تاي ەلىنە اتتانعان قازاقستاننىڭ جەتى بوكسشىسىنىڭ تورتەۋى جارىستى مەرزىمىنەن بۇرىن اياقتاپ, وليمپيا ويىندارىنىڭ ليتسەنزياسىنان ايىرىلعانى تۋرالى بۇعان دەيىن بايانداعانبىز. سودان ءۇش جەرلەسىمىزدىڭ جولىنا ۇمىتپەن قارادىق.
سەنبى كۇنى 75 كگ سالماقتاعى ۆالەنتينا حالزوۆا 1/8 فينالدا موڭعوليالىق ەردەنتۋيا ەنكحبااتارمەن كەزدەستى. بۇل باسەكە جەرلەسىمىزدىڭ جەڭىسىمەن اياقتالدى. ەكىنشى راۋندتا ول قارسىلاسىن نوكداۋنعا جىبەردى. 50 كگ سالماق دارەجەسىندە باق سىناعان نازىم قىزايباي ءدال سول مەجەدە ۇلىبريتانيالىق ساۆاننا سابليمەن كۇش سىناستى. ول دا حالزوۆادان قالىسپاي, تۇماندى البيون ەلىنىڭ وكىلىن ءۇشىنشى راۋندتا ەسەڭگىرەتتى. مۇحامەدسابىر بازارباي ۇلى مەن كۋبالىق ەريسلاندي الۆارەستىڭ اراسىنداعى شيرەك فينالدىق ايقاستى تورەشىلەر بۇرا تارتىپ, جەڭىستى بوستاندىق ارالىنىڭ بىلعارى قولعاپ شەبەرىنە بەرگەن ەدى. دەسەك تە قانداسىمىز جولداماعا تالاسۋ مۇمكىندىگىن ساقتاپ قالدى. سەبەبى سول مەجەدە جەڭىلىس تاپقان جامپوزدار ءوزارا جۇدىرىقتاسىپ, 63,5 كگ سالماق دارەجەسىندەگى سوڭعى ليتسەنزيانى ساراپقا سالدى. العاشىندا ول كولۋمبيالىق حوسە ۆيافارامەن جۇدىرىقتاستى. وتە شيەلەنىستى وتكەن جەكپە-جەكتىڭ ءبىرىنشى كەزەڭىندە مۇحامەدسابىر باسىم بولدى. ەكىنشىسىندە حوسەنىڭ باعى جاندى. ءۇشىنشى راۋندتا جاراقات العانىنا قاراماستان, قازاق بوكسشىسى جەڭىستى قارسىلاسىنان ج ۇلىپ اكەتتى.
جەكسەنبىدە شەشۋشى سايىستار ءوتتى. العاشقى بولىپ رينگكە ۆالەنتينا حالزوۆا شىقتى. ول كولۋمبيالىق شيرلەيديس وروسكودان باسىم ءتۇستى. كەشكى باعدارلامادا نازىم قىزايباي مەن سۋ حيان كانمەن قولعاپ ءتۇيىستىردى. ءبىرىنشى راۋندتى سولتۇستىك كورەيانىڭ وكىلى ءوز پايداسىنا شەشتى. ەكىنشىسىندە قانداسىمىزدىڭ مىسى باسىم بولدى. شەشۋشى كەزەڭدە نامىسقا تىرىسقان قىزايباي كاندى ءبىر مارتە ەسەڭگىرەتىپ, جەڭىس تويىن تويلادى. ودان كەيىن كەزەك مۇحامەدسابىر بازارباي ۇلىنا كەلدى. ءبىزدىڭ جىگىت مولدوۆالىق الەكساندرۋ پاراسكيۆادان باسىم ءتۇستى. بارلىق تورەشى مۇحامەدسابىردىڭ مىقتىلىعىن مويىندادى.
ءسويتىپ, قازاقستاننىڭ ەرلەر قۇراماسى وليمپيا ويىندارىندا تولىق قۇرامدا ونەر كورسەتەدى. مۇحامەدسابىر بازارباي ۇلىنا (63,5 كگ) دەيىن ونداي قۇرمەتكە ساكەن بيبوسىنوۆ (51 كگ), ماحمۇد سابىرحان (57 كگ), اسلانبەك شىمبەرگەنوۆ (71 كگ), نۇربەك ورالباي (80 كگ), ايبەك ورالباي (92 كگ), قامشىبەك قوڭقاباەۆ (+92 كگ) بولەنگەن ەدى. سونداي-اق پاريجگە باراتىنداردىڭ تىزىمىنە ءۇش بۇرىمدىمىز قوسىلدى. ولار – نازىم قىزايباي (50 كگ), كارينا يبراگيموۆا (57 كگ) جانە ۆالەنتينا حالزوۆا (75 كگ). ال بارلىق سپورت تۇرلەرى بويىنشا بۇگىنگى كۇنى جەرلەستەرىمىزدىڭ جەڭىپ العان جولدامالار سانى 58-گە جەتتى.