23 ساۋىردە ماسكەۋدە پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆتىڭ قاتىسۋىمەن ەۋرازيالىق ەكونوميكالىق كوميسسيا كەڭەسىنىڭ كەزەكتى وتىرىسى ءوتتى, دەپ حابارلادى پرەمەر-ءمينيستردىڭ ءباسپاسوز قىزمەتى.
وتىرىسقا قاتىسۋشىلار ەۋرازيالىق ەكونوميكالىق وداقتىڭ ءتيىمدى قىزمەتىن جانە ودان ءارى دامۋىن قامتاماسىز ەتۋگە باعىتتالعان نەعۇرلىم كوكەيكەستى ماسەلەلەردى قاراپ, قورىتىندىسى بويىنشا ۇستىمىزدەگى جىلعى 8 مامىرعا جوسپارلانعان جوعارى ەۋرازيالىق ەكونوميكالىق كەڭەستىڭ مەملەكەت باسشىلارى دەڭگەيىندەگى وتىرىسىنىڭ كۇن ءتارتىبىن دايىندادى.
كەڭەس وتىرىسىنىڭ كۇن ءتارتىبىندەگى نەگىزگى ماسەلە قىرعىز رەسپۋبليكاسىنىڭ ەۋرازيالىق ەكونوميكالىق وداققا قوسىلۋ شارتى تۋرالى حاتتاما جوباسىن دايىنداۋ بولدى. ءوزارا ءتيىمدى شەشىمدەرگە قول جەتكىزىلىپ, ونىڭ قورىتىندىسى بويىنشا ءتيىستى حاتتامالار جوباسى الدا تۇرعان جوعارى كەڭەس وتىرىسىندا قول قويۋ ءۇشىن دايىندالدى. قىرعىز رەسپۋبليكاسىنىڭ ەاەو-عا قوسىلۋى شەڭبەرىندە جوعارى كەڭەس وتىرىسىندا قىرعىزدار تاراپىنان كوميسسياعا جاڭا القا مۇشەلەرىن قابىلداۋ جوسپارلانىپ وتىر.
ەەك كەڭەسىنىڭ وتىرىسى بارىسىندا قازاقستان تاراپىنان قىرعىزستاننىڭ ەاەو-عا قوسىلۋىنا جان-جاقتى قولداۋ كورسەتىلەتىنى اتاپ ءوتىلدى. ورتاق ەكونوميكالىق كەڭىستىكتى ۇلعايتۋدىڭ سىرتىندا ول ينتەگراتسيالىق بىرلەستىكتىڭ تارتىمدىلىعىن, ورتالىقازيالىق ءوڭىر مەن ەۋرازيالىق ەكونوميكالىق وداققا ءمۇشە مەملەكەتتەردىڭ تۇراقتى ەكونوميكالىق دامۋىن قامتاماسىز ەتەدى.
ەاەو-نىڭ ينتەگراتسيالىق الەۋەتىن جۇزەگە اسىرۋ جانە مۇشە مەملەكەتتەردىڭ باسەكەلەستىك ارتىقشىلىقتارىن دامىتۋ ماقساتىندا ەاەو ەلدەرىنىڭ بولاشاقتاعى ەكونوميكالىق دامۋىنىڭ نەگىزگى باعىتتارى تالقىلاندى. ول قازىرگى ەكونوميكالىق جاعدايلاردا ەاەو-عا مۇشە ءار مەملەكەتكە قوسىمشا ەكونوميكالىق تيىمدىلىك الۋ ءۇشىن جاڭا سەرپىن بەرەدى.
سول سياقتى ەاەو-عا مۇشە مەملەكەتتەردىڭ داعدارىسقا قارسى باعىتقا يە نەگىزگى ماكروەكونوميكالىق باعدارلارى دا تالقىلاندى. بۇل قۇجات الەمدىك ەكونوميكادا, سونداي-اق, ەاەو-عا مۇشە مەملەكەتتەر ەكونوميكالارىندا دا بايقالىپ وتىرعان داعدارىس كورىنىستەرىن ەسكەرە وتىرىپ قالىپتاستىرىلادى. ول ءمۇشە مەملەكەتتەردىڭ ماكروەكونوميكالىق تۇراقتىلىعىن قامتاماسىز ەتۋدى, ينتەگراتسيالىق ۇدەرىسكە قاتىسۋشى مەملەكەتتەردىڭ ەكونوميكالىق ءوسىمىن قالپىنا كەلتىرۋ ءۇشىن جاعدايلار جاساۋدى كوزدەيدى.
ەاەو-نىڭ ورتاق ەلەكتر-ەنەرگەتيكالىق رىنوگىن قالىپتاستىرۋ تۇجىرىمداماسى قولداۋ تاپتى. بۇل تۇجىرىمدامانى بەكىتۋ 2019 جىلى قۇرىلاتىن ەاەو-نىڭ ورتاق ەلەكتر-ەنەرگەتيكالىق رىنوگىن قۇرۋعا كىرىسۋ ءۇشىن جاعداي جاسايدى. ول بولاشاقتا مەملەكەتتەردىڭ ەلەكتر-ەنەرگەتيكالىق جۇيەسىنىڭ تۇراقتىلىعىن قامتاماسىز ەتپەك. قازاقستان ءۇشىن ول سونداي-اق, سالانىڭ ەكسپورتتىق الەۋەتىن جۇزەگە اسىرۋ مۇمكىندىگىن بەرەدى.
ەەك كەڭەسىنىڭ وتىرىسى شەڭبەرىندە بولاشاقتاعى نەگىزگى ماقساتى ەاەو-عا مۇشە مەملەكەتتەر تاسىمالداۋشىلارىنىڭ وداق ىشىندەگى قىزمەت كورسەتۋلەرگە قولجەتىمدىلىگىن جەڭىلدەتۋ بولىپ تابىلاتىن اۆتوموبيلمەن جۇك تاسىمالداۋدى ساتىلاپ بەيتاراپتاندىرۋ باعدارلاماسى قولداۋ تاپتى. ول بيزنەس ءۇشىن كولىك شىعىندارىن تومەندەتۋگە جاعداي جاسايدى. قازاقستان بۇل باعدارلاماعا 2025 جىلدان باستاپ قوسىلادى دەپ كۇتىلىپ وتىر.
بۇتىندەي العاندا, تالقىلاۋ قورىتىندىلارى ناتيجەسىندە ىقپالداستىقتىڭ شەشۋشى اسپەكتىلەرى بويىنشا ءوزارا ءتيىمدى ۋاعدالاستىقتارعا قول جەتكىزىلدى.