كەشە استانادا «امانات» ينتەللەكتۋالدى كلۋبىنىڭ كەزەكتى وتىرىسى ءوتتى. وعان ساراپشىلار, ۇگىت-ناسيحات ۋاقىتىندا باق پەن الەۋمەتتىك جەلىلەرگە ۇزدىكسىز مونيتورينگ جاساپ كەلگەن زەرتتەۋشىلەر مەن مەديا-ساراپشىلار قاتىسىپ, «سايلاۋ-2015: نەگىزگى ترەندتەرى مەن قورىتىندىلارى» دەگەن تاقىرىپتا پىكىر الماستى.
قاتىسۋشىلار سايلاۋ ناۋقانى كەزىندەگى ساياسي تەحنولوگيالار مەن ۇگىت-ناسيحات جۇمىستارىنىڭ جۇزەگە اسىرىلۋى, بۇقارالىق اقپارات قۇرالدارى مەن الەۋمەتتىك جەلىلەردىڭ ءرولى, داۋىس بەرۋگە شاقىرۋ اكتسيالارىنىڭ ناتيجەلەرى, سايلاۋدان كەيىنگى وزگەرىستەر تۋرالى اڭگىمە قوزعادى.
قازاقستان ستراتەگيالىق زەرتتەۋلەر ينستيتۋتىنىڭ ديرەكتورى ەرلان قارين سايلاۋ ناۋقانى باستالعالى بەرى, قسزي مەن باسقا دا عىلىمي-ساراپتامالىق ورتالىقتار بىرلەسىپ, وزگەشە پىشىندە ساياسي ناۋقانعا اتسالىسقانىن جەتكىزدى.
«ياعني, سايلاۋ ناۋقانى كەزىندە بارلىق وڭىرگە شىعىپ, ساراپشىلاردىڭ وڭىرلەردەگى كەزدەسۋلەرىن وتكىزدىك. ءبىر ايتا كەتەرلىگى, وڭىرلەردە قازىرگى قالىپتاسقان جاعدايعا, ەلدەگى ساياسي-ەكونوميكالىق, الەۋمەتتىك جاعدايلارعا بايلانىستى وتە كوپ, تىڭ پىكىر بار ەكەن. ءبىزدىڭ جيىندار اشىق پىشىندە ءوتتى. جاڭا, قىزىقتى ويلار ايتىلىپ جاتتى. سوندىقتان, سايلاۋ ناۋقانى قالاي بولعاندا دا قوعامدا جينالعان بەلگىلى ءبىر وزەكتى ماسەلەلەردى الدىڭعى قاتارعا شىعارىپ, سولارعا بيلىكتىڭ, قوعامنىڭ, ازاماتتاردىڭ نازارىن تاعى ءبىر اۋدارتۋعا سەبەپكەر بولدى دەپ ەسەپتەيمىز. كەز كەلگەن سايلاۋ ناۋقانى شىن مانىسىندە قالاي ءوتىپ جاتسا دا, ارقاشان دا قوعام مەن مەملەكەتتىڭ ىشىندەگى ۇدەرىستەردى, ۇلتتىق, مەملەكەتتىك ماسەلەلەردى جارىققا شىعارىپ, جاريا ەتكىزەدى. سونداي جاعداي بيىلعى جىلعى سايلاۋ ناۋقانى بارىسىندا دا بولدى», – دەدى ە.قارين.
قازاقستان ستراتەگيالىق زەرتتەۋلەر ينستيتۋتىنىڭ اعا عىلىمي قىزمەتكەرى الۋا جولدىبالينا سايلاۋ ناۋقانى باق ارقىلى وڭىرلەردە جوعارى دەڭگەيدە, بەلسەندى تۇردە تالقىلانعانىن, باق-تىڭ بارلىق كانديداتتار تۋرالى ءبىر كولەمدە, تولىققاندى اقپارات بەرگەنىن اتاپ ءوتتى.
«ماسەلەن, Abai.kz رەسۋرسى تۇراقتى تۇردە 3 كانديداتتىڭ ساياسي باعدارلاماسىن تانىستىردى. ۇگىت-ناسيحات جۇمىستارىنا قاتىستى شولۋ جاساپ وتىردى. جالپى, 2015 جىلعى پرەزيدەنتتىك سايلاۋ قوعام تاراپىنان كەڭ قولداۋعا يە بولدى. ءبىر اتاپ وتەرلىگى, باق 2015 جىلعى پرەزيدەنتتىك سايلاۋ ناۋقانىنا ارنالعان ارنايى سايتتىڭ پايدا بولۋى سايلاۋ تەحنولوگيالاردىڭ جاڭا دەڭگەيگە كوتەرىلگەنىن كورسەتتى دەگەن تۇجىرىم جاسادى. باق سايلاۋ ناۋقانىنىڭ بۇگىندە بىرلەسكەن سيپاتتا ءوتىپ جاتقانىن ايتا كەلە, حالىقتىڭ ەلەكتوراتتى مادەنيەتىن دامىتۋعا, ەل تۇرعىندارىن ماڭىزدى ساياسي شاراعا جۇمىلدىرۋعا ىقپال ەتىپ وتىر دەگەن باعاسىن بەرۋدە», – دەدى الۋا جولدىبالينا.
ساياساتتانۋشى ەرلان سايىروۆ بۇل سايلاۋدا ساياسي كوزقاراستاردىڭ, ساياسي دۇنيەتانىمنىڭ بالامالى باعىتتارى بەرىلگەنىن جەتكىزدى.
«بۇل جولعى سايلاۋ قازاقستاننىڭ ساياسي مادەنيەتىن بەلگىلى ءبىر دارەجەگە كوتەرۋگە ىقپال ەتكەن كەزەڭ بولدى دەپ ويلايمىن. ءبىز سايلاۋدى حالىقتى ساياسي تۇرعىدان جوعارى دەڭگەيگە كوتەرۋدىڭ مەكتەبى دەپ ەسەپتەۋىمىز كەرەك. سايلاۋ كوپ بولعان سايىن حالىقتىڭ ساياسي ساناسى وسە بەرەدى. ياعني, ساياسي ۇدەرىس كوپ بولعان كەزدە ساياسي مادەنيەت قالىپتاسادى. بۇل ساياسي ناۋقان قازاقستاندى ساياسي تۇرعىدان دامىتۋدىڭ باسقا ءبىر كەزەڭىنىڭ الدىندا تۇرعان ۇلكەن جاتتىعۋ ءتارىزدى بولدى», – دەدى ساياساتتانۋشى.
وتىرىسقا قاتىسۋشىلار, سونداي-اق, الەمدەگى ءارتۇرلى گەوساياسي ۇدەرىستەردىڭ شيەلەنىسىپ تۇرعان كەزىندە, ولاردىڭ جاعىمسىز ىقپالىنىڭ الدىن الۋ ءۇشىن دە سايلاۋ ناۋقانىن وتكىزۋ ماڭىزدى دەگەن ويلارىن ورتاعا سالدى.
ءلايلا ەدىلقىزى,
«ەگەمەن قازاقستان».