قازاقستاننىڭ ساقا تەننيسشىلەرى ءۇشىن پاريجدەگى «رولان گارروس» ءتۋرنيرى اياقتالعانىمەن, جاسوسپىرىمدەر بۋىنى اراسىنداعى «French Open» باسەكەسىندە ءامىر ومارحانوۆ تابىستى ونەر كورسەتىپ جاتىر.
رەسەيدىڭ وكىلى تيموفەي دەرەپاسكومەن جۇپ قۇرعان قانداسىمىز باستاپقى باسەكەلەردىڭ بارلىعىن جەڭىسپەن اياقتاپ, شيرەك فينالدا توماس فۋرەل (فرانتسيا) جانە لۋكا پرەدامەن (رۋمىنيا) كۇش سىناستى. بۇل تارتىس 6:4, 4:6, 12:10 ەسەبىمەن العاشقىلارىنىڭ پايداسىنا شەشىلدى. ءبىر ايتا كەتەرلىگى, شەشۋشى تۇستا ولار قارسىلاستارىنان 6:9 ەسەبىمەن جەڭىلىپ جاتىپ, ءۇش ماتچبولدا وزىق شىقتى.
ءسويتىپ, ءامىر ومارحانوۆتىڭ ەسىمى جاسوسپىرىمدەردىڭ «ۇلكەن دۋلىعا» ءتۋرنيرىنىڭ جارتىلاي فينالىنا دەيىن جەتكەن قازاقستاننىڭ ءۇشىنشى تەننيسشى رەتىندە سپورتتىق شەجىرەگە جازىلدى. العاش رەت بۇل مەجەگە 1997 جىلى يرينا سەليۋتينا جەتتى. ول زيمباۆەلىك كارا بلەك ەكەۋى «رولان گارروس» پەن «ۋيمبلدوندا» باس جۇلدەنى ولجالاپ, اقش-تىڭ اشىق بىرىنشىلىگىنىڭ اقتىق سىنىندا ونەر كورسەتتى. ال 2005-2006 جىلدار ارالىعىندا ءامينا راقىم پاريجدە فينالعا, نيۋ-يورك پەن مەلبۋرندە جارتىلاي فينالعا شىقتى.