كەشە اقوردادا پرەزيدەنتتىڭ كومەكشىسى – قاۋىپسىزدىك كەڭەسىنىڭ حاتشىسى نۇرلان ەرمەكباەۆتىڭ توراعالىعىمەن «قازاقستان رەسپۋبليكاسىنداعى ەكولوگيالىق قاۋىپسىزدىك» تاقىرىبىندا قاۋىپسىزدىك كەڭەسى جانىنداعى ساراپتامالىق كەڭەستىڭ وتىرىسى ءوتتى.
وتىرىسقا قازاقستاندىق بەيىندى عىلىمي-زەرتتەۋ ينستيتۋتتاردىڭ جەتەكشىلەرى مەن ۇكىمەتتىك ەمەس ۇيىمداردىڭ ساراپشىلارى قاتىستى.
ن.ەرمەكباەۆ قازاقستاننىڭ تۇراقتى دامۋى مەن قورشاعان ورتانى قورعاۋ ماسەلەسىنە مەملەكەت باسشىسى ەرەكشە نازار اۋدارىپ وتىرعاندىعىن اتاپ ءوتتى. قازىرگى ۋاقىتتا ەلىمىزدەگى ەكولوگيالىق جاعدايدى جاقسارتۋ ناقتى شەشىمدەردى قابىلداۋدى قاجەت ەتەدى جانە وسى سالادا ازاماتتاردى ۇنەمى قاۋىپ-قاتەرلەر تۋرالى الدىن الا اقپاراتتاندىرىپ وتىرۋ قاجەت.
ساراپشىلار ەكولوگيالىق تاۋەكەلدەر, اتاپ ايتقاندا, كليماتتىڭ وزگەرۋ سالدارى, جەردىڭ توزۋى مەن شولگە اينالۋى, سۋدى ءتيىمسىز پايدالانۋ, وندىرىستىك قالدىقتار مەن قوقىستاردىڭ جينالۋى تۋرالى الاڭداۋلى ەكەندىگىن ءبىلدىردى. ساراپشىلار تاراپىنان قازاقستانداعى ەكولوگيالىق قاۋىپسىزدىكتىڭ قاۋىپ-قاتەرىن ازايتۋ مەن الدىن الۋ تۋرالى ناقتى ۇسىنىستار بەرىلدى.
ن.ەرمەكباەۆ وتىرىسقا قاتىسۋشىلارعا سۋ تاسقىنى, بولۋى مۇمكىن زالالدى ازايتۋ, تابيعي اپاتتاردىڭ پايدا بولۋىن ەسكەرتۋ مەن ونى بولجاۋدىڭ تيىمدىلىگىن ارتتىرۋ ماسەلەسى بويىنشا عىلىمي, ساراپتامالىق قولداۋ كورسەتۋگە شاقىردى.
ساراپتامالىق كەڭەس وتىرىسىنىڭ قورىتىندىسى بويىنشا قاۋىپسىزدىك كەڭەس قىزمەتى مەن مەملەكەتتىك ورگانداردىڭ جۇمىسىندا ودان ءارى پايدالانۋ ءۇشىن ناقتى ۇسىنىستار بەرىلدى.