استانا. 25 ءساۋىر. بۇگىن 00.00-دە 26 ساۋىرگە تاعايىندالعان كەزەكتەن تىس پرەزيدەنت سايلاۋىنا قاتىساتىن كانديداتتاردىڭ ۇگىت-ناسيحات ناۋقانى اياقتالدى. وسىعان وراي «تىنىشتىق كۇنى» جاريالاندى. بۇل ترالى «قازاقپارات» حابارلادى.
«بۇگىن كانديداتتارعا دا, ولاردى قولداۋشى ازاماتتارعا دا قانداي دا ءبىر ۇگىت جۇمىستارىن جۇرگىزۋگە تىيىم سالىنادى», - دەلىنگەن حابارلامادا.
كانديداتتارعا سايلاۋالدى ناۋقانىن جۇرگىزۋگە تىيىم سالۋ «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭ نورماسىمەن (27-باپ, 2-تارماق) جانە «2015 جىلعى 26 ساۋىرگە تاعايىندالعان قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىنا ازىرلىك جانە ونى وتكىزۋدىڭ نەگىزگى ءىس-شارالارىنىڭ كۇنتىزبەلىك جوسپارىن بەكىتۋ تۋرالى» قر وسك قاۋلىسىمەن بەلگىلەنگەن.
ورتالىق سايلاۋ كوميسسياسنىڭ قاۋلىسىندا سايلاۋالدى ۇگىتىن جۇرگىزۋ تىركەۋ مەرزىمى اياقتالعان ساتتەن باستاپ, سايلاۋ الدىنداعى كۇنى جەرگىلىكتى ۋاقىتپەن نول ساعاتتا اياقتالاتىنى (2015 جىلعى 26 ناۋرىزدا باستالىپ, 2015 جىلعى 25 ساۋىردە ساعات 00.00-دە اياقتالادى) ايتىلعان.
قازاقستان پرەزيدەنتىنىڭ كەزەكتەن تىس سايلاۋىنا نەبارى 1 كۇن عانا قالدى. 26 ساۋىردە تاڭەرتەڭ ساعات 7.00-دەن باستاپ قازاقستان ازاماتتارى وزدەرى قالاعان كانديداتقا داۋىس بەرە باستايدى. قر ورتالىق سايلاۋ كوميسسياسىنىڭ وكىلدەرى ەلدەگى بارلىق سايلاۋ ۋچاسكەلەرىنىڭ داۋىس بەرۋ كۇنىنە دايىن ەكەندىگىن مالىمدەدى.
2015 جىلعى 14 اقپاندا قازاقستان حالقى اسسامبلەياسىنىڭ كەڭەسى 2015 جىلى قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن وتكىزۋ تۋرالى باستاما كوتەردى. 18 اقپاندا قر پارلامەنتى ءماجىلىسى مەملەكەت باسشىسىنا قحا كەڭەسىنىڭ باستاماسىن قولداۋ تۋرالى ءوتىنىش ءبىلدىردى.
قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ 2015 جىلعى 25 اقپانداعى «قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن تاعايىنداۋ تۋرالى» جارلىعىنا سايكەس قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋى 2015 جىلدىڭ 26 ساۋىرىنە تاعايىندالدى.
قازاقستان رەسپۋبليكاسىنىڭ پرەزيدەنتتىگىنە كانديداتتاردى ۇسىنۋ رەسپۋبليكالىق قوعامدىق بىرلەستىكتەردىڭ جوعارى ورگاندارى جانە ازاماتتار ءوزىن-ءوزى ۇسىنۋ جولىمەن جۇزەگە اسىرىلدى. ول سايلاۋ تاعايىندالعان كۇننەن كەيىنگى كۇنى - 2015 جىلعى 26 اقپاننان باستالدى جانە 2015 جىلعى 15 ناۋرىزدا اياقتالدى.
ورتالىق سايلاۋ كوميسسياسىندا قازاقستان رەسپۋبليكاسىنىڭ پرەزيدەنتتىگىنە كانديدات رەتىندە بارلىعى 27 ۇمىتكەر تىركەلدى.
قازىرگى تاڭدا قازاقستان پرەزيدەنتى سايلاۋىنا 3 كانديدات ءۇمىتتى: «نۇر وتان» پارتياسىنىڭ اتىنان قازاقستان رەسپۋبليكاسىنىڭ پرەزيدەنتى نازارباەۆ نۇرسۇلتان ءابىش ۇلى, قازاقستان كوممۋنيستىك حالىق پارتياسى اتىنان مەملەكەتتىك, بانك مەكەمەلەرى مەن قوعامدىق قىزمەت كورسەتۋ قىزمەتكەرلەرى كاسىپوداعى اقمولا وبلىستىق فيليالىنىڭ توراعاسى تۇرعىن ىسقاق ۇلى سىزدىقوۆ جانە ءوزىن-ءوزى ۇسىنعان قازاقستان كاسىپوداقتارى فەدەراتسياسىنىڭ توراعاسى قۇسايىنوۆ ابىلعازى قالياقپار ۇلى.
سايلاۋ قارساڭىنداعى, سونداي-اق سايلاۋ كۇنى قۇقىق بۇزۋشىلىقتاردىڭ الدىن الۋ ماقساتىندا سايلاۋ پروتسەسىنىڭ بارلىق قاتىسۋشىلارىنىڭ نازارىن كەلەسى زاڭناما نورمالارىنا اۋدارامىز.
