كەشە «كەرۋەن» ويىن-ساۋىق ورتالىعىندا وتكەن «كەك الۋشىلار: الترون ءداۋىرى» ءفيلمىنىڭ تۇساۋكەسەرى كوپشىلىكتى ەلەڭ ەتكىزدى. سوندا جيىلعان ءدۇيىم جۇرتتىڭ تاماشالاعانى – قىزىل كىلەمگە اسەمدەنىپ, ءسانى مەن سالتاناتىن كورسەتۋگە شىققان كينو اكتەرلەرى ەمەس, ۇلكەن ەكراننان سولاردىڭ قازاقشا سويلەۋى. ۇيىمداستىرۋشىلاردىڭ ايتۋىنشا, بۇل – 2011 جىلدان بەرى قازاق تىلىنە اۋدارىلعان 11-ءشى فيلم. «بولاشاق» قاۋىمداستىعى بۇعان دەيىن «كولىكتەر – 2», «قارا كيىمدىلەر», «باتىل جۇرەك», «جاڭا ورمەكشى ادام», «گالاكتيكا ساقشىلارى» سياقتى الەمدىك وزىق فيلمدەردى دۋبلياجدادى. «كەك الۋشىلار: الترون ءداۋىرى» ءفيلمى دە وسى باستامانىڭ جالعاسى. بيۋدجەتىنە 250 ملن. دوللار جۇمسالعان كينوونىم جۇكتەلگەن مىندەتتى مەجەدەن اسىرا ورىندادى.
«ءبىز ءۇشىن بۇل كۇن ماڭىزدى. سەبەبى, الەمدىك دەڭگەيدەگى وسى فيلم قازاق تىلىندە جارىق كوردى. كينوداعى 5 كەيىپكەر بۇگىنگى تىلمەن ايتقاندا – قاھارماندار, ارقايسىسى ەلى ءۇشىن جان بەرۋگە بار. سوڭىنا دەيىن كۇرەسە بىلەدى. ءبىزدىڭ وسكەلەڭ ۇرپاق ءۇشىن بۇل ءفيلمنىڭ تاربيەلىك ءمانى وتە زور دەپ بىلەمىز» دەدى جوبانىڭ يدەيالىق اۆتورى ءارى باستاماشىسى – باۋىرجان بايبەك.
«كەك الۋشىلاردىڭ» ەكىنشى ءبولىمىنىڭ رەجيسسەرى – «ساتۋرن» امەريكالىق سىيلىعىنىڭ يەگەرى جانە «وسكار» سىيلىعىنىڭ نومينانتى دجوسس ۋيدون. باستى رولدەردى جاھاندىق Marvel جۇلدىزدارى – «التىن گلوبۋس» جانە «ساتۋرن» سىيلىعىنىڭ يەگەرى كىشى روبەرت داۋني, سكارلەتت يوحانسون, كريس حەمسۆورت, كريس ەۆانس, وسكار سىيلىعىنىڭ نومينانتتارى – مارك رۋففالو, دجەرەمي رەننەر جانە سەميۋەل ل.دجەكسون ويناعان. قازاق ءتىلىندەگى دۋبلياج رەجيسسەرى تيمۋر بالىمبەتوۆ. «باتىل جۇرەك» مۋلتفيلمىندەگى كەيىپكەردىڭ ءانىن سالعان بەلگىلى ءانشى ماقپال يسابەكوۆا وسى فيلمدە كەيىپكەر سكارلەتت يوحانسوننىڭ داۋىسىن دىبىستاسا, جاسۇلان بايسالبەكوۆ التروننىڭ, بەيبىت قامارانوۆ توردىڭ, ەرجان جارىلقاسىنوۆ تەمىر ادامنىڭ, ەرعالي تولەباەۆ كاپيتان امەريكانىڭ, باقىتجان جارمۇحامبەتوۆ قىران كوزدىڭ, سامات قورداباەۆ حالكتى انا تىلىمىزدە سويلەتتى. شەتەلدىڭ سىنشىل دىبىس ماماندارىنىڭ سىنىنان سۇرىنبەي وتكەندەر عانا