پاريجدەگى تەننيسشىلەردىڭ «رولان گارروس» ءتۋرنيرىنىڭ ءتورتىنشى اينالىمىندا قازاقستاننىڭ ءبىرىنشى جانە الەمنىڭ ءتورتىنشى راكەتكاسى ۋكراينانىڭ مىقتىسى ەلينا سۆيتولينامەن شەبەرلىك بايقاستى.
WTA تىزىمىندە 19-ساتىعا جايعاسقان سۆيتوليناعا سان سوقتىرۋ رىباكيناعا ەش قيىندىق تۋعىزعان جوق. وسىدان بىرەر جىل بۇرىن عانا US open (2019 جىلى) مەن ۋيمبلدوننىڭ (2019, 2023) جارتىلاي فينالىندا ويناپ, WTA تۋرنيرلەرىندە 18 مارتە توپ جارعان ايگىلى ۋكراينالىق ويىنشى جەرلەسىمىزگە جارىتىپ قارسىلىق تا كورسەتە المادى. نەبارى 1 ساعات 10 مينۋتكە سوزىلعان سايىس 6:4, 6:3 ەسەبىمەن اياقتالدى.
شيرەك فينالدا ەلەنا رىباكينا جاسمين پاولينيمەن كەزدەسەدى.
28 جاستاعى يتاليا تەننيسشىسى بۇل كۇندەرى ۇزدىكتەر رەيتينگىندە 15-ورىندى يەلەنگەن. بىلتىرعى «رولان گارروستا» ول ءدال وسى مەجەدە سۇرىنگەن ەدى. بيىل پاوليني اۋستراليالىق داريا ساۆيلل, امەريكالىق حەيلي باپتيست, كانادالىق بيانكا اندرەسكۋ جانە رەسەيلىك ەلينا اۆانيسياننان ايلاسىن اسىردى. بۇعان دەيىن ەكەۋى ءۇش مارتە كۇش سىناستى. ەكى رەتىندە ەلەنا باسىم تۇسسە, ءبىر رەت جاسمين جەڭىسكە جەتتى. سونداي-اق بيىلعى جىلدىڭ اقپان ايىندا ولار دۋبايداعى دودانىڭ شيرەك فينالىندا كەزدەسۋگە ءتيىس ەدى. الايدا دەنساۋلىعى سىر بەرۋىنە بايلانىستى وتانداسىمىز كورتقا شىقپادى.