شەبەرلىك پەن شىڭدالۋ مەكتەبى

ۇلتتىق قورعانىس ۋني­ۆەر­سيتەتى جىل سايىن قارۋلى كۇشتەر باس شتابىنىڭ اكادەمياسى فاكۋل­تەتىندە جەدەل-تاكتيكالىق جانە جەدەل-ستراتەگيالىق دەڭگەيدەگى باس­قارۋ ماماندارىن دايىن­داپ شىعارادى. وفيتسەرلەر ماگيسترا­تۋرا­نىڭ ءبىلىم بەرۋ باعدار­لا­ماسىنا سايكەس تەوريالىق وقىتۋ مەن اس­كەري تاعىلىمدامانىڭ تولىق كۋرسىنان وتەدى. بيىلعى تۇلەكتەر 9 مامان­دىق پەن 22 بىلىكتىلىك بويىنشا مەملە­كەتتىك اتتەستاتتاۋ كوميسسياسى جۇر­گىز­گەن قورىتىندى اتتەستاتتاۋ بارىسىندا جوعارى بىلىمدەرىن كورسەتتى.

وفيتسەرلىك شەن تاپسىرۋ راسىمىنە قورعانىس ءمينيسترىنىڭ ءبىرىنشى ورىنباسارى – قك باس شتابىنىڭ باسشىسى, گەنەرال-لەيتەنانت سۇلتان قاما­لەتدينوۆ ارنايى كەلدى. ءسوز اراسىندا وفيتسەرلەردىڭ, بولاشاق اسكەرباسىلاردىڭ جانە اسكەري باسقارۋ ورگاندارى باسشىلارىنىڭ جاڭا پلەياداسى دايىندالىپ جاتقا­نىن اتاپ ءوتتى.

– ەگەمەن قازاقستان قارۋلى كۇش­تەرى قۇرىلعان العاشقى كۇننەن باس­تاپ نورماتيۆتىك-قۇقىقتىق بازانى قالىپ­تاستىرۋمەن, ۇيىم­دىق-شتاتتىق قۇرىلىمدى وڭتاي­لان­دىرۋمەن جانە اسكەرلەردى تەح­نيكالىق جاراق­تان­دىرۋمەن قاتار اسكەري كادرلاردى دايىن­داۋدىڭ كوپدەڭگەيلى جۇيەسىن قۇرۋ باسىم باعىت بولعانىن اتاپ وتكەن ءجون. بۇل قادام بۇگىندە ءوزىن تولىق اقتادى دەۋگە نەگىز بار. ۇلتتىق قاۋىپسىزدىكتى قامتاما­سىز ەتۋدە ادام الەۋەتىنە ەرەكشە ماڭىز بەرىلگەن. ەل پرەزيدەنتى – جوعارعى باس قولباسشى قاسىم-جومارت توقاەۆ قارۋلى كۇش­تەردىڭ ودان ءارى دامۋىنا باسا نازار اۋدارىپ كەلەدى. بىزگە باسقارۋ جۇيەسىن جاڭعىرتۋ, قازىرگى زامانعى قارۋلى قاقتىعىستاردىڭ تاجىريبەسىن ەسكەرە وتىرىپ, اسكەرلەردىڭ جاۋىنگەرلىك ازىرلىگى مەن قابىلەتىن ارتتىرۋ, ماتەريالدىق-تەحنيكالىق بازانى جەتىلدىرۋ, روبوتتاندىرۋ مەن جاساندى ينتەللەكتىنى ەنگىزۋمەن اينالىسۋ كەرەك. ارميانىڭ كادرلىق الەۋەتىن نىعايتۋداعى ۇلتتىق قورعانىس ۋني­ۆەر­­سي­تەتىنىڭ رولىنە توقتالعاندا, مۇندا بىرەگەي عىلىمي زەرتتەۋ جانە ءبىلىم بەرۋ ورتاسى قۇرىلعانىن دا ەسكەرۋ ماڭىزدى. الداعى ۋاقىتتا دا ۇقۋ-دىڭ دامۋى جالعاسىپ, كەلەسى وقۋ جىلىنان باستاپ جاڭا كافەدرا, فاكۋلتەت پەن زەرتحانالار اشىلادى. سونىمەن قاتار ماگيسترانتتار مەن دوكتو­رانتتارعا ارنالعان ءبىلىم بەرۋ باعدارلامالارى مەن پاندەر جەلىسى دە كەڭەيتىلەدى, – دەدى گەنەرال-لەيتەنانت سۇلتان قامالەتدينوۆ.

