ەرەۆانداعى ۆازگەن ساركيسيان اتىنداعى ستاديوندا فۋتبولدان ارمەنيا مەن قازاقستاننىڭ ۇلتتىق قۇرامالارى جولداستىق كەزدەسۋ وتكىزدى. بۇل ماتچ 2:1 ەسەبىمەن الاڭ يەلەرىنىڭ جەڭىسىمەن اياقتالدى.
باس باپكەر ماگومەد اديەۆ ۇلتتىق كوماندامىزدان كەتكەننەن كەيىن بۇل كەزدەسۋگە فۋتبولشىلاردى وتاندىق مامان رۋسلان بالتيەۆ باستاپ اپاردى. بىراق ارارات تاۋىنىڭ باۋرايىندا جەرلەستەرىمىزدىڭ جولى بولمادى. باسەكەنىڭ 4-مينۋتىندا قارسى جاق ويىنشىسىنىڭ قاقىراتا تەپكەن دوبىن كەرى قايتارۋعا تىرىسقان الەكساندر ماروچكين ونى ءوز قاقپامىزعا ەنگىزدى. ارمياندار العا شىققاننان كەيىن قازاقستان قۇراماسى بىردەن قارىمتا قايتارۋعا تىرىستى. الايدا ساتتىلىك بىزگە جولداس بولمادى. بىردە ماروچكيننىڭ باعىتتاعان دوبى باعاناعا تيسە, ماكسيم سامورودوۆ ماڭدايشانى كوزدەدى.
ۇزىلىستەن كەيىن دە تارتىستى ويىن جالعاستى. ەكى جاق تاراپىنان دا قاۋىپتى شابۋىلدار ۇيىمداستىرىلدى. بۇل جولى دا الاڭ يەلەرىنىڭ اسىعى الشىسىنان ءتۇستى. 58-مينۋتتا ۆاگان بيچاحچياننىڭ الىستان تەپكەن دوبى قاقپا تورىنان تابىلدى. ولاردىڭ ەكى بىردەي ناتيجەلى شابۋىلىنا قازاقستاننىڭ فۋتبولشىلارى تەك ءبىر گولمەن جاۋاپ قايتارا الدى. تورەشىنىڭ قوسقان 6-مينۋتىندا باۋىرجان يسلامحان 11 مەترلىك نۇكتەدەن ەسەپ ايىرماشىلىعىن قىسقارتتى – 2:1.
وسى ساتسىزدىكتەن كەيىن جەرلەستەرىمىز ماجارستانعا اتتاندى. ولار بۇگىن اتالعان مەملەكەتتىڭ سومباتحەي قالاسىندا ازەربايجان قۇراماسىمەن جولداستىق كەزدەسۋ وتكىزەدى.