بالالاردى قورعاۋ كۇنى اياسىندا مادەنيەت جانە اقپارات مينيسترلىگى 249 بالالار كىتاپحاناسى اراسىندا وقىرماندار سۇرانىسىنا تالداۋ جۇرگىزدى. بيىل جاس وقىرماندار سانى 1 733 686 ادامعا جەتكەن.
ساۋالناما ناتيجەسى بويىنشا بالالاردىڭ كىتاپحانالارعا دەگەن قىزىعۋشىلىعى ارتىپ كەلەدى. ولار اسىرەسە فانتاستيكا, كوميكستەر مەن كوركەم ادەبيەت وقىعاندى ۇناتادى.
ەڭ كوپ وقىلاتىن بەردىبەك سوقپاقباەۆتىڭ «بالالىق شاققا ساياحات», «مەنىڭ اتىم قوجا», سايىن مۇراتبەكوۆتىڭ «جابايلى الما», جوان ءروۋليڭنىڭ ء«حارري پوتتەر», مارك تۆەننىڭ «توم سويەر» شىعارمالارى بولدى.
ودان بولەك بايانعالي ءالىمجانوۆ, تولىمبەك ءابدىرايىم, زيرا ناۋرىزباەۆا, سەرىكبول حاسان, زاۋرە تورەحان, باسقا دا اۆتورلاردىڭ تۋىندىلارىن جەتكىنشەكتەر قىزىعۋشىلىقپەن وقىعان.
بالالار ءسۇيىپ وقيتىن باسىلىمنىڭ ءبىرى – كوميكستەر. جاس وقىرماندار ۇلاربەك نۇرعالىم ۇلىنىڭ ء«ىلياس پەن زاڭعاردىڭ پلانشەتى», ورازحان جاقىپتىڭ «ەركەتاي», ءىلياس يۋسۋفتىڭ «كەرەي مەن جانىبەك» شىعارمالارىن, سونداي-اق مايك ءبارفيلدتىڭ «كوميكستەگى الەم تاريحى», «كوميكستەگى جاراتىلىستانۋ» اۋدارماسىن ۇناتادى.
ەرتەگىلەرگە كەلسەك, «قازاق جانە الەم حالقىنىڭ ەرتەگىلەرى», «اۆتورلىق ەرتەگىلەر», «الاتاۋ ەرتەگىلەرى» «تاڭداۋلى ەرتەگىلەر», چارلز پەررو مەن اعايىندى گريممدەردىڭ ەرتەگىلەرى كوپ سۇرالادى ەكەن.
ال بالا وقىرمانى كوپ وڭىرلەردىڭ كوش باسىندا تۇركىستان وبلىسى تۇر. اتالعان وڭىردە 248 299 وقىرمان (14,3 پايىز) بار. جامبىل وبلىسىندا 110 598 (6,4 پايىز), قاراعاندى وبلىسىندا 105 259 (6,1 پايىز) وقىرمان كىتاپ وقيدى.
ايتا كەتەيىك, ەلىمىزدەگى بالالار كىتاپحانالارىنىڭ قىزمەتى بالانى تاربيەلەۋگە, ءبىلىم بەرۋگە, اقپاراتتاندىرۋعا, تۇلعالىق دامىتۋعا باعىتتالعان.