قازىلار قيانات جاسادى

جارىس جولىندا قالعان ءۇش بوكسشىنىڭ جولىنا قازىرگى كەزدە ۇلكەن ۇمىتپەن قاراپ وتىرعان جايىمىز بار. 50 كگ سالماق دارە­جەسىندەگى نازىم قىزايباي تۇساۋكەسەر كەزدە­سۋىندە جاستار اراسىنداعى ەۋروپا بىرىن­شىلىگىنىڭ (U-22) ەكى مارتە قولا جۇلدەگەرى, سلوۆا­كيالىق نيكول دۋريكوۆانى ايقىن باسىم­دىقپەن جەڭسە, كەشە 1/16 فينالدا وڭ­تۇس­تىككورەيالىق دجۋحيۋنگ دجۋنمەن شەبەر­لىك باي­قاستى. بۇل جەكپە-جەكتە دە بارلىق تورە­شى تاراپىنان نازىمنىڭ مىقتىلىعى ءبىر­­اۋىز­دان مويىندالدى.

ءۇش بىردەي قارسىلاسى – فيليپپيندىك كريستيان لاۋرەنتە, تۇركيالىق ميزان ايكول جانە يتاليالىق دجانلۋيدجي ما­لانگانى ەش كۇمانسىز ۇتقان 63,5 كگ سال­ماقتاعى مۇحا­مەدسابىر بازارباي ۇلى شيرەك فينالدا ەريسلاندي الۆارەسپەن ايقاستى. كۋبانىڭ قابىلانى بىلتىر تاش­كەنت­تە وتكەن الەم چەمپيوناتىنىڭ اقتىق سىنى­نا القىنباي جەتتى. شەشۋشى تۇستا فران­تسيالىق سوفيا ۋميادان ۇتىلىپ, كۇمىس مەدالدى يەلەندى. ول – باسقا دا اسا ءىرى حالىق­ارالىق جا­رىستاردا جەڭىس تۇعىرىنا كوتەرىلگەن اككى بوكسشى.

بازارباي ۇلى مەن الۆارەس اراسىندا­عى جەكپە-جەك وتە تارتىستى ءوتتى. باسەكەنىڭ باسىنان اياعىنا دەيىن ەكەۋى دە قارقىنىن ءبىر باسەڭدەتكەن جوق. ءبىر قاراعاندا, ءبىزدىڭ جىگىت باسىم بولعانداي كورىندى. كوبىنە-كوپ شابۋىلداعان – مۇحامەدسابىر. باسەكە بارىسىندا ول كۋبالىقتى نوكداۋنعا دا جىبەردى, قاباعىن دا جاردى. بىراق تورەشىلەردىڭ بۇيرەگى الۆارەسكە بۇرعانى انىق بايقال­دى. رينگتەگى قازى قازاق بوكسشىسىنا قايتا-قايتا ەسكەرتۋ جاساپ, ونى ابدەن تىعىرىققا تىرەدى. قاپتالداعى تورەشىلەر دە قالىسپادى. ولار دا بوستاندىق ارالى وكىلىنە كوپ ۇپاي بەرىپ, قانداسىمىزدىڭ ەڭبەگىن ەلەمەدى. ناتيجە­سىندە, ەريسلاندي الۆارەس جارتىلاي فينالعا ء­وتتى. ال مۇحامەدسابىر بازارباي ۇلى ەندى قو­سىم­شا جولداما ءۇشىن تالاسادى.

ەستەرىڭىزگە سالا كەتەيىك, بۇعان دەيىن 60 كگ سالماقتا كۇش سىناسقان ريمما ۆولوسەن­كو تۇساۋ­كەسەر كەزدەسۋىندە گەرمانيالىق فە­ليسيتاس ماريا گانگلباۋەردەن باسىم تۇسكە­نى­مەن, ەكىنشى اينالىمدا ريمما ۇندىستاندىق انكۋشيتا بورودان ايلاسىن اسىرا المادى. 54 كگ سالماقتاعى ۇلجان سارسەنبەك شەرا مەي پاتريسيومەن جۇدىرىقتاستى. ۇلجان­نىڭ ۇلتتىق قۇراما كومانداسىنىڭ جەيدەسىن كيگەنى كەشە عانا. تاجىريبەنىڭ ازدىعى سىن ساعاتتا سىر بەردى. ول ءوز قارسىلاسىنان ۇپاي سانىمەن ۇتىلدى. 66 كگ سالماقتاعى ناتاليا بوگدانوۆا سەربيالىق كريستينا كۋلۋحوۆا­نىڭ وسال تۇسىن تابا المادى. ال 75 كگ سالماق دارەجەسىندە سايىسقا تۇسكەن الەم چەمپيونى ۆالەنتينا حالزوۆا ەۋروپا چەمپيونى, ۋكراينالىق كارولينا ماحنونى ۇتتى.

تاعى ءبىر ايتا كەتەرلىك جايت, بانگكوكتا قازاقستاننىڭ جانكۇيەرلەرىنە ەسىمدەرى ەتەنە تانىس تاعى ەكى بىلعارى قولعاپ شەبەرى باق سىناپ جاتىر. ءبىرىنشىسى – ازات ماحمەتوۆ (51 كگ). اتباسار بوكس مەكتەبىنىڭ تۇلەگى كەزىندە جاستار اراسىنداعى قازاقستان بىرىنشىلى­گىن­دە دارا شىعىپ, ەل چەمپيوناتىنىڭ كۇمىس جۇلدەگەرى جانە يسلام ىنتىماقتاستىعى ويىندارى­نىڭ جەڭىمپازى اتاندى. كەيىن­نەن باحرەينگە قو­نىس اۋدارىپ, كەيىنگى جىلدا­رى سول ەلدىڭ نامى­سىن قورعاپ ءجۇر. ەكىنشىسى – ۆلاديسلاۆا كۋحتا ­(57 كگ). قوستانايدىڭ ­تۋماسى قازاقستان چەم­پيوناتىن ءۇش رەت ۇتىپ, بىرقاتار حالىقارا­لىق تۋرنيردە توپ جاردى. بىلتىر ول ماجار­ستان ازاماتتىعىن الدى. وكىنىشكە قاراي, ازات العاشقى اينالىم­نان اسا المادى. ال ۆلاديسلاۆا ازىرگە ءساتتى ونەر كورسەتىپ جاتىر.

سونداي-اق قىتاي مەن موڭعوليانىڭ تۋى استىندا كۇش سىناسىپ جۇرگەن قازاق بوكسشىلارى دانابەك بايعازى مەن بەكنۇر حاليگە دە جانكۇيەر بولامىز. اسا اۋىر سالماقتا جۇدىرىقتاسىپ جۇرگەن قوس قانداسىمىز باس­تاپقى باسەكەلەرىندە جەڭىسكە جەتتى.