پاريجگە كىم بارادى؟

سونىمەن, 7 ماۋسىمدا الماتىدا نۇرقانات سە­رىك­باەۆ, ەلدوس سمەتوۆ جانە ماعجان شامشادين تاتاميگە شى­عادى. ۇشەۋىنىڭ دە وليمپيادالىق رەيتينگتەگى ەسەبى تۇگەل. ۇزدىكتەر تىزىمىندە ولار مىناداي ورىندارعا جايعاستى: نۇرقانات – 15, ەلدوس – 22 جانە ماعجان – 24. وسى دزيۋدوشىلار اراسىنداعى ەڭ اتاقتىسى – سمەتوۆ. 31 جاستاعى جامبىل وبلىسىنىڭ تۋماسى ريو وليمپياداسىنىڭ كۇمىس, توكيو وليمپياداسىنىڭ قولا جۇلدەگەرى. الەم چەمپيوناتىندا ءۇش رەت جەڭىس تۇعىرىنا كوتەرىلىپ, ءبىر التىن مەن ەكى قولانى قانجىعاسىنا بايلادى. سونداي-اق ەلدوس – ازيا ويىندارىنىڭ جەڭىمپازى جانە قۇرلىق چەمپيونى.

27 جاستاعى ماعجان – جاستار ارا­سىنداعى الەم بىرىنشىلىگىنىڭ جە­ڭىمپازى. ول گراند-سلەم تۋرنير­لەرىندە 1 التىن, 1 كۇمىس جانە 2 قولا مەدالدى يەلەنىپ, گران-پري جارىسىندا دارا شىقتى. سىر بويىنىڭ ساڭلاعى بىلتىر جاراقات الۋىنا بايلانىستى التى ايدان اسا ەمدەلىپ, تاياۋدا قاتارعا قايتا قوسىلدى. ورالعان بەتتە دۋشانبەدەگى دودادا كۇمىس السا, استاناداعى سايىستا جەڭىلىس تاپتى. ال اتىراۋ وبلىسىندا دۇنيەگە كەلگەن نۇرقاناتتىڭ جاسى – 21-دە. كەزىندە ول جاسوسپىرىمدەر اراسىندا الەم جانە جاستار اراسىندا ازيا چەمپيونى اتاندى. بىلتىر عانا ەرەسەكتەر دۋىنا قوسىلعانىنا قاراماستان دارىندى دزيۋدوشى بىردەن ءتاۋىر ناتيجە كورسەتە باستادى. سەرىكباەۆتىڭ ەڭ ۇزدىك كورسەتكىشى – 2023 جىلى تاشكەنتتەگى تۋرنيردە كۇمىس جانە بيىل تبيليسيدەگى تارتىستا التىن مەدالدى ولجالاۋى. مىنە, وسى ءۇش سپورتشىمىز ءبىر-بىرىمەن كۇرەسىپ, سولاردىڭ اراسىنان ۇزدىك شىق­قانى پاريج وليمپياداسىندا ونەر كورسەتەدى.

وسىدان تۋرا 20 جىل بۇرىن ءدال وسىنداي جاعدايدىڭ كۋاسى بولعان ەدىك. 2004 جىلى افينادا وتكەن وليمپيا ويىن­دارى قارساڭىنداعى دزيۋدوشىلاردىڭ ىرىكتەۋ باسەكەلەرى كەزىندە 66 كگ سال­ماقتا ەرلان سىليامباەۆ, مۇراتبەك قىپ­­شاقباەۆ جانە ارسەن حاتيپ ءبىر-بىرىمەن ايىزدارى قانعانشا ايقاستى. بۇل تارتىس قىپشاقباەۆتىڭ پايداسىنا شەشىلدى. 73 كگ سالماق دارەجەسىندە ۇمىتكەر ەكەۋ ەدى. ولار – اسحات شاحاروۆ پەن ساعدات سادىقوۆ. قازاقتىڭ قوس ساڭلاعىنىڭ ايقاسى سادىقوۆتىڭ پايداسىنا شە­شىلدى. ءسويتىپ, مۇراتبەك پەن ساعدات ەجەل­گى ەللادا ەلىنە اتتاندى. مىنە, اراعا 20 جىل سالىپ, ءدال سونداي وقيعا قاي­تالانىپ وتىر.