اقش-تىڭ «Top Rank» دەپ اتالاتىن ايگىلى پروموۋتەرلىك كومپانياسى كاسىپقوي بوكستان WBO مەن IBF نۇسقالارى بويىنشا ورتا سالماقتاعى الەم چەمپيونى جانىبەك ءالىمحان ۇلىنىڭ كەلەسى ايدا كەزەكتى جەكپە-جەگىن وتكىزەتىنىن رەسمي تۇردە جاريا ەتتى.
شارشى الاڭعا 15 رەت كوتەرىلىپ, بارلىق باسەكەدە جەڭىسكە جەتكەن قازاقتىڭ اتاقتى بوكسشىسى 13 شىلدەدە لاس-ۆەگاستا 26 جاستاعى اندرەي ميحايلوۆيچپەن جۇدىرىقتاسادى. رەسەيدىڭ سانكت-پەتەربۋرگ قالاسىندا دۇنيەگە كەلگەن بوكسشى بۇل كۇندەرى جاڭا زەلانديادا تۇرىپ جاتىر. بويى – 189 سانتيمەتر. كاسىپقوي رينگتەگى كارەراسىن 2018 جىلى باستادى. سول ارالىقتا 21 كەزدەسۋ وتكىزىپ, بارلىعىندا باسىمدىق تانىتتى. 13 باسەكەنى مەرزىمىنەن بۇرىن اياقتادى. ءبىر ايتا كەتەرلىگى, ميحايلوۆيچ ءوزىنىڭ بارلىق جەكپە-جەگىن جاڭا زەلانديا مەن اۋستراليادا وتكىزدى. وزگە مەملەكەتتەرگە شىققان ەمەس. قازىرگى كەزدە ول – IBF نۇسقاسىنىڭ چەمپيوندىق اتاعىنا مىندەتتى ۇمىتكەر.
جوعارىداعى اقپارات تاراعان بەتتە جانىبەك ءالىمحان ۇلى: «وسى جەكپە-جەكتى تاعاتسىزدانا كۇتىپ ءجۇرمىن. ماعان چەمپيوندىق اتاقتارىمدى ءساتتى قورعاۋ ەش قيىندىق تۋعىزبايدى. ءسوز ورايى كەلگەندە, اندرەي ميحايلوۆيچكە ءوز ريزاشىلىعىمدى بىلدىرەمىن. ورتا سالماقتىڭ چەمپيوندارى مەنىمەن جۇدىرىقتاسۋدان باس تارتقان كەزدە ول باتىلدىق تانىتىپ, كەلىسىم بەردى. ەندى 13 شىلدەدە «Qazaq Style» قانداي بولاتىنىن كۇللى الەم جۇرتشىلىعى قايتا كورەدى. ءسويتىپ, ءابسوليۋتتى الەم چەمپيونى اتاعى ءۇشىن جورىق جالعاسىپ جاتىر. قازىر مەنىڭ جولىمدا ميحايلوۆيچ تۇر», دەپ مالىمدەدى.
جاڭا زەلانديانىڭ وكىلى دە ءۇنسىز قالمادى. ول: «بىلە بىلسەڭىزدەر, جانىبەك – مەنىڭ جولىمدا تۇرعان جاي عانا ءبىر بوكسشى. العا قويعان ماقساتىما قولجەتكىزۋ ءۇشىن ونى جايپاپ وتۋگە كۇش-قۋاتىم جەتەتىنىنە سەنىمدىمىن. بالكىم, بازبىرەۋلەر «ول مۇمكىن ەمەس» دەپ ايتۋى مۇمكىن. بىراق مەن ءۇشىن ءبارى مۇمكىن. ءالىمحان ۇلىنا تيەسىلى ەكى بىردەي التىن بەلبەۋدى ودان تارتىپ الۋ ءۇشىن وسى ايقاستا بارىمدى سالامىن», دەپ جەر-جاھانعا جار سالدى.