سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ارىپتەستەرىن مەرەكەمەن قۇتتىقتاپ, سۋ تاسقىنى كەزىندە كورسەتكەن كاسىبي قىزمەتتەرى ءۇشىن العىس ايتتى, دەپ جازادى Egemen.kz.
«سىزدەردىڭ جۇمىستارىڭىز كوپشىلىككە كورىنبەۋى مۇمكىن, سەبەبى ەلدى مەكەندەردەن شالعاي جەردە جۇمىس ىستەيسىزدەر. قۇتقارۋشىلار سەكىلدى ۇيلەرگە كىرىپ, قۇتقارمايسىزدار, پوليتسيا قىزمەتكەرلەرى سىندى كومەككە كەلمەيسىزدەر, دارىگەرلەر سەكىلدى مەديتسينالىق كومەك كورسەتپەيسىزدەر نەمەسە مۇعالىمدەر سىندى ساباق بەرمەيسىزدەر. سىزدەر ءار ءۇيدى, ءار كاسىپورىندى جانە ءبۇتىن ەلىمىزدى ەڭ قۇندى رەسۋرس – سۋمەن قامتاماسىز ەتۋ ءۇشىن اۋقىمدى, بىراق كورىنە بەرمەيتىن جۇمىستى اتقاراسىزدار. ارقايسىڭىزدىڭ ەڭبەكتەرىڭىز وراسان زور, ونى اسىرا باعالاۋ مۇمكىن ەمەس. سىزدەر سۋ قۇبىرلارىن سالىپ, كانالداردى تازالاپ, سۋ قويمالارىن كۇزەتىپ, كەزەكشىلىكتە بولىپ, وتباسىلارىڭىزدى سيرەك كورەسىزدەر. سىزدەردىڭ قاجىرلى ەڭبەكتەرىڭىز بولماسا اۋىل شارۋاشىلىعى, ەكونوميكا, ونەركاسىپ, كوممۋنالدىق جانە ت.ب. سالالاردىڭ ساپالى جۇمىسىن ەلەستەتۋ مۇمكىن ەمەس», دەپ جازدى مينيستر Facebook پاراقشاسىندا.
سونداي-اق مينيستر سۋ سالاسىنىڭ ماماندارىنا قولايلى جاعداي جاساۋ ءۇشىن جالاقىنى كوتەرۋ بويىنشا جۇمىس جۇرگىزىلىپ جاتقانىن ايتتى.
«جالاقى كەزەڭ-كەزەڭىمەن وسۋدە. 2024 جىلدىڭ 1 قاڭتارىنان ەڭبەكاقىسى تاريف ەسەبىنەن تولەنەتىن «قازسۋشار» ماماندارىنىڭ ايلىعى ورتا ەسەپپەن 23%-عا, ال, ەڭبەكاقىسى رەسپۋبليكالىق بيۋدجەتتەن تولەنەتىن قىزمەتكەرلەردىڭ ايلىقتارى 1 مامىردان باستاپ ورتا ەسەپپەن 25%-عا ارتتى.
ەلىمىزدە سۋدى ۇنەمدەۋگە جانە ونى قايتا پايدالانۋعا باعىتتالعان جاڭا نورماتيۆتىك-قۇقىقتىق بازانى قۇرۋ دا ماڭىزدى. ينفراقۇرىلىمدى اۋقىمدى جاڭعىرتۋ جانە سۋ ۇنەمدەيتىن وزىق تەحنولوگيالاردى ەنگىزۋ دە سىزدەردىڭ جۇمىستارىڭىزدى جەڭىلدەتەدى. ءبىز جاڭا سۋ كودەكسىن ازىرلەدىك. قۇجاتتىڭ جاڭا رەداكتسياسىندا سۋدى سارقىلۋدان, لاستانۋدان جانە بىتەلۋدەن قورعاۋعا باسىمدىق بەرىلەدى, ال رەسۋرستىڭ ءوزى ەندى تەك ەكونوميكالىق پايدا كوزى رەتىندە قاراستىرىلمايدى», دەپ قوستى ۆەدومستۆو باسشىسى.
بۇدان بولەك, مينيسترلىك وبلىس اكىمدىكتەرىمەن بىرلەسىپ 2030 جىلعا دەيىن سۋ قويمالارىن, گيدروتەحنيكالىق قۇرىلىستاردى, يرريگاتسيالىق جۇيەلەر مەن توپتىق سۋ قۇبىرلارىن سالۋ جانە رەكونسترۋكتسيالاۋ جونىندەگى كەشەندى جوسپار ازىرلەگەنىن تىلگە تيەك ەتتى. بۇل جوسپاردا 133 گيدروتەحنيكالىق قۇرىلىستى, 7700 شاقىرىمنان استام يرريگاتسيالىق جۇيەنى جانە 1200 شاقىرىم توپتىق سۋ قۇبىرىن قايتا جاڭارتۋ, سونداي-اق 3628 تىك درەناجدى ۇڭعىما بۇرعىلاۋ كوزدەلگەنىن اتاپ ءوتتى.
«بۇل ناتيجەلەرگە ءبىز سىزدەردىڭ قاجىرلى ەڭبەكتەرىڭىز بەن كاسىبي بىلىكتىلىكتەرىڭىزدىڭ ارقاسىندا قول جەتكىزدىك. بارلىقتارىڭىزعا زور دەنساۋلىق, باقىت, بەيبىت اسپان جانە جاقىندارىڭىزدىن اماندىعىن تىلەيمىن», دەدى مينيستر نۇرجان نۇرجىگىتوۆ.
قىرمىزى جۇماعاليقىزى,
ەۇۋ ستۋدەنتى