مەملەكەت باسشىسى قاسىم-جومارت توقاەۆ ۇلتتىق قۇرىلتايدىڭ «ادال ادام – ادال ەڭبەك – ادال تابىس» اتتى ءۇشىنشى وتىرىسىندا سويلەگەن سوزىندە: «بالا ەسەيگەن سوڭ قاناتتانىپ, ۇيادان ۇشۋعا ءتيىس. باسقا ايماقتاردا, ءتىپتى, شەتەلدە ءبىلىم الۋى قاجەت. وزگە جۇرتتىڭ قالاي ءومىر ءسۇرىپ جاتقانىن كورگەنى ابزال. سونداي-اق قاي جەردە وزىنە جانە ەلىنە پايداسى تيسە, سول جەرگە بارىپ ەڭبەك ەتۋى كەرەك. وزىق دامىعان مەملەكەت قۇرۋ ءۇشىن ءبىزدىڭ ازاماتتارىمىز جاڭاشا ويلاي بىلۋگە جانە جاسامپازدىققا ۇمتىلۋى كەرەك. سول سەبەپتى ءبىز قوعامدا بىلىمپازدىقتى دارىپتەۋگە, ءبىلىم جانە عىلىم سالاسىن دامىتۋعا باسا ءمان بەرىپ كەلەمىز», دەپ اتاپ وتكەن ەدى.
وسى ماقساتقا سايكەس, «قازمۇنايگاز» ۇلتتىق كومپانياسىنىڭ تىكەلەي قارجىلاندىرۋىمەن جانە قولداۋىمەن جۇرگىزىلىپ كەلە جاتقان «جارقىن بولاشاق» باعدارلاماسى ەلدەگى ادامي كاپيتالدى دامىتۋدا مۋلتيپليكاتيۆتى ناتيجە كورسەتىپ كەلەدى. قازىرگى كەزدە باعدارلاما اياسىندا جاڭاوزەن قالاسى, ماڭعىستاۋ, تۇپقاراعان, قاراقيا اۋداندارىنان 674 بالا ەلىمىزدىڭ 11 وڭىرىندە ورنالاسقان 56 ءبىلىم ورداسىندا ءبىلىم الىپ جاتىر. سونىمەن بىرگە بيىل ماڭعىستاۋ وبلىسىنىڭ بەينەۋ, مۇنايلى اۋداندارىنىڭ جاستارى دا ءوتىنىش بەرىپ, باعدارلاما قاتىسۋشىسى بولا الادى.
بيىل 6 ماۋسىمعا دەيىن اتالعان وڭىردە ءبىلىم الىپ جۇرگەن ورتا مەكتەپ وقۋشىلارى مەن 18-22 جاستاعى جاستار zharqynbolashaq.kz سايتى ارقىلى ءوتىنىش بەرىپ, 2024–2025 وقۋ جىلىنا ارنالعان 600 وقۋ گرانتىنا قاتىسا الادى.
10-13 ماۋسىم ارالىعىندا اقتاۋ جانە جاڭاوزەن قالالارىندا ءبىلىم ۇيىمدارىنىڭ كورمەسىن وتكىزۋ جوسپارلانىپ وتىر. كورمەدە ەلىمىزدىڭ ەڭ الدىڭعى قاتارلى مەكتەپتەرى مەن كوللەدجدەرى وزدەرىنىڭ ەكونوميكالىق سۇرانىسقا يە ماماندىقتارى تۋرالى تولىق اقپارات ۇسىنادى. كورمە بارىسىندا جاستار ىرىكتەۋدەن ءوتىپ, گرانت يەگەرى اتانا الادى.
گرانت يەگەرلەرىنە جوبا ۇيلەستىرۋشىلەرى تولىعىمەن اقپاراتتىق, لوگيستيكالىق جانە پسيحولوگيالىق قولداۋ كورسەتىپ وتىرادى. ولارمەن ۇنەمى بايلانىستا بولىپ, باعىت-باعدار بەرەدى. گرانت يەگەرلەرىنىڭ وقۋ اقىسى تولەنىپ, جوعارىلاتىلعان شاكىرتاقى تاعايىندالادى. وقۋ دەمالىسىنداعى جول شىعىندارى بەلگىلى مولشەردە وتەلەدى.
قازىرگى تاڭدا باعدارلاما ۇيىمداستىرۋشىلارى ايماقتاردى ارالاپ, مەكتەپتەردەگى وقۋشىلارعا ءتۇسىندىرۋ جۇمىستارىن جۇرگىزىپ جاتىر. ايماقتاردىڭ ءبىلىم ءبولىمى باسشىلارى, مەكتەپ ديرەكتورلارى, كاسىبي باعدار بەرۋشىلەرمەن جۇزدەسىپ, باعدارلاما مۇمكىندىكتەرى تۋرالى تولىققاندى اقپاراتتار بەرىپ جاتىر.
وسىنداي مۇمكىندىكتەردى پايدالانا وتىرىپ جاستارىمىز ءوز بويىنداعى دارىنىن ۇشتاپ, ەلىمىزدىڭ جارقىن بولاشاعىنىڭ قالانۋىنا سەپتىگىن تيگىزەتىن بىلىكتى كادرلارعا اينالادى دەپ سەنىم بىلدىرەمىز.
ەرلان ايتمۇحامبەت,
«Bilim Foundation» قورىنىڭ جەتەكشىسى