سايلاۋ كۇنى 18 جاسقا تولعان 14 جاس سايلاۋشى داۋىس بەردى. سايلاۋ ۋچاسكەلەرىندە ولاردىڭ ارقايسىسىن قۇتتىقتاپ, ەسكەرتكىش سىيلىقتار تاپسىرىلعان. پاۆلودار وبلىسىندا تاڭعى ساعات 7.00-دە 576 ۋچاسكە اشىلدى, سايلاۋشىلار تىزىمىنە 454 858 ادام ەنگەن.
ءبىزدىڭ كەلەسى كەلگەن №79 سايلاۋ بولىمشەسىندە دە بەلسەندىلىك كورىنىپ تۇر, ادەمى كيىمدەرىن كيىنىپ, قۋانىشتى كوڭىل كۇيدە كەلىپ جاتقان قالا تۇرعىندارىن كوردىك. سايلاۋدىڭ بارىسىن باقىلاپ وتىرعان بايقاۋشىلار ەشقانداي تارتىپسىزدىكتەردىڭ, زاڭ بۇزۋشىلىقتاردىڭ ورىن الماعانىن, ءبارى دە قالىپتى جاعدايدا ءوتىپ جاتقانىن ايتتى.
فاريدا بىقاي.
دەرەك, سۋرەت: egemen.kz