حالىقارالىق بالالاردى قورعاۋ كۇنىنە وراي ەل استاناسىندا رەسپۋبليكالىق العاشقى «Aiala» ارت-ەكوفەستيۆالىنىڭ اشىلۋ سالتاناتى ءوتتى. فەستيۆال ەلىمىزدىڭ تۇكپىر-تۇكپىرىنەن كەلگەن وقۋشىلارعا ونەر ارقىلى قورشاعان ورتاعا قامقورلىق كورسەتۋگە مۇمكىندىك بەرەدى.
وڭىرلەردەن 36 ادام ىرىكتەلىپ, اقتىق سىنعا جولداما الدى. «بەينەلەۋ ونەرى», «پەرفومانس», «ۆيدەو ءتۇسىرۋ» «ساندىك-قولدانبالى ونەر», «مۋزىكا جانە پوەزيا», «ارت-پەرفومانس» اتالىمدارى بويىنشا التى جەڭىمپاز 1 ميلليون تەڭگەلىك سەرتيفيكات يەگەرى اتاندى. اتاپ ايتساق, ايبولات نۇرىللاەۆ, نۇرجىگىت ناۋحانباەۆ, انەليا ساتىبالديەۆا, رەگينا زەمليحانوۆا, ايانا راقىمجانوۆا, ارمان لاتىپاەۆ جۇزدەن جۇيرىك شىقتى.
ء«ىس-شارانىڭ نەگىزگى ماقساتى – ەكولوگيالىق قۇندىلىقتار قالىپتاستىرۋ, بالالاردى ەكولوگيالىق تۇرعىدان تاربيەلەۋ. «Aiala» ەكوفەستيۆالى مەملەكەت باسشىسىنىڭ تاپسىرماسى بويىنشا وتكىزىلدى. بۇگىن – بالالاردى قورعاۋ كۇنى. بۇل تاماشا ءىس-شارا ەكولوگيا سالاسىندا جۇمىس ىستەيتىن بارلىق ءىرى ۇكىمەتتىك ەمەس ۇيىمداردى جانە ولار كونكۋرسقا قاتىسقان شىعارماشىل بالالاردىڭ باسىن قوستى. اتالعان باستاما الداعى جىلداردا دا جالعاسىن تابادى دەپ ۇمىتتەنەمىز. بۇل – بالالارعا ەكولوگيالىق تاربيە بەرۋگە مۇمكىندىك بەرەتىن قادام», دەدى مادەنيەت جانە اقپارات ۆيتسە-ءمينيسترى ەۆگەني كوچەتوۆ.
ايتا كەتەيىك, ەلىمىزدە بۇل جوبا العاش رەت كرەاتيۆتى يندۋستريا, بالالار مەن ەكولوگيانى توعىستىرعان ورتاق الاڭعا اينالىپ وتىر.
ء«بىر اي بويى ءبىز ەلىمىزدىڭ تۇكپىر-تۇكپىرىنەن شىعارماشىل دارىندى بالالار اراسىندا كونكۋرس وتكىزدىك. ەكولوگيا تاقىرىبى بويىنشا 250-دەن استام ءوتىنىم قارالدى. ءبىز جاستارعا شىعارماشىلىق ارقىلى قورشاعان ورتاعا قامقورلىق جاساپ, ءوز سەزىمدەرىن بىلدىرۋگە مۇمكىندىك بەرۋ وتە ماڭىزدى دەپ سانايمىز», دەدى ليما دياس.
فەستيۆالعا كەلۋشىلەر سۋرەتشىلەردىڭ قولىنان شىققان «5 ەلەمەنت» ينستاللياتسياسىمەن تانىستى. وندا اۋا, سۋ, وت, جەر ەلەمەنتتەرى ءبىر شەڭبەرگە بىرىكتىرىلگەن. ورتاداعى اينادان جاسالعان جۇرەك ادامنىڭ وزىنە ءارى اينالاسىنداعىلارعا دەگەن سۇيىسپەنشىلىكتى بىلدىرەدى. تۋىندى تابيعات پەن ادامنىڭ تۇتاستىعى مەن ۇيلەسىمدىلىگىنىڭ رامىزىندەي. وسىلايشا, اۆتورلار كوپشىلىكتى تابيعاتتى ايالاۋعا شاقىرىپ, ەلىمىزدىڭ ەكولوگيالىق پروبلەمالارىنا نازار اۋدارعىسى كەلدى.
سونداي-اق فەستيۆال اياسىندا كيىز باسۋ, كەسكىندەمە, قارجىلىق ساۋاتتىلىق جانە ماكۋلاتۋرادان پاننو جاساۋ بويىنشا شەبەرلىك سىنىپتارى ءوتتى.
ايتا كەتەيىك, «Aiala» ارت-ەكوفەستيۆالىن مادەنيەت جانە اقپارات مينيسترلىگى مەن «ازاماتتىق باستامالاردى قولداۋ ورتالىعى» كەاق ۇيىمداستىرىپ وتىر. ءىس-شاراعا «حالىق» قايىرىمدىلىق قورى دەمەۋشىلىك كورسەتكەن.