بۇگىن سەناتتىڭ شاحمات بويىنشا Senat Open اشىق كۋبوگىنىڭ جارتىلاي فينالداعى بەس ءتۋرنيرىنىڭ العاشقىسى شىمكەنتتە ءوتتى. سەنات شەڭبەرىندە قازاقستان شاحمات فەدەراتسياسى ۇيىمداستىرعان تۋرنيرگە بارلىق وبلىستار مەن رەسپۋبليكالىق ماڭىزى بار قالالار ءماسليحاتتارىنىڭ دەپۋتاتتارى, وبلىستىق جانە قالالىق قوعامدىق كەڭەستەردىڭ مۇشەلەرى جانە باق وكىلدەرى قاتىستى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
شىمكەنت قالاسى جانە جامبىل, قىزىلوردا, تۇركىستان وبلىستارىنان كەلگەن وبلىستىق دەڭگەيدەگى 100 جەڭىمپاز «وڭتۇستىك» وڭىردەگى ۇزدىكتەردى انىقتاۋ ءۇشىن اتالعان قالاعا جينالدى. اشىلۋ سالتاناتىنا قالانىڭ, ءماسليحاتتىڭ جانە KazChess فيليالىنىڭ باسشىلىعى قاتىستى. 9 تۋردا وتكەن جەدەل ويىننىڭ ناتيجەسى بويىنشا Senat Open اشىق فينالىنا قاتىساتىن 25 وكىل انىقتالدى.
ايتا كەتسەك, ىرىكتەۋ تۋرنيرلەرى 21 ساۋىردەن باستاپ 15 وبلىستا جانە رەسپۋبليكالىق ماڭىزى بار ءۇش قالادا وتە باستاعان بولاتىن. ءار ءوڭىردىڭ ۇزدىك 25 ويىنشىسى ايماقتىق تۇرعىدا وتەتىن جارتىلاي فينالدىڭ بىرىندە, اتاپ ايتقاندا, سولتۇستىكتە, وڭتۇستىكتە, باتىستا, شىعىستا, ورتالىقتا ويناۋعا قۇقىلى بولدى. تامىز ايىنىڭ سوڭىندا استانادا وتەتىن فينالدا پارلامەنت دەپۋتاتتارى مەن رەسپۋبليكالىق باق جۋرناليستەرىن قوسقاندا 200-گە جۋىق ادام سايىسقا تۇسەدى. چەمپيوناتقا ەلىمىزدىڭ تۇكپىر-تۇكپىرىنەن 3 مىڭعا جۋىق ادام كەلەدى.