استانا. 25 ءساۋىر. استانا قالاسىنىڭ تۇرعىنى ءالىبي جۇماعۇلوۆتىڭ سوققىعا جىعىلۋ فاكتىسى كەڭ قوعامدىق سىلكىنىس تۋدىرۋىنا بايلانىستى باس پروكۋرور اتالعان ءىستى باقىلاۋدى ءوز قولىنا الدى. بۇل تۋرالى استانا قالاسى پروكۋراتۋراسىنىڭ ءباسپاسوز قىزمەتى حابارلادى.
«تەرگەۋدىڭ العاشقى كۇنىنەن باستاپ-اق جابىرلەنۋشى مالىمدەگەن فاكتىلەردىڭ انىق-قانىعىن جان-جاقتى انىقتاۋ جونىندە قاجەتتى تەرگەۋ امالدارى جۇرگىزىلۋدە», - دەلىنگەن حابارلامادا.
2015 جىلعى 23 ساۋىردە اتالمىش قىلمىستى جاساۋعا كۇدىكتى رەتىندە قايرات جاماليەۆ ۇستالىپ, 24 ءساۋىر كۇنى وعان قاتىستى ءىس ماتەريالدارى قاماۋعا الۋ شارالارىن قابىلداۋ ءۇشىن سوتقا جونەلتىلدى.
ەسىل اۋدانى پروكۋرورىنىڭ سانكتسياسىمەن كۇدىكتى ق.جاماليەۆتىڭ تۇرعىلىقتى جەرىنە, سونداي-اق ونىڭ قىزمەتتىك كەڭسەسىنە ءۇش رەت ءتىنتۋ شارالارى جۇرگىزىلدى.
25 ءساۋىر كۇنى پوليتسيا قىزمەتكەرلەرى قىلمىسقا قاتىستى ەكىنشى ادامدى – ا. پريبىتكوۆتى (جاماليەۆتىڭ جۇرگىزۋشىسى) ۇستادى.
ءدال وسى كۇنى قىلمىسقا قاتىستى ءۇشىنشى كۇدىكتى – ا. ابىلتاەۆقا ىزدەۋ جاريالاي وتىرىپ, ونى سىرتتاي قاماۋعا الۋ شاراسىن سانكتسيالاۋ تۋرالى ۇسىنىس كەلىسىلدى.
تەرگەۋ بارىسى باس پروكۋرور مەن ىشكى ىستەر ءمينيسترىنىڭ جەكە باقىلاۋىنا الىندى.
قۇرىش نۇرىمبەت.
دەرەك, سۋرەت: استانا قالالىق پروكۋراتۋراسىنىڭ ءباسپاسوز قىزمەتى.