جەتىسۋلىق شارۋالارعا 148,3 ملن تەكشە مەتر سۋ بەرىلدى. بۇل تۋرالى وڭىرلىك كوممۋنيكاتسيالار قىزمەتى الاڭىندا جەتىسۋ وبلىسى بويىنشا «قازسۋشار» فيليالىنىڭ ديرەكتورى سايات قۇدايبەرگەنوۆ مالىمدەدى, دەپ حابارلايدى Egemen.kz.
بۇگىندە 26 مىڭ گەكتاردان استام ەگىس القابى سۋارىلدى. شارۋالارمەن بارلىعى 770,3 ملن تەكشە مەتر سۋارمالى سۋ بەرۋ جونىندە 6140 كەلىسىمشارت جاسالعان.
سونداي-اق جالپى ۇزىندىعى 106,2 شاقىرىم بولاتىن كانال بولىگى مەحانيكالىق ادىسپەن تازالانىپ, 13 گيدروتەحنيكالىق قۇرىلىس پەن 9 گيدروبەكەت جوندەلىپ وتىر.
سايات قۇدايبەرگەنوۆتىڭ ايتۋىنشا وبلىستا جاڭا سۋ شارۋاشىلىعى نىساندارىن سالۋ جوسپارعا الىنعان. بۇلار – ەسكەلدى اۋدانىنداعى بالىقتى وزەنىندەگى سۋ قويماسى, پانفيلوۆ اۋدانىنداعى قورعاس, ۇسەك جانە تىشقان وزەندەرىندەگى ءۇش سۋ قويماسى, الاكول اۋدانىنداعى جامانتى سۋ قويماسى, كوكسۋ اۋدانىنداعى بىجى وزەنىندەگى سۋ قويماسى. قازىرگى ۋاقىتتا تەحنيكالىق-ەكونوميكالىق نەگىزدەمە ازىرلەنىپ جاتىر.