سەناتتىڭ اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ دەپۋتاتتارى عىلىم جانە جوعارى ءبىلىم مينيسترلىگىنىڭ باسشىلىعىمەن كەزدەسىپ, اگرارلىق عىلىمدى دامىتۋ جانە ونى جەتكىلىكتى قارجىلاندىرۋ ماسەلەسىن تالقىلادى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
كوميتەت توراعاسى ءالي بەكتاەۆ ءوز سوزىندە مەملەكەت باسشىسى جولداۋىندا اۋىل شارۋاشىلىعىن نىعايتۋ ماسەلەسىنە ەرەكشە نازار اۋدارىلعانىن اتاپ ءوتتى. سونداي-اق قازىرگى كەزدە اۋىل شارۋاشىلىعىنىڭ ودان ءارى ءوسىپ-وركەندەۋى جوعارى تەحنولوگيالىق عىلىمنىڭ قولداۋىنا مۇقتاج ەكەنى ايتىلدى. پرەزيدەنتتىڭ سونىمەن قاتار ۇلتتىق اگرارلىق عىلىمي-ءبىلىم بەرۋ ورتالىعىن اگروتەحنولوگيالىق حابقا اينالدىرۋ مىندەتىن قويعانى اتالدى.
«اتالعان ورتالىقتى تولىققاندى ترانسفورماتسيالاۋ جانە ونى زەرتتەۋ ءىسىنىڭ بارلىق كەزەڭى قامتىلاتىن اگروتەحنولوگيالىق حابقا اينالدىرۋ ءۇشىن زاڭنامالىق وزگەرىستەر قاجەت. ورتالىقتىڭ نەگىزگى مىندەتىنىڭ ءبىرى – ەلىمىزدىڭ اگروونەركاسىپ كەشەنىنىڭ يننوۆاتسيالىق دامۋىن قولداۋ جانە ونىڭ عىلىمي نەگىزدەمەسىن جاساۋ بولىپ تابىلادى. سوندىقتان بۇل ورتالىق پەن عىلىمي ۇيىمداردىڭ جاعدايىن ەلەمەۋگە بولمايدى», دەدى ءالي بەكتاەۆ.
«ۇلتتىق اگرارلىق عىلىمي-ءبىلىم بەرۋ ورتالىعى» كەاق وكىلى ءوز كەزەگىندە اگرارلىق عىلىمدى قارجىلاندىرۋ ماسەلەسى تۋرالى سەناتورلارعا ايتىپ بەردى. ۇاعبو اگروونەركاسىپ كەشەنىن دامىتۋدىڭ مەملەكەتتىك ساياساتىن ىسكە اسىرۋ جونىندەگى 230-دان استام فۋنكتسيانى ورىنداپ كەلەدى. الايدا, ول ەنشىلەس ۇيىمداردىڭ ديۆيدەندتەرى ەسەبىنەن قارجىلاندىرىلادى, دەگەنمەن بۇل احۋال ۇاعبو-نىڭ ۇزاق مەرزىمدى دامۋىنا جەتكىلىكسىز ءارى تۇراقسىز بولىپ تابىلادى جانە قارجى جاعدايىن قيىنداتادى. ەگەر شۇعىل تۇردە الدىن الۋ شارالارى قابىلدانباسا, وندا ورتالىققا ۇاعبو قۇرىلىمىن وڭتايلاندىرۋ جونىندە شارالار قابىلداۋعا تۋرا كەلەدى جانە ونىڭ سالدارى الەۋمەتتىك ءدۇمپۋ تۋعىزۋعا جانە مەملەكەت باسشىسى تاپسىرماسىنىڭ ورىنداۋ مەرزىمىنىڭ كەشىگۋىنە اكەپ سوقتىرادى.
شاراعا سونىمەن قاتار اۋىل شارۋاشىلىعى جانە قارجى مينيسترلىكتەرىنىڭ وكىلدەرى قاتىستى.