استانا. 26 ءساۋىر. بۇگىن تاڭەرتەڭ ساعات 7:00-دە ەلىمىزدە باستالعان قازاقستان رەسپۋبليكاسى پرەزيدەنتىنىڭ سايلاۋىندا 9 514 988 سايلاۋشى داۋىس بەرۋلەرى ءتيىس. بۇل تۋرالى Bnews.kz حابارلادى.
«تاڭعى ساعات 07.00-دەن باستاپ ەلىمىزدە سايلاۋ ۋچاسكەلەرى اشىلدى, ەل تۇرعىندارى وزدەرى قالاعان كانديداتىنا كەشكى 20.00-گە دەيىن داۋىس بەرە الادى», - دەلىنگەن حابارلامادا.
سايلاۋشىلار ءۇش ۇمىتكەردىڭ اراسىنان ەڭ تاڭداۋلىنى تاڭدايدى. ولاردىڭ اراسىندا نۇرسۇلتان نازارباەۆ, تۇرعىن سىزدىقوۆ جانە ابىلعازى قۇسايىنوۆ بار.
«2015 جىلدىڭ 5 ساۋىرىندەگى جاعداي بويىنشا, داۋىس بەرۋ قۇقىعىنا 9514988 قازاقستاندىق يە. داۋىس بەرۋ بيۋللەتەندەرى, تىزىمگە ىلىنگەن سايلاۋشىلاردىڭ جالپى سانىنان 1% رەزەرۆتى قوسا العاندا, 9 610 138 دانا. جالپى, قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن ۇيىمداستىرۋعا جانە وتكىزۋگە 9965 سايلاۋ ۋچاسكەسى ىسكە قوسىلعان. ونىڭ ىشىندە 9741 ۋچاسكەلىك سايلاۋ كوميسسياسى, سونداي-اق 171 اۋداندىق, 37 قالالىق جانە 16 وبلىستىق, استانا جانە الماتى قالالارىنىڭ اۋماقتىق سايلاۋ كوميسسيالارى. جالپى العاندا, ولاردىڭ قۇرامىندا 70 مىڭ ادام بار», - دەلىنگەن حابارلامادا.
ەستەرىڭىزگە سالا كەتەيىك, پرەزيدەنت سايلاۋىنا قاتىسۋ ءۇشىن 1024 حالىقارالىق باقىلاۋشى مەن باق وكىلى تىركەلدى.
پرەزيدەنت سايلاۋىن وتكىزۋ تۋرالى باستاما 14 اقپاندا قازاقستان حالقى اسسامبلەياسى كەڭەسىنىڭ وتىرىسىندا كوتەرىلدى. كەڭەس جۇمىسىنا پارلامەنت دەپۋتاتتارى, رەسپۋبليكالىق ەتنومادەني بىرلەستىكتەر باسشىلارى, ۇەۇ, قحا عىلىمي-ساراپشىلىق كەڭەسى مۇشەلەرى, باق وكىلدەرى قاتىستى.
كەڭەس مۇشەلەرى اتاپ وتكەندەي, جاھاندىق ەكونوميكالىق داعدارىس جاعدايىندا جانە كۇردەلى حالىقارالىق كۇن تارتىبىندە كەزەكتەن تىس سايلاۋ وتكىزۋ ءبىزدىڭ ەلىمىزگە «نۇرلى جول بولاشاققا باستار جول» باعدارلاماسىن, «قازاقستان-2050» ستراتەگياسىندا بەلگىلەنگەن ەلىمىزدىڭ دامۋ باعىتتارىن جۇزەگە اسىرۋعا مۇمكىندىك بەرەدى.
قۇرىش نۇرىمبەت.
دەرەك, سۋرەت: Bnews.kz.