كەشە ءماجىلىستىڭ جالپى وتىرىسىندا بىلتىر 27 قاراشادا استانادا قول قويىلعان قازاقستان مەن قىتاي ۇكىمەتتەرى اراسىنداعى تەڭ نەگىزدە مادەني ورتالىق اشۋ تۋرالى كەلىسىم راتيفيكاتسيالاندى. بۇل قادام ەكى ەل اراسىنداعى دوستىق قارىم-قاتىناستى نىعايتۋعا, مادەني-گۋمانيتارلىق سالاداعى ىنتىماقتاستىقتى دامىتۋعا باعىتتالعان.
كەلىسىم اياسىندا ەكى ەل استاناسى استانا مەن بەيجىڭدە مادەني ورتالىقتار اشىلادى. بۇل مەكەمەلەر ەكى مەملەكەت اككرەديتتەگەن, قابىلداۋشى تاراپتىڭ زاڭناماسى اياسىندا ارەكەت ەتەتىن, كوممەرتسيالىق ەمەس ۇيىمدار رەتىندە جۇمىس ىستەيدى.
مادەنيەت جانە اقپارات ءمينيسترى ايدا بالاەۆا مادەني ورتالىقتاردى اشۋ قازاقستان مەن قىتاي اراسىنداعى ءوزارا مادەني بايلانىسقا جاڭا سەرپىن بەرەتىنىن اتاپ ءوتتى. «25–27 اقپان كۇندەرى قىتايعا بارعان ساپارىمىزدا بولاشاق نىساننىڭ ورنالاساتىن جەرىمەن تانىستىق. بەيجىڭدە اۋدانى شامامەن 730 شارشى مەترگە دەيىن جەتەتىن ءبىزدىڭ مادەني ورتالىق «ارت-زونا 798» مەكەنجايىندا اشىلادى. عيماراتتىڭ 1-قاباتىندا قازاق حالقىنىڭ تاريحي-مادەني مۇراسىنىڭ ەلەمەنتتەرىن قامتيتىن مۇراجاي ەكسپوزيتسيا زالى بولادى. ەكىنشى قاباتتا كونفەرەنتس-زال, وقۋ زالى جانە كىتاپحانادان تۇراتىن كورمە الاڭى ورنالاسادى», دەدى مينيستر ءماجىلىستىڭ جالپى وتىرىسىندا.
بەيجىڭدەگى قازاقستان مادەني ورتالىعىنىڭ نەگىزگى قىزمەت باعىتتارىنا وقۋ زالى, كوۆوركينگ ايماعى, كەلۋشىلەرگە ارنالعان ۇلتتىق ەلەكتروندىق كىتاپحانا, وتاندىق باق, وقۋ ورىندارىنىڭ سايتتارى قولجەتىمدى بولادى. سونىمەن بىرگە قازاق ءتىلى كۋرستارىن وتكىزۋ, قازاقستان تاريحىنا قاتىستى تۇراقتى جانە جىلجىمالى كورمەلەر ۇيىمداستىرۋ, ۆيرتۋالدى مۇراجاي (3D-تۋرلار), كونفەرەنتسيالار, سەمينارلار, سيمپوزيۋمدار وتكىزۋ, قازاقستاننىڭ كوركەمدىك ۇجىمدارى مەن جەكەلەگەن ورىنداۋشىلارىنىڭ ونەر كورسەتۋىنە مۇمكىندىك تۋعىزۋ, قازاق فيلمدەرى كورسەتىلىمىن ۇيىمداستىرۋ دا قولعا الىنباق.
ەلىمىزدىڭ مادەنيەتىن ناسيحاتتاۋ جانە شەتەلدەگى تۋريستىك الەۋەتتى دامىتۋ دا بەيجىڭدەگى قازاقستان مادەني ورتالىعىنىڭ نەگىزگى قىزمەتىنە كىرەدى.