بۇگىن ۇكىمەت وتىرىسىندا دەنساۋلىق ساقتاۋ ينفراقۇرىلىمىن دامىتۋدىڭ 2024-2030 جىلدارعا ارنالعان تۇجىرىمداماسى قابىلداندى, دەپ جازادى Egemen.kz.
تۇجىرىمداما اياسىندا ەلىمىزدەگى اۋرۋحانا, ەمحانا, ۋنيۆەرسيتەتتەردىڭ ماتەريالدىق-تەحنيكالىق بازاسى نىعايتىلادى.
سوڭعى 5 جىلدا 400-دەن استام دەنساۋلىق ساقتاۋ وبەكتىسى سالىندى. 261 ملرد تەڭگەدەن استام سوماعا مەديتسينالىق جابدىق ساتىپ الىندى.
«قازىردىڭ وزىندە «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا اۋىلدىق ەلدى مەكەندەردە جاڭا وبەكتىلەر سالۋ جۇمىستارى جۇرگىزىلىپ جاتىر. جىل سوڭىنا دەيىن 556 وبەكتى سالىنادى. دەگەنمەن, ءالى دە كوپ نارسە ىستەلۋى كەرەك. اۋرۋحانالاردىڭ, ەمحانالاردىڭ, ۋنيۆەرسيتەتتەردىڭ ماتەريالدىق-تەحنيكالىق بازاسىن جاقسارتاتىن بولامىز», دەدى ولجاس بەكتەنوۆ.
بۇل قادام پاتسيەنتتەر مەن مەدپەرسونال ءۇشىن قاجەتتى جاعداي جاساۋعا جانە ەمدەۋدىڭ جاڭا تەحنولوگيالارى مەن ادىستەمەلەرىن دامىتۋعا مۇمكىندىك بەرەدى.