وسىنداي جاۋاپتى مىندەتتى ارقالاپتى. «ىرىكتەۋ وڭاي بولمادى, ويتكەنى, بۇل ءفيلمدى جاستار جاعى كوبىرەك كورەتىن بولعان سوڭ, داۋىستى قيمىلىنا ساي قىزىقتى ەتىپ قۇبىلتىپ وتىرۋ كەرەك دەدى. ەڭ قيىنى, حالككە ينە سالىنىپ, ونىڭ قۇبىجىققا اينالاتىن تۇسىندا داۋىسىن سالۋعا كوپ جاتتىقتىم. بۇرىن ءبىز الەمدىك فيلمدەردى قاشان قازاقشالايدى ەكەنبىز, ءبىزدىڭ وزگەدەن نەمىز كەم دەپ ويلاۋشى ەدىك. قازىر سول كۇنگە جەتتىك, مەن وتە قۋانىشتىمىن» دەيدى ەر جۇرەك حالكتىڭ اتىنان سويلەگەن سامات قورداباەۆ. ەلىمىزدە دۋبلياجدىڭ رەجيسسەرى, رەجيسسەردىڭ كومەكشىسى, دىبىس رەجيسسەرلەرى, تاماشا اۋدارماشىلار مەن وسى سالانىڭ بىلىكتى ماماندارىنىڭ ۇلكەن مەكتەبى بار دەپ اۋىز تولتىرىپ ايتا الامىز. الىسقا بارماي-اق, «كەك الۋشىلاردى» دىبىستاعان اكتەرلەردىڭ ديكتسياسى, ءتىلى تازا. داۋىس تەمبرى قۇلاققا جاعىمدى ەستىلەدى. قازاقتىڭ دۋبلياج مەكتەبىنىڭ قانشالىقتى دەڭگەيدە ەكەندىگىن «كەك الۋشىلار» ءفيلمى تاعى ءبىر رەت دالەلدەدى. وسى ءىستىڭ باسى-قاسىندا ءجۇرىپ, مۇرىندىق بولا بىلگەن «بولاشاق» قاۋىمداستىعى, «نۇر وتان» پارتياسى, «Kassa Nova بانك» اق جانە «مەلومان» كومپانياسى Marvel ستۋدياسىنىڭ قوسقان ۇلەسى ەرەكشە. ءساتتى باستامانىڭ العاشقى شىمىلدىعىن اشقان – «كولىكتەر-2» مۋلتفيلمىنە ەلباسى جوعارى باعاسىن بەرگەن بولاتىن.
ءفيلمنىڭ الدىن الا كورسەتىلىمىنە بالالار ءۇيىنىڭ تاربيەلەنۋشىلەرى شاقىرىلدى. ولار وزدەرى سەكىلدى تاعدىرلاس بالالاردىڭ ونەرىنە ءسۇيسىندى. ويتكەنى, فيلمنىڭ دۋبلياجىنا جوبانىڭ تۇراقتى قاتىسۋشىلارىنا اينالعان, باعاناشىلداعى № 1 بالالار ءۇيىنىڭ تاربيەلەنۋشىلەرى قاتىسىپ, دىبىستاۋعا اتسالىسقان. شەتەل كينوتەاترلارىندا اعىلشىن تىلىندەگى فيلمدەردىڭ ءسۋبتيترى رەتىندە سول ەلدەگى باسىم ۇلتتىڭ ءتىلى قوسىمشا بەرىلەدى. ءبىزدىڭ ەلدە وزگە ەلدىڭ فيلمدەرى تۇپنۇسقا تىلدە ۇلكەن ەكراننان كورسەتىلمەيدى. دەسەك تە, سىرتتان كەلگەن, قازاق ءتىلىن ۇيرەنەمىن دەگەن قوناق ءۇشىن شەتەل كينولارىن قازاقشالاۋ مارتەبەمىزدى اسىرا تۇسەرى انىق. دەسەك تە, ساپالى وتاندىق فيلمدەردىڭ ۇزدىك قاتارىن كوبەيتە تۇسسەك, باتىر دا, دانا دا, قايراتكەر دە وزىمىزدە جەتەرلىك.
قۇندىز ەرالى.