ۇلتتىق قۇراما ساپىنان پاريج وليمپياداسىنا ليتسەنزيا جەڭىپ العان سپورتشىنىڭ ءبىرى – كانوە مەن بايداركادا ەسكەك ەسۋ وكىلى رۋفينا يسكاكوۆا. ول جولدامانى ءساۋىر ايىندا جاپونيادا وتكەن ازيا چەمپيوناتىندا جەڭىپ العان ەدى, دەپ جازادى Egemen.kz تۋريزم جانە سپورت مينيسترلىگىنىڭ ءباسپاسوز قىزمەتىنە سىلتەمە جاساپ.
بۇل – 20 جاستاعى سپورتشىنىڭ العاشقى وليمپياداسى. رۋفينا كانوە مەن بايداركادا ەسكەك ەسۋ سپورتىمەن 13 جاسىنان بەرى اينالىسادى ەكەن.
ء«جۇزۋ سپورتىندا جۇرگەنىمدە ءبىر كۇنى جاتتىقتىرۋشىم اشىق سۋدا ەسكەك ەسىپ كورۋدى ۇسىندى. وتە قىزىق سپورت ءتۇرى بولعاندىقتان, مەنى بىردەن وزىنە باۋراپ الدى. مىنە, سودان بەرى كانوە مەن بايداركادا ەسكەك ەسىپ كەلەمىن. ارينە, العاشىندا ءبارى قيىن بولدى. بىراق تاجىريبەلى باپكەرلەرىمنىڭ ارقاسىندا بۇل سپورت ءتۇرىن ەركىن مەڭگەرىپ كەتتىم. 2020 جىلعى توكيو وليمپياداسىنا قاتىسقان ارىپتەستەرىمنىڭ جارىسىن تەلەديدار ارقىلى تاماشالاپ وتىرىپ, الدىما «كەلەسى وليپياداعا مەن بارامىن» دەگەن ماقسات قويدىم. ارادا كوپ ۋاقىت وتپەي سول ارمانىما قول جەتكىزدىم», دەيدى جاس سپورتشى. سپورتشى اعايىندى سەرگەي جانە تيموفەي ەمەليانوۆتارعا ەلىكتەپ ءوسىپ, ۇلگى تۇتقان.
«رۋفينا يسكاكوۆا 2021 جىلدان بەرى ۇلتتىق قۇراما ساپىندا جاتتىعىپ كەلەدى. از ۋاقىتتىڭ ىشىندە ۇلكەن ناتيجە كورسەتكەن تالانتتى سپورتشىلارىمىزدىڭ ءبىرى. 2023 جىلى يتاليادا جاستار مەن جاسوسپىرىمدەر اراسىنداعى الەم چەمپيوناتىندا توپ جارىپ, ەل مەرەيىن اسىردى. وتە مىنەزدى, كەز كەلگەن قيىندىققا شىدامدى. سونىڭ ارقاسىندا ول ۇلكەن جەتىستىكتەرگە قول جەتكىزىپ كەلەدى», دەيدى ۇلتتىق قۇرامانىڭ باس باپكەرى قايسار نۇرماعامبەتوۆ. «سپورتشىعا بەرىلەتىن تاپسىرما – وليمپيا ويىندارىنا قاتىسىپ, فينالدىق كەزەڭدەرگە شىعۋ جانە تاجىريبە جيناۋ. ءارى قاراي باعى مەن بابىنا بايلانىستى بولماق», دەپ اتاپ ءوتتى مەملەكەتتىك جاتتىقتىرۋشى داۋلەت سۇلتانبەكوۆ. رۋفينانىڭ ءوزى پاريجگە التىن ءۇشىن عانا باراتىنىن ايتادى.
«وليمپيادا چەمپيونى بولۋ – كەز كەلگەن سپورتشىنىڭ ۇلى ارمانى. سوندىقتان پاريجگە التىن ءۇشىن بارامىن. وليمپيادانىڭ جۇلدەسىن جەڭىپ الۋ ءۇشىن ەڭبەكتەنىپ, جاتتىعۋ جاساپ جاتىرمىز. ءساتىن سالسا, بۇل ەڭبەگىمىز اقتالادى دەپ سەنەمىن», دەيدى سپورتشى.