«قازاقستان رەسپۋبليكاسىنداعى سايلاۋ تۋرالى» قر كونستيتۋتسيالىق زاڭنىڭ 27-بابىنىڭ 2-تارماعىنا سايكەس, ۇگiت-ناسيحات سايلاۋ بولاتىن كۇننىڭ الدىنداعى كۇنگi جەرگىلiكتi ۋاقىت بويىنشا, ياعني, 2015 جىلعى 25 ساۋىردەگى ساعات 00.00-دە اياقتالدى.
وسى زاڭنىڭ 32-بابىنا سايكەس سايلاۋ بولاتىن كۇنi جانە ونىڭ قارساڭىنداعى كۇنi كەز كەلگەن ۇگiتكە تىيىم سالىنادى.
داۋىس بەرiلەتىن كۇن الدىنداعى بەس كۇن ىشىندە جانە داۋىس بەرiلەتiن كۇنى بۇقارالىق اقپارات قۇرالدارىندا قوعامدىق پىكىرگە سۇراۋ سالۋ ناتيجەلەرiن, سايلاۋ ناتيجەلەرiنiڭ بولجامىن, سايلاۋعا بايلانىستى وزگە دە زەرتتەۋلەردi جاريالاۋعا جول بەرىلمەيدi. سايلاۋ كۇنi داۋىس بەرىلەتiن ءۇي-جايدا نەمەسە داۋىس بەرۋ پۋنكتiندە قوعامدىق پiكiرگە سۇراۋ سالۋعا تىيىم سالىنادى (كونستيتۋتسيالىق زاڭنىڭ 28-بابىنىڭ 9-تارماعى).
سونداي-اق كونستيتۋتسيالىق زاڭنىڭ 39-بابىنىڭ 2-تارماعىنا ساي داۋىس بەرۋگە ارنالعان ءۇي-جايداعى ادامدار داۋىس بەرۋدi وتكiزۋ جونiندەگi كوميسسيا بەلگiلەگەن ەرەجەلەردi قاتاڭ ساقتاۋعا مiندەتتi. تيiستi سايلاۋ كوميسسياسىنىڭ توراعاسى تارتiپكە جاۋاپتى بولادى جانە كونستيتۋتسيالىق زاڭنىڭ ەرەجەلەرiن بۇزىپ, داۋىس بەرۋدi وتكiزۋگە كەدەرگi كەلتiرگەن كەز-كەلگەن ادامنىڭ ول جەردەن كەتۋiن تالاپ ەتۋگە قۇقىلى. داۋىس بەرۋ كۇنi داۋىس بەرۋگە ارنالعان ءۇي-جايدا سايلاۋ پروتسەسiنە قاتىسى جوق بوگدە ادامداردىڭ بولۋىنا تىيىم سالىنادى.
سايلاۋ بيۋللەتەندەرىن ۋچاسكەلىك سايلاۋ كوميسسيالارىنا اۋماقتىق سايلاۋ كوميسسيالارىمەن سايلاۋعا كەمىندە بiر كۇن قالعاندا - 2015 جىلعى 24 ساۋىردەن كەشىكتىرمەي جەتكىزىلەدى. داۋىس بەرۋ ۋچاسكەلىك سايلاۋ كوميسسيالارىندا سايلاۋ كۇنى, 2015 جىلعى 26 ساۋىردە جەرگىلىكتى ۋاقىت بويىنشا 07-00-دەن 20-00 ساعاتقا دەيىن وتكىزىلەدى.
قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن شەت مەملەكەتتەردىڭ, حالىقارالىق ۇيىمدار مەن شەتەلدىك باق وكىلدەرىنىڭ 1026 بايقاۋشىسى باقىلايدى. ورتالىق سايلاۋ كوميسسياسى 858 بايقاۋشىنى اككرەديتتەدى. ولاردىڭ 293-ءى - ەقىۇ/دياقب ميسسياسىنىڭ, 410-ى - تمد ميسسياسىنىڭ جانە 10-ى - شىۇ ميسسياسىنىڭ, 15-ءى - تۇركىتىلدەس مەملەكەتتەر ىنتىماقتاستىعى كەڭەسىنىڭ, 11-ءى - تۇركىتىلدەس ەلدەر پارلامەنتتىك اسسامبلەياسىنىڭ, 3-ەۋى - يسلام ىنتىماقتاستىعى ۇيىمىنىڭ وكىلدەرى جانە 37 شەت مەملەكەتتەن 116 بايقاۋشى بار. مۇنان بولەك, قازاقستان رەسپۋبليكاسى سىرتقى ىستەر مينيسترلىگىندە 37 مەملەكەتتەن بۇقارالىق اقپارات قۇرالدارىنىڭ 168 وكىلى اككرەديتتەلگەن.
قازاقستان رەسپۋبليكاسى پرەزيدەنتى سايلاۋىنىڭ قورىتىندىلارى سايلاۋ وتكىزىلگەننەن كەيىن جەتى كۇن مەرزىمنەن, ياعني 2015 جىلعى 3 مامىردان كەشىكتىرمەي انىقتالادى. سايلانعان قازاقستان رەسپۋبليكاسىنىڭ پرەزيدەنتىن تىركەۋ سايلاۋ وتكىزىلگەن كۇننەن باستاپ جەتى كۇن مەرزىم ىشىندە 2015 جىلعى 3 مامىردان كەشىكتىرمەي جۇزەگە اسىرىلادى.
قازاقستان رەسپۋبليكاسىنىڭ پرەزيدەنتىن سايلاۋ قورىتىندىلارى تۋرالى حابار بۇقارالىق اقپارات قۇرالدارىندا سايلاۋ وتكىزىلگەن كۇننەن باستاپ ون كۇننەن كەشىكتىرمەي, ياعني 2015 جىلعى 6 مامىردان كەشىكتىرمەي جاريالانادى.
قۇرىش نۇرىمبەت.