سەنات توراعاسى ماۋلەن اشىمباەۆتىڭ قاتىسۋىمەن «ۇلتتىق مۇددە» ديالوگ الاڭىنىڭ كەزەكتى وتىرىسى ءوتتى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
وتىرىستا سەناتورلار زيالى قاۋىم وكىلدەرىمەن جانە ساراپشىلارمەن بىرگە قازىرگى جاھاندىق سىن-قاتەرلەر كەزەڭىندە جالپىۇلتتىق قۇندىلىقتاردى قالىپتاستىرۋ, جەتىلدىرۋ, دارىپتەۋ باعىتتارىنداعى وزەكتى ماسەلەلەردى تالقىلادى.
قوعامدى جالپىۇلتتىق ماقساتتار مەن ورتاق قۇندىلىقتارعا جۇمىلدىرۋ – ادىلەتتى قازاقستان قۇرۋ جولىنداعى جاسامپاز كۇن ءتارتىبىن ىسكە اسىرۋدىڭ جانە عاسىرلار بويى قالىپتاسقان مەملەكەتتىلىكتى ساقتاۋدىڭ نەگىزگى شارتى. سەنات توراعاسى اتاپ وتكەندەي, قازىرگى ۋاقىتتا جالپىۇلتتىق قۇندىلىقتاردىڭ زاماناۋي الەۋمەتتىك-مادەني نورمالارمەن ۇيلەسىمىن تابۋ الەمنىڭ كوپتەگەن ەلدەرى ءۇشىن ماڭىزدى مىندەت.
«پرەزيدەنتىمىز قاسىم-جومارت كەمەل ۇلى توقاەۆ «ادال ادام – ادال ەڭبەك – ادال تابىس» يدەولوگيالىق تۇجىرىمىندا وسى باعىتتاعى نەگىزگى باعداردى ايقىنداپ بەردى. ولار – تاۋەلسىزدىك جانە وتانشىلدىق, بىرلىك جانە ىنتىماق, ادىلدىك پەن جاۋاپكەرشىلىك, زاڭ مەن ءتارتىپ, ەڭبەكقورلىق پەن كاسىبي بىلىكتىلىك, جاسامپازدىق جانە جاڭاشىلدىق. بۇل قۇندىلىقتار ازاماتتىق جاۋاپكەرشىلىكتى نىعايتىپ, قوعامنىڭ دامۋىنا سەرپىن بەرەتىن ۇلتتىق سيپاتقا يە. سوندىقتان ولاردى دارىپتەۋ – بارشامىز ءۇشىن ماڭىزدى مىندەت», دەدى ماۋلەن اشىمباەۆ.
سونىمەن قاتار پالاتا سپيكەرى كوزدەگەن ماقساتتارعا قول جەتكىزۋ ءۇشىن اتالعان يدەولوگيالىق تۇجىرىمدى وقۋ باعدارلاماسىنا ەنگىزۋ جانە بۇل قۇندىلىقتاردى جاستاردىڭ بويىنا ءسىڭىرۋ جولىندا كرەاتيۆتى يندۋستريانى ءتيىمدى پايدالانۋ ماڭىزدى ەكەنىن ايتتى.
ءىس-شارا بارىسىندا ۇعا اكادەميگى عاريفوللا ەسىم, ل.ن. گۋميلەۆ اتىنداعى ەۇۋ تۇركولوگيا كافەدراسىنىڭ پروفەسسورى امانتاي ءشارىپ, زاڭ عىلىمدارىنىڭ كانديداتى الماس جۇماعالي, «جاستار» عىلىمي-زەرتتەۋ ورتالىعىنىڭ ديرەكتورى ايسۇلۋ ەرنيازوۆا, ءىت-ساراپشى تيمۋر بەكتۇر جانە تاعى باسقا ساراپشىلار ءسوز سويلەپ, كوتەرىلگەن ماسەلەگە قاتىستى پىكىرلەرىن ءبىلدىردى.