«ماڭعىستاۋ» زىمىران-ارتيللەريالىق كەمەسىنىڭ ەكيپاجى اشىق تەڭىزگە شىعىپ كەتكەن ەكى ادامدى قۇتقاردى. ولار 4 ساعاتتان كەيىن جاعادان 10 شاقىرىم ايماقتاعى «جارتاستى» ءمۇيىس ماڭىنان تابىلدى, دەپ جازادى Egemen.kz.
«ماڭعىستاۋ» زىمىران-ارتيللەريالىق كەمەسىنىڭ ەكيپاجى جەدەل كەزەكشىدەن ساپبورد مىنگەن ەكى ادامنىڭ جوعالعانى تۋرالى حابار العان سوڭ ولاردى ىزدەۋگە كىرىستى.
كەمە كومانديرى كاپيتان-لەيتەنانت نۇربەت تالعات دابىل العاننان كەيىن گيدرومەتەورولوگيالىق جاعدايدى ەكشەدى.
«راديولوكاتسيالىق ستانتسيانىڭ كومەگىمەن تەڭىز سەكتورىن زەرتتەگەن اسكەري بايلانىس جانە راديوتەحنيكالىق قىزمەت كومانداسىنىڭ ستارشيناسى اعا ماتروس ءازىمحان ءامىرحانوۆ سەرگەكتىك پەن جوعارى جاۋىنگەرلىك داعدىلارىن كورسەتتى», دەدى نۇربەت تالعات.
ساپبورد مىنگەن جاس جىگىتتەردە ەكى ادامعا ءبىر ەسكەك قانا بولعانى انىقتالدى. تەڭىزشىلەر ولاردى كەمەگە كوتەرىپ, العاشقى مەديتسينالىق كومەك كورسەتتى. قۇتقارىلعان ازاماتتار شۇعىل تۇردە اقتاۋ پورتىنا جەتكىزىلدى.