ساۋدا قاتىناسى بەكي تۇسەدى

قاتىسۋشى التى ەلدىڭ – قازاقستان, اقش, وزبەكستان, قىرعىز رەسپۋبليكاسى, تۇرىكمەنستان جانە تاجىكستان وكىلدەرى TIFA اياسىندا ساۋ­دا جانە ينۆەستيتسيالىق قاتى­­ناستاردى كەڭەيتۋ جانە ءار­تاراپتان­دىرۋ كەلەشەگىن تالقىلادى.

قازاقستان دەلەگاتسياسىن پرەمەر-ءمينيستردىڭ ورىنباسارى سەرىك جۇمانعارين باسقاردى. ۆيتسە-پرەمەر جاھاندىق ەكونوميكالىق تۇراقسىزدىق, سانكتسيالار, ساۋ­دا قاراما-قايشىلىقتارى جانە جاھاندىق جەتكىزۋ تىز­بەكتەرىندەگى ىركىلىستەر جاع­دايىندا بۇگىنگى TIFA وتىرىسى «ساعاتتاردى سالىستىرۋ» جانە ەكونوميكالىق كۇن تارتىبىندەگى ماڭىزدى ماسەلەلەر بويىنشا الداعى باسىمدىقتار­دى بەلگىلەۋ ءۇشىن پراكتيكا­لىق پلاتفورما قىزمەتىن اتقارا­تىنىن اتاپ ءوتتى.

ء«وڭىردىڭ ەڭ ءىرى ەكونومي­كاسى­نىڭ ءبىرى جانە دسۇ مۇشەسى رەتىندە قازاقستان TIFA پلات­فورماسىنىڭ ەكىجاقتى عانا ەمەس, سونىمەن قاتار وڭىرلىك ساۋ­دا قاتىناستارىن نىعايتۋداعى جوعارى الەۋەتىن كورىپ وتىرمىز. بيىل TIFA ورتالىق ازيا ايماقتىق كەڭەسىنىڭ وتىرىسىن وتكىزۋ – وڭىرلىك ىنتىماقتاستىق پەن تۇراقتىلىقتىڭ ۇدەمەلى دامۋىنىڭ تاعى ءبىر دالەلى, بۇل – باتىس پەن شىعىستىڭ جاھاندىق نارىقتارىن بىرىك­تىرۋ ارقىلى الەمدىك ەكونوميكانى تۇراقتاندىرۋدا ماڭىزدى ءرول اتقارادى», دەپ اتاپ ءوتتى سەرىك جۇمانعارين.

اقش-تىڭ ساۋدا وكىلى, ەلشى كەترين تاي ءوز كەزەگىن­دە TIFA ەلدەرى ەكونوميكاسى­نىڭ تۇراقتى ءوسۋىن قامتاماسىز ەتۋ ءۇشىن كۇش-جىگەردى بىرگە ۇيلەستىرۋ قاجەتتىگىن اتاپ ءوتتى.

«ورتالىق ازيا اقش ءۇشىن وتە ماڭىزدى ەكونوميكالىق جانە ستراتەگيالىق سەرىكتەس بولىپ قالا بەرەدى. ءبىز سون­داي-اق كليماتتىڭ وزگەرۋىن, تەحنولوگيالىق جانە ين­دۋستريالىق پروگرەستىڭ سالدارىمەن بەتپە-بەت كەلىپ وتىرمىز. تۇراقتىلىعى تۇراقتى ەكو­نوميكالىق ءوسۋدى قام­تاماسىز ەتەتىن ءداستۇرلى جەت­كىزۋ تىزبەگىن دامىتۋ ءۇشىن بىرلەسىپ جۇمىس ىستەۋ كەرەك. اقش سونداي-اق تاۋار اينالىمىنىڭ ساپاسىن ارتتىرۋعا, اۆتوموبيلدەر مەن جارتىلاي وتكىزگىشتەر وندىرىسىنە قاجەتتى ماڭىزدى مەتالداردى جەتكىزۋ­گە مۇددەلى», دەپ اتاپ ءوتتى كەترين تاي.

TIFA كەڭەسىنىڭ قاتىسۋ­شىلارى جەتكىزۋ تىزبەكتەرىنىڭ تۇراقتىلىعىن ارتتىرۋ جانە ەكونوميكانى ءارتاراپتاندىرۋ ءۇشىن قاجەتتى جاڭا ساۋدا جولدارىن ازىرلەۋ ماسەلەلەرىن تالقىلادى.