بيىل قازاق ادەبيەتىنىڭ كلاسسيگى, جازۋشى بەردىبەك سوقپاقباەۆتىڭ تۋعانىنا 100 جىل. مەملەكەت باسشىسى قاسىم-جومارت توقاەۆتىڭ باستاماسىمەن قالامگەردىڭ عاسىرلىق تويى ءوڭىر-وڭىردە جالعاسىپ, ءتۇرلى اۋقىمدى جوبالار اتقارىلىپ جاتىر. ايتۋلى داتانىڭ يۋنەسكو كولەمىندە اتاپ ءوتىلىپ جاتقانى دا جازۋشى مۇراسىن مىڭجىلدىق ەتۋگە سەپ بولارى ءسوزسىز. وسى ورايدا ۇلتتىق كىتاپحانادا قابىرعالى قالامگەردىڭ تۇرىك تىلىنە اۋدارىلعان «ولگەندەر قايتىپ كەلمەيدى» كىتابىنىڭ تۇساۋكەسەر ءراسىمى ءوتتى.
القالى جيىنعا تۇركسوي حالىقارالىق ۇيىمىنىڭ باس حاتشىسى سۇلتان راەۆ, مام ارحيۆ, قۇجاتتاما جانە كىتاپ ءىسى كوميتەتىنىڭ توراعاسى رۋستام ءالي, تۇركيا رەسپۋبليكاسىنىڭ الماتى قالاسىنداعى باس كونسۋلى ەۆرەن مۋدەرريسوعلى, الماتى وبلىسى مادەنيەت, ارحيۆتەر جانە قۇجاتتاما باسقارماسىنىڭ باسشىسى دانيار اليەۆ, مەملەكەت جانە قوعام قايراتكەرلەرى, زيالى قاۋىم قاتىستى.
«مادەنيەت جانە اقپارات مينيسترلىگى قوعامدىق ماڭىزى بار ادەبيەتتەردى باسىپ شىعارۋ باعدارلاماسى اياسىندا بەردىبەك سوقپاقباەۆتىڭ كوپتومدىق كىتابىن ەكى رەت باسىپ شىعارىپ, ەلىمىزدىڭ بارلىق كىتاپحانالارىنا تاراتقان بولاتىن. كورنەكتى جازۋشىنىڭ وقىرماندارى جىلدان-جىلعا ارتىپ كەلە جاتقانى قۋانتادى. ەندى ولاردىڭ قاتارىن تۇرىك باۋىرلارىمىز دا تولىقتىرىپ وتىر», دەدى مام ارحيۆ, قۇجاتتاما جانە كىتاپ ءىسى كوميتەتىنىڭ توراعاسى رۋستام ءالي.
شەبەر سۋرەتكەردىڭ قالامىنان تۋعان روماننىڭ تۇرىكشە نۇسقاسى 2000 دانامەن باسىلىپ شىققان. اۋدارعان – تۇرىك جازۋشىسى حۋسەين ۆارول.
«ولگەندەر قايتىپ كەلمەيدى» – جاستىق شاعى سوعىستىڭ اۋىرتپالىعىمەن قاتار كەلگەن تاعدىرلاردى سۋرەتتەيدى. بۇدان بولەك قالامگەردىڭ «مەنىڭ اتىم قوجا», «بالالىق شاققا ساياحات», «16 جاسار چەمپيون» سىندى شىعارمالارى دا وقىرمانعا ەتەنە تانىس, ەرەكشە ىستىق.
ايتا كەتەيىك, جازۋشىنىڭ ەڭبەكتەرى بۇگىنگە دەيىن الەمنىڭ بىرنەشە تىلىنە تارجىمەلەنگەن. ال تۇرىك جازۋشىسى اۋدارماعا ەكى جىل ۋاقىتىن جۇمساپتى. سونداي-اق ول اۋدارما كەزىندە روماننىڭ قيىنعا سوققان تۇستارىن اتاپ ءوتتى.
«الىستان التى جاسار بالا كەلسە, الپىستاعى قارت سالەم بەرەدى». بۇل – قازاقتا سالەمنىڭ ماڭىزدىلىعىن, ءداستۇرىن كورسەتەتىن ءسوز. تۇرىكتەردە دە سالەمدەسۋدىڭ ماعىناسى تەرەڭ. وسى سىندى ماقال-ماتەلدەردى, اۋىلدىڭ تۇرمىس-تىرشىلىگىنە بايلانىستى سوزدەردى اۋدارۋ قيىن بولدى», دەيدى جازۋشى حۋسەين ۆارول.
ال تۇركسوي جازۋشىلار وداعىنىڭ توراعاسى ۇلىقبەك ەسداۋلەت تۇلعا مەرەيتويىن اتاپ ءوتۋ شەتەلدە باستالىپ كەتكەنىن ايتتى.
«24 قازاندا تۋعان جەرى الماتى وبلىسىنىڭ رايىمبەك اۋدانىندا, نارىنقولدا حالىقارالىق دەڭگەيدەگى يۋنەسكو-نىڭ, تۇركسوي-دىڭ دەڭگەيىندەگى مەرەيتوي ءىس-شارالارى وتكىزىلەدى. جالپى, بەردىبەك سوقپاقباەۆتىڭ 100 جىلدىق مەرەيتويى تۇركيادا باستالعان», دەدى ول.
ءىس-شارا اياسىندا بەردىبەك سوقپاقباەۆتىڭ شىعارماشىلىعىنا ارنالعان كىتاپ كورمەسى دە ۇيىمداستىرىلدى.
ەسكە سالا كەتەيىك, بۇعان دەيىن «مەنىڭ اتىم قوجا» شىعارماسى دا تۇرىكشە سويلەگەن ەدى.
مادەنيەت جانە اقپارات مينيسترلىگىنىڭ حابارلاۋىنشا, عاسىرلىق مەرەيتوي اياسىندا قالامگەردىڭ تۋعان اۋلى نارىنقولدا ەڭسەلى ەسكەرتكىشى بوي كوتەرەدى. سونداي-اق جازۋشىنىڭ ەسىمى بىرقاتار ساياباققا, ءبىلىم وشاعى مەن وبلىستىق كىتاپحاناعا بەرىلمەك.