جوعارى وقۋ ورنى ۆەدومست­ۆو­ارالىق عىلىمي ءبىلىم بەرۋ ورتا­لىعى بولىپ ەسەپتەلەدى. مۇنى ەسكەرگەن قورعانىس ءمينيسترىنىڭ ءبىرىنشى ورىنباسارى قۇت­تىقتاۋ سوزىندە پروفەسسورلىق وقى­تۋ­شىلار قۇرامىنا, عىلىمي قىز­مەت­كەرلەرگە العىسىن ءبىلدىردى. ءارى قازاق­ستان ارمياسىنىڭ قاتارى ەڭ بەدەلدى اسكەري وقۋ ورنىندا ءبىلىم العان جوعارى بىلىك­تى ماماندارمەن تولى­عاتىنىن جانە تۇلەكتەردىڭ الدىندا وفيتسەرلەر كورپۋسىنىڭ بەدەلىن جوعارى دەڭگەيگە كوتەرۋ مىندەتى تۇرعانىن جەتكىزدى.

بيىل ماگيستراتۋرانى «اسكەري ىستەگى ستراتەگيالىق مەنەدجمەنت» باع­دارلاماسى بويىنشا 8 وفيتسەر بىتىر­گەن. ولاردىڭ قاتارىندا وقۋىن ۇزدىك اياق­تاعان پولكوۆنيك مۇرات ءجۇسى­پوۆ بار. ال وقۋدىڭ بارلىق كەزەڭىندە جان-جاقتى قامتاماسىز ەتۋ فاكۋل­تەتى­نىڭ تۇلەك­تەرى, پودپولكوۆنيك دياس قانا­­فين مەن مايور يۆان بيتيۋكوۆ وتە جاقسى ءبىلىمىن كورسەتىپ, قورىتىندى اتتەس­تات­تاۋدى تەك «وتە جاقسى» باعاعا تاپسىرعان.

وقۋدىڭ بارلىق كەزەڭىندە «وتە جاقسى» دەگەن باعا الىپ, قورىتىندى اتتەستاتتاۋدان «وتە جاقسى» وتكەن ماگيسترانتتارعا توسبەلگى بەرىلىپ, ولاردىڭ اتى-ءجونى وقۋ ورنىنىڭ قۇرمەت تاقتاسىنا جازىلادى.

ءبىر ايتا كەتەرلىگى, ءبىلىم ورداسى ماگيستراتۋرانىڭ ءبىلىم بەرۋ باع­دار­لامالارى نەگىزىندە قازاقستاننىڭ باسقا اسكەرلەرى مەن اسكەري قۇرا­لىم­دارى ءۇشىن كادر دايىنداۋدى جۇزەگە اسىرادى. بيىل وقۋ ورنىن ۇلتتىق ۇلاننىڭ 23 اسكەري قىزمەتشىسى, ۇقك شەكارا قىزمەتىنەن 14 ادام جانە توتەنشە جاعدايلار مينيسترلىگىنەن 5 ادام ءبىتىرىپ شىقتى. سونداي-اق تاجىكستان رەسپۋبليكاسىنىڭ 16, قىرعىز رەسپۋبليكاسىنىڭ 4 اسكەري قىزمەتشىسى بار. ۋنيۆەرسيتەتتە ۇقشۇ-عا مۇشە مەملەكەتتەردىڭ وفيتسەرلەرى دە تۇراقتى نەگىزدە وقىپ, ءبىلىم الادى.