كەشە قازاقستان رەسپۋبليكاسى ورتالىق سايلاۋ كوميسسياسىنىڭ توراعاسى ق.تۇرعانقۇلوۆ وزبەكستان رەسپۋبليكاسى ورتالىق سايلاۋ كوميسسياسىنىڭ توراعاسى م.ابدۋسالوموۆپەن كەزدەستى.
كەزدەسۋگە وزبەكستان رەسپۋبليكاسى ولي ماجليس زاڭ شىعارۋ پالاتاسى حالىقارالىق ىستەر جانە پارلامەنتارالىق بايلانىس جونىندەگى كوميتەتىنىڭ مۇشەسى ا.كاديروۆ, قازاقستان رەسپۋبليكاسى ورتالىق سايلاۋ كوميسسياسىنىڭ مۇشەلەرى م.سارسەمباەۆ, ت.وحلوپكوۆا, سونداي-اق, وزبەكستان رەسپۋبليكاسى ورتالىق سايلاۋ كوميسسياسىنىڭ ۇيىمداستىرۋ-ادىستەمەلىك ءبولىمىنىڭ باسشىسى ح.ابدۋراحمانوۆ قاتىستى.
وزبەكستان ورتسايلاۋكومىنىڭ باسشىسى سويلەگەن سوزىندە ارىپتەستەرىنە قازاقستانداعى پرەزيدەنتتىك سايلاۋدى ترانسپارەنتتىك جانە پليۋراليزمنىڭ دەموكراتيالىق قاعيداتتارىنا سايكەس جوعارى ۇيىمداستىرۋشىلىق دەڭگەيدە وتكىزۋدە تابىس تىلەدى.
ق.تۇرعانقۇلوۆ دەلەگاتسيا مۇشەلەرىن قازاقستان رەسپۋبليكاسى ورتالىق سايلاۋ كوميسسياسىنىڭ پرەزيدەنتتىك سايلاۋدى ازىرلەۋ مەن وتكىزۋ جونىندەگى قىزمەتىمەن تانىستىرىپ, اعىمداعى سايلاۋ ناۋقانىنىڭ ەرەكشەلىكتەرى تۋرالى ايتىپ بەردى.
«سايلاۋ ناۋقانىنىڭ ءۇش ۇلكەن كەزەڭى اياقتالدى, ءبىز اتقارۋشى ورگاندارمەن ءبىرگە سايلاۋشىلار تىزىمدەرىن ناقتىلاۋ بولىگىندە ۇلكەن جۇمىس جاسادىق, بۇل تۋرالى رەسپۋبليكا بويىنشا 1 قاڭتاردان باستاپ سايلاۋشىلار سانىنىڭ 213 مىڭنان استام ادامعا وسكەنى كۋالاندىرادى. ءار ازامات ءوزىنىڭ كونستيتۋتسيالىق سايلاۋ قۇقىعىن كەدەرگىسىز ىسكە اسىرا الۋى ءۇشىن قاجەتتى بارلىق شارالار قولدانىلدى. دايىندىق كۇنتىزبەلىك جوسپارعا سايكەس, سايلاۋ زاڭناماسىنىڭ نورمالارىن بۇزۋسىز وتۋدە. بۇگىنگى كۇنگە ازاماتتاردىڭ 94 ءوتىنىشى كەلىپ ءتۇستى, ولاردىڭ 47-ءسى تىكەلەي ەلەكتوراتتىق تاقىرىپقا قاتىستى», – دەپ اتاپ ءوتتى ول.
كەزدەسۋ سوڭىندا ەكى ەلدىڭ ورتالىق سايلاۋ كوميسسيالارىنىڭ باسشىلارى سايلاۋ ءتاجىريبەسىن جانە سايلاۋ زاڭناماسىن جەتىلدىرۋ سالاسىندا ودان ارعى ىنتىماقتاستىقتىڭ جانە تاجىريبە الماسۋدىڭ جالعاساتىنىنا سەنىم ءبىلدىردى.
* * *
قازاقستان رەسپۋبليكاسى ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ ۋكراينا ورتالىق سايلاۋ كوميسسياسىنىڭ ءتوراعاسى ميحايل وحەندوۆسكيمەن كەزدەستى.
كەزدەسۋگە قازاقستان رەسپۋبليكاسى ورتالىق سايلاۋ كوميسسياسىنىڭ مۇشەسى ت.وحلوپكوۆا, سونداي-اق, ۋكراينا ورتالىق سايلاۋ كوميسسياسى ءتوراعاسىنىڭ كەڭەسشىسى ۆ.پيروجەنكو قاتىستى.
ورتسايلاۋكوم باسشىسى دەلەگاتسيا مۇشەلەرىن ورتالىق سايلاۋ كوميسسياسىنىڭ پرەزيدەنتتىك سايلاۋدى ازىرلەۋ مەن وتكىزۋ جونىندەگى قىزمەتىمەن تانىستىرىپ, سايلاۋ ناۋقانىنىڭ ەرەكشەلىكتەرى, داۋىس بەرۋ كۇنىنە دايىندىق بارىسى تۋرالى ايتىپ بەردى.
«بۇگىن 24.00 ساعاتتا كانديداتتاردىڭ ۇگىت ناۋقانى اياقتالادى. ول بەلسەندى, زاڭ بۇزۋشىلىقتارسىز ءوتىپ جاتىر. 25 ساۋىردە سايلاۋشىلار سىرتتان ىقپالسىز ءوزىنىڭ الداعى تاڭداۋىن ءبىرجولا پايىمداپ, ولاردىڭ ىشىندەگى وسى ۋاقىتتا ءوزىنىڭ مەكەنجايىن وزگەرتەتىندەردىڭ 18.00 ساعاتقا دەيىن داۋىس بەرۋ قۇقىعىن بەرەتىن ەسەپتەن شىعارۋ كۋالىگىن الۋعا مۇمكىندىك بەرەتىن «تىنىشتىق كۇنى» باستالادى», – دەدى ق.تۇرعانقۇلوۆ.
ۋكراينا ورتالىق سايلاۋ كوميسسياسىنىڭ توراعاسى رەسپۋبليكاداعى شەشۋشى كۇن قارساڭىنداعى سايلاۋ ۇيىمداستىرۋشىلاردىڭ سايلاۋ ناۋقانىنا جاقسى دايىندالعانىن كۋالاندىراتىن بىرقالىپتى جاعدايدى اتاپ ءوتتى, سونداي-اق, بايقاۋشى رەتىندە شاقىرۋعا العىسىن ءبىلدىرىپ, داۋىس بەرۋ كۇنى يگىلىكتى جۇمىس احۋالىن تىلەدى.
ءاليسۇلتان قۇلانباي,
«ەگەمەن قازاقستان».