قۇرلىقتىق حوككەي ليگاسىنىڭ (قحل) 2024/25 جىلدارداعى ماۋسىمىنىڭ كەستەسى جاريالاندى. تۇراقتى بىرىنشىلىكتى «بارىس» استانادا باستايدى. دەۆيد نەميروۆسكي باپتايتىن كوماندا 4 قىركۇيەكتە «نەفتەحيميكپەن» كەزدەسسە, ودان كەيىن «تراكتور» (6 قىركۇيەك) جانە «امۋرمەن» (9 قىركۇيەك) شەبەرلىك بايقاسادى.
گرەكيانىڭ پاترى قالاسىندا مۋاي-تايدان الەم چەمپيوناتى ءوز مارەسىنە جەتتى. 70 ەلدەن كەلگەن 800-دەن اسا سپورتشىلاردىڭ باسىن قوسقان بايراقتى باسەكەدە ەلىمىزدىڭ ەرلەر قۇراماسى ءۇش جۇلدە جەڭىپ الدى. تارقاتىپ ايتساق, 57 كگ سالماقتا ءشامىل ەرماعامبەتوۆكە تەڭ كەلەر ەشكىم تابىلمادى. فينالدا ول رەسەيلىك سالاۆات يساەۆقا سان سوقتىردى. 63,5 كگ سالماق دارەجەسىندە ءابىل عاليەۆ التىن تۇعىرعا كوتەرىلدى. فينالدىق ايقاستا قازاق سپورتشىسى ۆەتنامدىق نگۋەن دوان لونگتىڭ وسال تۇسىن وڭاي تاپتى. ال الماس سارسەمبەكوۆ كۇمىس مەدالدى يەلەندى. شەشۋشى تۇستا قانداسىمىز رەسەيدىڭ تاعى ءبىر وكىلى ماجيد تەماەۆقا ەسە جىبەردى.
وڭتۇستىك كورەيادا جەڭىل اتلەتيكانىڭ كەيبىر تۇرلەرى بويىنشا ازيا چەمپيوناتى اياقتالدى. بۇل جارىستا بەس جەرلەسىمىز ونەر كورسەتكەنىمەن, ولاردىڭ بىردە-بىرەۋى جۇلدەلى ورىنعا ىلىگە المادى. ەڭ ۇزدىك كورسەتكىشكە يۆان يۆانوۆ قول جەتكىزدى. ول يادرو لاقتىرۋدان ءتورتىنشى ورىنعا تابان تىرەدى.
سلوۆەنيانىڭ استاناسى ليۋبليانادا ۇستەل تەننيسىنەن ءوتىپ جاتقان WTT Star Contender تۋرنيرىندە كيريلل گەراسيمەنكو 1/8 فينالدا ءسۇرىندى. العاشىندا ول اسا تارتىستى باسەكەلەردە حورۆاتيالىق فران كويچ پەن ەۋروپا بىرىنشىلىگىنىڭ كۇمىس جۇلدەگەرى, سلوۆەنيالىق داركو يورگيچتەن 3:2 ەسەپتەرىمەن باسىم ءتۇستى. بىراق ودان كەيىن وليمپيا ويىندارىنىڭ التى دۇركىن جۇلدەگەرى, ەۋروپانىڭ بىرنەشە دۇركىن چەمپيونى, الەم كۋبوگىنىڭ يەگەرى, گەرمانيالىق دميتري وۆچاروۆتان ۇتىلدى.
فۋتبولدان قازاقستان پرەمەر-ليگاسىنىڭ 11 تۋرىندا مىناداي ناتيجەلەر تىركەلدى: «شاحتەر» – «اتىراۋ» 0:3, «توبىل» – «قايرات» 1:0, «قايسار» – «تۇران» 1:1, «جەتىسۋ» – «جەڭىس» 2:2, «ەلىماي» – «اقتوبە» 2:2 جانە «استانا» – «ورداباسى» 0:1.
تۇركيانىڭ انتاليا قالاسىندا ساداق اتۋدان وليمپيا ويىندارىنىڭ سوڭعى ليتسەنزيالىق ءتۋرنيرى ءوتتى. وكىنىشكە قاراي, قازاقستاننىڭ ايەلدەر قۇراماسى ءۇشىن بۇل جارىس ءساتسىز اياقتالدى. انادولى ەلىنە ساپار شەككەن ەكى مەرگەنىمىز عانا 1/8 فينالعا شىقتى. سول مەجەدە الينا ءىلياسوۆا سلوۆاكيالىق دەنيسا بارانكوۆادان ۇتىلسا, ەليزاۆەتا اۆدەەۆا يراندىق موبيني فاللاعا جول بەردى.
22-30 ماۋسىم ارالىعىندا يوردانيادا كۇرەس تۇرلەرىنەن جاسوسپىرىمدەر اراسىنداعى (U-17) ازيا بىرىنشىلىگىنىڭ شىمىلدىعى تۇرىلەدى. قازاقستان قۇراماسىنىڭ اعا جاتتىقتىرۋشىسى المات كەبىسباەۆ اتالعان دودادا مىنا شاكىرتتەرىنە سەنىم ارتىپ وتىر: 45 كگ – نۇرداۋلەت قۇمار ۇلى , 48 كگ – زاراپ سۇڭقار, 51 كگ – ەدىگە تولەۋتاەۆ, 55 كگ – الپامىس بولات ۇلى, 60 كگ – ءشامىل دوسبول, 65 كگ – دانيار قاناعاتبەك, 71 كگ – ءابىلمانسۇر اقىلبەك, 80 كگ – ەركەبۇلان اناپيا, 92 كگ – ادىلەت تويشىبەك جانە 110 كگ – ايدوس قايراتوۆ.
چەحيانىڭ برنو قالاسىندا كوركەم گيمناستيكادان گران-پري سەرياسىنىڭ سوڭعى كەزەڭى ءوز مارەسىنە جەتتى. بۇل جارىستا جەرلەستەرىمىزدىڭ اراسىنان جالعىز ايبوتا ەرتايقىزى ونەر كورسەتتى. كوپسايىستىڭ قورىتىندىسى بويىنشا ول جەتىنشى ورىن السا, جاتتىعۋدىڭ ءۇش ءتۇرى بويىنشا فينالعا شىقتى. بىراق سول باسەكەلەردىڭ بىردە-بىرەۋىندە جەڭىس تۇعىرىنا كوتەرىلە المادى. اقبوتانىڭ ناتيجەسى مىناداي: «دوپ» - ءتورتىنشى, «تاسپا» – بەسىنشى جانە «ۇرشىق» – جەتىنشى ورىن.