قوستاناي. 25 ءساۋىر. قوستاناي قالاسى جاۋىنگەرلىك داڭق كىتابىن وبلىستىق ارداگەرلەر كەڭەسىنە سالتاناتتى تۇردە تاپسىردى. بۇل تۋرالى egemen.kz ءتىلشىسى حابارلادى.
وتكەن جىلى شىلدە ايىندا وبلىستا جاۋىنگەرلىك داڭق كىتابى جاسالىپ, ول بۇكىل اۋداندارعا شىعارىلعان بولاتىن. ەڭ بىرىنشى بولىپ التىنسارين اۋدانى كىتاپتى سالتاناتتى تۇردە قاراسۋ اۋدانىنا تابىس ەتكەن ەدى. ۇلى وتان سوعىسىنا بايلانىستى اۋدانداعى تىڭ دەرەكتەر, كوزى ءتىرى سوعىس ارداگەرلەرىنىڭ ەستەلىكتەرى, مايداندا وپات بولعان جەرلەستەر, تىلداعى ەرلىككە پارا-پار ەڭبەك تۋرالى مالىمەتتەر كىتاپقا جازىلدى, ۆيدەو ماتەريالدار ءتۇسىرىلىپ, ونىڭ ديسكىسى دە كىتاپقا جاپسىرىلدى. كىتاپتى كەلەسى اۋدانعا تاپسىرۋ سالتاناتتى تۇردە وتكىزىلىپ, جاستار مەن مەكتەپ وقۋشىلارى سوعىس تاريحىنا, اتالاردىڭ ەرلىك ىستەرىنە قانىقتى, تاعزىم ەتتى. وسى شارا جىل تاۋلىگى بويى جۇرگىزىلىپ, جاۋىنگەرلىك داڭق كىتابى وبلىستىڭ بۇكىل اۋداندارى مەن قالالارىن ارالادى. ەندى ول قوستاناي قالاسىنا قايتىپ ورالدى.
وبلىس ورتالىعىنداعى بالالار شىعارماشىلىعى سارايىندا جاۋىنگەرلىك داڭق كىتابىن وبلىستىق ارداگەرلەر كەڭەسىنە سالتاناتتى تاپسىرۋ شاراسىنا سوعىس ارداگەرلەرى, تىل ەڭبەككەرلەرى, اسكەري قىزمەتكەرلەر مەن جاستار شاقىرىلدى.
قوستاناي قالاسىنىڭ اكىمى احمەدبەك احمەتجانوۆ: « ۇلى وتان سوعىسىنا 1,8 ميلليون قازاقستاندىقتار قاتىستى, سولاردىڭ تەڭ جارتىسى تۋعان جەرگە ورالمادى. سوعىس جىلدارى ءبىزدىڭ وڭىرگە تۇتاس زاۋىتتار مەن كاسىپورىندار كوشىپ كەلىپ, جۇمىسىن جالعاستىردى. حەرسون قالاسىنان «بولشەۆيچكا» تىگىن فابريكاسى, ستالينگرادتان اسكەري-اۆياتسيالىق مەكتەبى وسىندا كەلدى. قازىر الاپات سوعىستىڭ كۋاگەرلەرى ارامىزدى تىم ازايىپ كەتتى, بۇگىندە قوستاناي قالاسىندا 122 سوعىس ارداگەرى تۇرادى» دەدى.
قالا اكىمى سوعىس ارداگەرى بەرتران رۋبينشتەينگە, دميتري برۋسنيككە, مولداعالي جۇنىسبەكوۆكە, نيكولاي ستەپۋرينگە, نيكولاي بارابانوۆقا مەرەكەلىك مەدال تاپسىردى.
وبلىستىق ارداگەرلەر كەڭەسى توراعاسىنىڭ ورىنباسارى ۆەرا سەمەنوۆا: «بۇل كىتاپ ارداگەرلەر ۇيىمدارىنىڭ, ارحيۆ قىزمەتكەرلەرىنىڭ جانكەشتى جۇمىسىنىڭ ناتيجەسى. كىتاپتا قان مايدانعا قوستاناي وبلىسىنان اتتانعان ءار جاۋىنگەردىڭ ەرلىگى تۋرالى ايتۋعا تىرىستىق, بارلىعىن قامتىعىمىز كەلدى. ونداعى سوعىس ارداگەرلەرى مەن مايدان دالاسىندا قالعان بوزداقتار تۋرالى ماتەريالداردىڭ بارلىعى جۇرەكپەن جازىلدى, تولقىماي وقۋ مۇمكىن ەمەس. بۇل كىتاپ سونىسىمەن دە قاسيەتتى» دەدى.
جاۋىنگەرلىك داڭق كىتابى جالعىز دانا بولىپ جاسالدى, ونى كوبەيتۋ ءۇشىن جەڭىس قورىنان ارنايى قارجى بولىنەتىن بولادى. كىتاپتىڭ وبلىستىق ارداگەرلەر كەڭەسىنە سالتاناتتى بەرىلۋى پاتريوتتىق ءان-بيمەن كوركەمدەلدى.
ءنازيرا جارىمبەتوۆا.
دەرەك: egemen.kz
سۋرەت: ng.kz