جىلىجاي جايى ءسوز بولدى

وسىدان 13 جىل بۇرىن قۇرىلعان «ەكو-كۋلتۋرا» تۇراقتى دامىپ كەلە جاتقان, جابىق توپىراقتا ەكولو­گيالىق تازا كوكونىس وسىرەتىن ءىرى اگروونەركاسىپتىك حولدينگتىڭ ءبىرى. ءبىر جىلدا وندىرگەن ءونىم كولەمى 300 مىڭ توننادان اسىپ جىعىلادى. اتالعان حولدينگتىڭ ەلگە كەلۋى ەكونوميكا ءۇشىن ماڭىزدى جوبالاردى ىسكە اسىرۋعا ىقپال ەتەدى.

قازىرگى كۇندە حولدينگ تۇركىستان وبلىسى كەلەس اۋدانىندا جىلىجاي كەشەنىن سالىپ جاتىر. بۇگىندە 51 گا جەر ۋچاسكەسىندە جىلىجاي اشۋدىڭ ءبىرىنشى كەزەڭى جۇزەگە اسىرىلعالى تۇر. ول جەردە جىلىنا 28 مىڭ توننادان استام قىزاناق وسىرىلەدى. كەلەلى كەزدەسۋگە قاتىسۋشىلار 500 گا جەردى قامتيتىن جىلىجاي كەشەنى اۋماعىن كەڭەيتۋ جوباسىن تالقىلادى. بۇل جىل بويى 240 مىڭ توننادان استام كوكونىس وسىرۋگە مۇمكىندىك بەرەدى. وندىرىلەتىن ءونىم ىشكى نارىققا جەتكىزىلەدى. سونداي-اق لوگيستيكالىق جانە تاراتۋ ورتالىقتارىنىڭ كەلىسىلگەن ارنالارى ارقىلى شەتەلگە ەكسپورتتالادى.

جوبانىڭ ءبىرىنشى كەزەگىن كەلەسى جىلدىڭ سوڭىنا دەيىن پايدالانۋعا بەرۋ جوسپاردا بار. ا.رۋداكوۆتىڭ ايتۋىنشا, بۇل الەمدەگى ەڭ ءىرى جىلى­جايلاردىڭ ءبىرى بولادى. مۇندا 7 مىڭ ادامعا جۇمىس ورنىن اشۋ كوزدەلگەن.

«ەكو-كۋلتۋرا» حولدينگى جەر­گىلىكتى تۇرعىندار ءۇشىن باسەكەگە قابىلەتتى ەڭبەك جاعدايىن تۋدىرىپ, الەۋمەتتىك جاۋاپكەرشىلىك شەڭبەرىندە ءوڭىردىڭ دامۋىنا ەلەۋلى ۇلەس قوسادى. ۇكىمەت باسشىسى اگروونەركاسىپ كەشەنىن دامىتۋدىڭ ماڭىزدىلىعى تۋرالى ايتتى.

«ازىق-ت ۇلىك قاۋىپسىزدىگى, تۇر­عىنداردى ساپالى ءارى ارزان ونىم­دەرمەن قامتاماسىز ەتۋ – ۇكىمەت جۇمىسىنىڭ نەگىزگى باسىمدىعى. ءوسىپ كەلە جاتقان دەموگرافيالىق كورسەتكىشتەردى ەسكەرە وتىرىپ, بۇكىل الەمدە ازىق-ت ۇلىككە دەگەن قاجەتتىلىك تۇراقتى تۇردە ارتىپ كەلەدى. بىزدە ىشكى نارىقتى قامتاماسىز ەتىپ, ءونىمدى ەكسپورتتاۋعا تولىق مۇمكىندىك بار. بۇگىندە ءبىز ىشكى قاجەتتىلىكتى تولىق قامتاماسىز ەتە وتىرىپ, اۋىل شارۋاشىلىعى سالاسىن جاڭا دەڭگەيگە كوتەرۋدى جانە ەكسپورت كولەمىن ودان ءارى ارتتىرۋدى ماقسات ەتىپ وتىرمىز. اتالعان باعىتتا ءبىز ينۆەستورلاردى تارتۋعا مۇددەلىمىز جانە اۋقىمدى جوبالاردى ىسكە اسىرۋعا قولداۋ كورسەتۋگە دايىنبىز», دەدى و.بەكتەنوۆ.