سەمەي كورەرمەندەرىن سەرپىلتتى

جاس ۇرپاقتىڭ دۇنيە تانىمىنا, جان دۇ­نيەسىنە, رۋحاني بول­­مىسىنىڭ قالىپتاسۋىنا اسەر ەتەتىن «اباي-توعجان» مۋ­زىكا­لىق دراماسىنا ۇلى ويشىل عۇ­­­مى­رىنىڭ بوزبالا شاعى ار­قاۋ بولدى. جاس ابايدىڭ جۇ­­رە­گىندە ويانعان العاشقى ماحاب­­باتى, كوكىرەگىندە تۋعان تۇڭ­­عىش جىرى اۋەزدى انگە اينالىپ, ىشكى سەزىم تەبىرەنىستەرىن الا­­سا­پىران كۇيگە سالاتىن سات­­تەر كورەرمەن تال­قىسىنا ءتۇستى.

كورنەكتى جازۋشى-دراماتۋرگ دۋلات يسابەكوۆتىڭ تىرناقالدى تۋىندىلارىنىڭ بىرىنە بالانعان «گاۋھارتاس» پوۆەسىنىڭ ساحنالىق نۇسقاسى – مۋزىكالىق دراما جانرىنداعى قويىلىم كوپشىلىككە ەرەكشە اسەر ەتكەندەي كورىندى. جەتپى­سىنشى جىلدارداعى اتا كاسىپ – شو­پاندىقپەن اينالىسىپ, قارا­پايىم عانا تىرشىلىك كەشكەن شاعىن وتباسىنىڭ شىنايى ءومىرى مەن كىسىلىك كەلبەتتەرى كەستەلەنگەن شى­عارما. مۋزىكالىق جاس كورەرمەن تەاترىنىڭ قوعام­مەن بايلانىس جانە اقپارات ءبولىمنىڭ باسشىسى ادىلعازى باقىت ۇلىنىڭ ايتۋىنشا ادەبي تۋىندى دا, وسىعان دەيىن ءانى مەن تەرەڭ مانىمەن تالاي جۇرەكتى تەربەگەن «گاۋھارتاس» پوۆەسى دە, كينوفيلم دە بار. الايدا جان سارايىنا مولدىرلىك پەن ىڭكارلىككە تۇنعان سالتانات, قاتۋلى تاستان, نازىك بولمىستى قايىركەن سياقتى درامالىق وبرازدار ارقىلى جاس­تار ءۇنىن, بۇگىنگىنىڭ ءسوزىن جەتكىزۋگە تىرىسقان.

سەمەي كورەرمەنى تاماشا­لاعان اتالعان تەاتردىڭ تاعى ءبىر قويى­لىمى «قوشتاسقىم كەل­مەيدى..» مۋزىكالىق دراماسى. بۇل كورنەكتى ورىس دراماتۋرگى ا.ءۆولوديننىڭ تەرەڭ پسي­حو­لو­گيزممەن ەرەكشەلەنەتىن پەساسى اجىراسۋعا بەل بۋعان سەگىز وت­باسىنىڭ تاعدىرىنا قۇرىلعان. تەاتردىڭ جاس بۋىن اكتەرلەرى سپەكتاكلدى ويناپ-شىعۋمەن بىرگە ءومىردىڭ قاراپايىم دا كۇردەلى جاقتارى حاقىنداعى ويلاردى ورتاعا سالدى.

قورجىندارىن «سىنشىلار جۇلدەسى-2023» «جىل اكتريساسى – 2023», «Umai» ۇلتتىق سىي­لىق­تا­رىمەن مايلاعان استانا قالا­سى­نىڭ مۋزىكالىق جاس كو­رەرمەن تەاترى وسىلاي اباي تۋعان مەكەننەن شابىتتانىپ ات­تاندى. وسىعان دەيىن باتىس قازاقستان وبلىسى مەن اقتوبە قا­لاسىندا ونەر ساپارىمەن بول­عان جاس اكتەرلەردىڭ الدىندا وسكە­مەن مەن شىمكەنتتەگى ويلى كورەرمەننىڭ كوڭىلىنەن شىعۋ ماق­ساتى تۇر.

اباي وبلىسى