اقتوبە وبلىسىندا ۇبت تاپسىرۋ 25 مامىردا باستالدى. سىناق تاپسىرۋدىڭ ەڭ سوڭعى كۇنى –12 شىلدە. وڭىردەگى 321 ورتا مەكتەپتىڭ 11-سىنىبىن 9 236 تۇلەك اياقتادى. وبلىستىق ءبىلىم باسقارماسىنىڭ حابارلاۋىنشا, نەگىزگى ۇبت-عا تىركەلۋ 6 مامىردا باستالىپ, وعان 8 342 تۇلەك (بارلىق مەكتەپ بىتىرۋشىلەردىڭ 90,2 %-ى) ەكى رەت تەست تاپسىرۋعا 16 556 ءوتىنىش بەرگەن. وتكەن جىلى مەكتەپ بىتىرگەندەر مەن كوللەدجدەردىڭ 994 تۇلەگى (تولىق وقۋ مەرزىمىنە) جانە قىسقارتىلعان وقۋ مەرزىمىنە تۇسەتىن 289 كوللەدج تۇلەگى ۇبت تاپسىرۋعا كىرىستى. جەكسەنبىنى ەسەپتەمەگەندە, 12 شىلدەگە دەيىن ءار اپتانىڭ التى كۇنىندە تەستىلەۋ وتەدى.
وڭىردە ەكى تەست وتكىزۋ پۋنكتى اشىلعان. ونىڭ ءبىرى – وبلىس ورتالىعىنداعى ەسەت باتىر كوشەسى, 107/2 مەكەنجايىندا, ەكىنشىسى شالقار قالاسىنداعى ءا.جانگەلدين كوشەسى, 89ا مەكەنجايىندا ورنالاسقان جەكەمەنشىك «Ustudy» تەست ورتالىقتارى. «Ustudy» تەست ورتالىعى اقتوبەدە 231, شالقار قالاسىنداعى ورتالىق 49 ورىنعا نەگىزدەلگەن. تەستىلەۋ ورتالىعىنىڭ ءدارىسحانالارى مەن دالىزدەرى بەينەباقىلاۋ جۇيەسىمەن جابدىقتالعان. اقتوبەدەگى ورتالىق ءبىر كۇندە ەكى لەكپەن 560 تۇلەكتى سىناققا كىرگىزىپ جاتىر. ۇلتتىق تەستىلەۋ ورتالىعى ماماندارىنىڭ توبى قازىر اقتوبەدە قىزۋ جۇمىسقا كىرىسكەن. ۇيىمداستىرۋشىلار تاڭەرتەڭگىلىك ۋاقىتتان باستاپ تەستىلەۋگە تىيىم سالىنعان زاتتاردى الىپ كىرمەس ءۇشىن مەتالل ىزدەگىشتەرمەن تەكسەرىپ كىرگىزىپ, سىناق بارىسىن بەينەكامەرالاردان باقىلايدى. ازىرشە زاڭبۇزۋشىلىق تىركەلگەن جوق. العاشقى ەڭ جوعارى ۇپاي جيناعان اقتوبەلىك وقۋشى تىركەلدى. ول قالاداعى م.قۇرمانعاليەۆا اتىنداعى №32 گيمنازيا تۇلەگى, «التىن بەلگىگە» ۇمىتكەر – ايشات ساعىناەۆا. ايشاتتىڭ جيناعان بالى – 137.
بيىل دا ۇبت-داعى ەڭ جوعارى بالل – 140. وعان قوسا سىناق تاپسىراتىن پاندەر سانى وزگەرىسسىز قالدى. «وقۋ ساۋاتتىلىعى» جانە «ماتەماتيكالىق ساۋاتتىلىق» پاندەرىنەن تاپسىرمالار سانى 5 سۇراققا قىسقارسا, كەرىسىنشە بەيىندى پاندەردەن سۇراق سانى 70-كە دەيىن ارتقان.
اقتوبە وبلىسى