زاماناۋي تەحنولوگيا ومىرىمىزگە دەندەپ ەنىپ جاتقان ۋاقىتتا جاس بۋىننىڭ بويىنا ۇلتتىق قۇندىلىقتاردى ءسىڭىرىپ ءوسىرۋدىڭ ماڭىزى زور. ۇلتتىق رۋحتان قايناپ شىققان تازا بۇلاقتىڭ قاشاندا بەرەرى مول, بەدەلى بيىك بولادى. وسى ماقساتتا استانا قالاسى سماعۇل سادۋاقاس ۇلى اتىنداعى №78 مەكتەپ-گيمنازيادا ەتنوارت «ميراس» لاگەرى اشىلدى. بۇل دەمالىس ورنىنىڭ ەرەكشەلىگى – مۇندا وقۋشىلار ادەت-عۇرىپتى, سالت-ءداستۇردى تەرەڭىرەك مەڭگەرىپ, ۇمىتىلىپ بارا جاتقان قولونەر بۇيىمدارىن ءوز قولدارىمەن جاساپ ۇيرەنەدى.
ەتنوارت «ميراس» لاگەرىنە 5–10 سىنىپ وقۋشىلارى قاتىسا الادى. مۇندا 25 وقۋشىدان ءۇش توپ قۇرىلعان. ايتا كەتەرلىگى, جازعى لاگەردە «اجەلەر» مەكتەبى دە جۇمىس ىستەيدى. ولار بالالارعا كەستە توقىپ, ۇرشىقپەن ءجىپ ءيىرۋدىڭ ادىستەرىن, سونداي-اق ۇلتتىق تاعام تۇرلەرىن قالاي ازىرلەنەتىنىن بۇگە-شىگەسىنە دەيىن كورسەتەدى.
ء«بىز اتا-بابامىزدان ميراس بولىپ كەلە جاتقان قولونەردى جەتكىنشەكتەرگە كورسەتىپ قانا قويماي, قالاي جاسالاتىنىن تولىق ۇيرەتەمىز. سونداي-اق ءار بۇيىمنىڭ تاريحىن, قالاي اتالۋىن, جاسالۋ جولدارىن تۇسىندىرەمىز. لاگەر اتاۋىنىڭ «ميراس» دەپ اتالۋى دا سول سەبەپتى. «جاستايىنان ۇيرەتسەڭ, تاسقا ويعان تاڭباداي, قارتايعاندا ۇيرەتسەڭ, سۋعا جازعان جازۋداي» دەگەن ءسوزدى ۇنەمى ايتىپ جۇرەمىن. بۇگىندە قالا وقۋشىلارى ۇلتتىق قولونەر بۇيىمدارىن كوپ بىلە بەرمەيدى. سوندىقتان بۇل جوبانىڭ وزەكتىلىگى جوعارى. بۇعان دالەل – قازىردىڭ وزىندە لاگەرگە باسقا ايماقتاردان قاتىسۋعا نيەت ءبىلدىرىپ جاتقان وقۋشىلاردىڭ قاراسى وتە كوپ», دەيدى №78 مەكتەپ-گيمنازيا كوركەم ەڭبەك ءپانىنىڭ مۇعالىمى, يدەيا اۆتورى ءلاززات اتىباي.
ماۋسىمنان جۇمىسىن باستاعان ەتنولاگەر شىلدەنىڭ سوڭىنا دەيىن ءتورت اۋىسىم بويى جۇمىس ىستەيدى. ال ءاربىر اۋىسىم ەكى اپتادان بولادى. ايتا كەتەيىك, اتالعان ەتنولاگەرگە باتىس ايماقتىڭ وقۋشىلارى دا ونلاين رەجىمىندە قاتىسا الادى.