ءار سپورتشىنىڭ اسقاق ارمانى جانە باستى ماقساتى – وليمپيا ويىندارى مەن الەم چەمپيوناتتارى سەكىلدى ءدۇبىرلى دودالاردا ءوز ەلىنىڭ ءانۇرانىن شىرقاپ, تۋىن كوكتە جەلبىرەتۋ. مەملەكەتتىك رامىزدەر كۇنى وسى جاعدايعا بايلانىستى وتانداستارىمىزدىڭ ايتقان اسەرلى سوزدەرىن جادىمىزدا تاعى جاڭعىرتۋدى ءجون كورىپ وتىرمىز.
ءابيبا ابۋجاقىنوۆا,
دزيۋدودان الەم چەمپيوناتىنىڭ ەكى دۇركىن قولا جۇلدەگەرى:
– وزبەكستاندا تۋىپ-ءوستىم. 11 جاسىمنان دزيۋدومەن اينالىستىم. سول جاقتا جۇرگەندە دە اتاجۇرتقا قونىس اۋدارىپ, ءدۇبىرلى دودالاردا ءوز ەلىمنىڭ نامىسىن قورعاۋدى ارماندادىم. مەكتەپتە وقىپ جۇرگەن كەزىمدە جالعىز ءوزىم الماتىعا كەلدىم. ەلىشىلىك دودالاردا مىقتىلىعىمدى مويىنداتىپ, ۇلتتىق كومانداعا قابىلداندىم. ودان كەيىن حالىقارالىق جارىستارعا قاتىسا باستادىم. قول جەتكىزگەن تابىسىم از بولعان جوق. بيىك بەلەستىڭ ءبىرازىن باعىندىردىم. ال 2022 جىلى تاشكەنتتە وتكەن الەم چەمپيوناتىندا قولا مەدال يەلەنىپ, قازاقتىڭ كوك بايراعىن كوكتە جەلبىرەتكەنىمدە, قۋانىشىمدا شەك بولمادى. ويتكەنى سول كۇنگە دەيىن اتالعان جارىستا جەڭىس تۇعىرىنا كوتەرىلگەن بىردە-ءبىر قازاق قىزى بولماعان. سونداي باقتىڭ ماعان بۇيىرعانىنا قاتتى قۋاندىم. ودان كەيىن اتالعان جارىستا تاعى ءبىر رەت جۇلدە الدىم. ازيا ويىندارى مەن قۇرلىق چەمپيوناتتارىندا دا تابىسقا جەتتىم. مىنە, ەندى وليمپيا ويىندارىنا بارامىن. بۇيىرتسا, پاريجدەگى دودادا دا ونەرىممەن قازاق ەلىن قۋانتامىن دەگەن ويدامىن.
ەلەنا رىباكينا,
تەننيستەن «ۋيمبلدون» ءتۋرنيرىنىڭ جەڭىمپازى, الەمنىڭ ءتورتىنشى راكەتكاسى:
– ماسكەۋدە دۇنيەگە كەلىپ, سپورتتىق كارەرامدى رەسەيدىڭ استاناسىندا باستاعانىممەن, 2018 جىلدان بەرى 19 جاسىمنان قازاقستاننىڭ تۋى استىندا ونەر كورسەتىپ كەلەمىن. وسىنداي قادامعا بارعانىما ەش وكىنبەيمىن. سپورتشى رەتىندە وسۋىمە قازاقستان بارلىق جاعداي جاسادى. ماعان سەندى, ءۇمىت ارتتى. جەرگىلىكتى جانكۇيەرلەر جىلى قارسى الدى. وسىدان ارتىق نە كەرەك؟ سول سەنىمنىڭ, قامقورلىق پەن قولداۋدىڭ ارقاسىندا كورسەتكىشىم دە ۋاقىت وزعان سايىن جاقسارا ءتۇستى. قىسقا عانا مەرزىم ارالىعىندا «ۋيمبلدوندى» ۇتتىم, اۋستراليانىڭ اشىق بىرىنشىلىگىنىڭ فينالىندا وينادىم, WTA تۋرنيرلەرىندە سەگىز رەت توپ جارىپ, قازىرگى كەزدە الەمنىڭ ءتورتىنشى راكەتكاسى اتانىپ وتىرمىن. ەگەر وسى جەڭىستەرىم قازاقستان جاستارىنىڭ تەننيسكە دەگەن قىزىعۋشىلىعىن وياتىپ, كورتتا ونەر كورسەتىپ جۇرگەن جاس ورەندەردىڭ جەڭىسكە دەگەن جىگەرىن ارتتىرسا, مەن ءۇشىن ءۇشىن باستى جەڭىس وسى!
ناريمان قۇربانوۆ,
سپورتتىق گيمناستيكادان ازيا ويىندارىنىڭ جۇلدەگەرى, الەم كۋبوگى مەن قۇرلىق چەمپيوناتتارىنىڭ بىرنەشە دۇركىن جەڭىمپازى:
– ءار جارىس سايىن ەلىمىزدىڭ ءانۇرانى شىرقالىپ, تۋى كوكتە جەلبىرەگەندە, جەر-جاھان جۇرتشىلىعى وسى كورىنىستى ورىندارىنان تىك تۇرىپ تاماشالاپ, سىرتتاي سۇيسىنەدى. ال اقش, قىتاي, رەسەي, ۇلىبريتانيا, جاپونيا, فرانتسيا, يتاليا, يسپانيا, وڭتۇستىك كورەيا, تۇركيا, تاعى باسقا الپاۋىتتاردان بايراعىمىز جوعارى تۇرسا, ولار بىزگە قىزىعا دا قىزعانا قارايدى. ونداي ساتتەردە كەۋدەمىزدى ماقتانىش سەزىمى كەرنەيدى. ەرەكشە كۇي كەشەمىز. ماقتانامىز, شاتتانامىز, جەڭىسكە دەگەن قۇشتارلىعىمىز ارتا تۇسەدى. تىپتەن باقىتتان باسىمىز اينالادى دەسەك تە بولادى. ءوزىم دە وتاندىق سپورتتىڭ ابىرويىن اسقاقتاتىپ, مارتەبەسىن كوتەرۋگە ءبىر ادامداي-اق ەڭبەك ءسىڭىرىپ ءجۇرمىن. ەلىمىز سپورتشىلارىنىڭ سول جەڭىستى جولى ۇزاعىنان بولاتىنىنا سەنىمىز زور.