وسىدان تۋرا ءبىر جىل بۇرىن, ياعني 2014 جىلدىڭ 24 ساۋىرىندە مەملەكەت باسشىسى نۇرسۇلتان نازارباەۆ «ەكسپو-2017» كورمەسى قالاشىعىنىڭ قۇرىلىس الاڭىنا كاپسۋلا سالىپ, بولاشاق كەشەندى قۇرىلىستىڭ ىرگەتاسىن قالاعان بولاتىن. كەشە وسى شارانىڭ ءبىر جىلدىعىنا بايلانىستى «استانا ەكسپو-2017» ۇك» اكتسيونەرلىك قوعامى قازاقستاندىق باق وكىلدەرىنىڭ كورمە قالاشىعى قۇرىلىسى الاڭىنا ءباسپاسوز ساپارىن ۇيىمداستىردى.
استانا قالاسىنىڭ سول جاعالاۋىندا ورنالاسقان كورمە قالاشىعىنىڭ اۋماعى 174 گەكتار جەردى الىپ جاتىر. ونىڭ ىشىندە 25 گەكتار اۋماق ەكسپو-2017-ءنىڭ ناقتى نىساندارىنا, اتاپ ايتقاندا, ۇلتتىق پاۆيلون «ۇزدىك تاجىريبەلەر اۋماعى» پاۆيلونى كورمەگە قاتىساتىن 100-دەن اسا ەل ورنالاساتىن پاۆيلوندار جانە تاقىرىپتىق پاۆيلون كەشەندەرى قۇرىلىسىنا بولىنگەن.
اتشاپتىرىم اۋماقتى الىپ جاتقان عاسىر قۇرىلىسى الاڭىندا جۇمىستىڭ ناعىز قىزعان شاعى ەكەن. قاي جاعىڭا قاراساڭ دا, اشىق اسپانعا مويىن سوزعان تىرنالارداي بوي جارىستىرعان مۇنارا كراندارىنان كوز سۇرىنەدى. ءبىر شەتىنەن ەكىنشى شەتىنە دەيىن كوز تالاتىن وسى ءبىر اۋماقتى قۇرىلىس الاڭىندا ءدال قازىر 60 مۇنارا كرانى جۇمىس ىستەپ تۇر. بۇگىنگە دەيىن عاسىر قۇرىلىسى الاڭىندا استانا ەكسپو-2017 حالىقارالىق مامانداندىرىلعان كورمەسىنىڭ 38 نىسانىنىڭ ىرگەتاسى قالانىپ, قۇرىلىس جۇمىستارى ءجۇرىپ جاتىر. قۇرىلىس الاڭىندا 3 500 ادام ەڭبەك ەتۋدە.
جالپى, ەكسپو-2017 كورمەسىنە الەمنىڭ 100 ەلىنىڭ وكىلدەرى قاتىسادى دەپ جوسپارلانىپ وتىر. بۇگىنگى كۇنگە دەيىن استانادا وتەتىن جاھاندىق كورمەگە قاتىساتىندىعىن 23 مەملەكەت جانە 3 حالىقارالىق ۇيىم رەسمي تۇردە راستادى. ولاردىڭ اراسىندا گەرمانيا, تۇركيا, يزرايل جانە ءۇندىستان سياقتى مەملەكەتتەر بار. سونىمەن بىرگە, 9 مەملەكەت بۇل كورمەگە قاتىساتىندىعىن اۋىزشا راستاپ وتىر.
كورمە قالاشىعى قۇرىلىس الاڭىندا وتكەن ءباسپاسوز ساپارى بارىسىندا جۋرناليستەر كورمە نىساندارىنىڭ قۇرىلىسىن سالۋ جۇمىستارىنىڭ بارىسىمەن جان-جاقتى تانىستى. قۇرىلىس الاڭىنداعى ساپاردان كەيىن «استانا ەكسپو-2017» ۇك» اق باسقارما توراعاسىنىڭ ورىنباسارى مۇرات وماروۆ, اكتسيونەرلىك قوعام باسقارما توراعاسىنىڭ كەڭەسشىسى قاناعات تىلەمىسوۆ جانە «استانا ەكسپو-2017» ۇك» اق-تىڭ دەپارتامەنت ديرەكتورى ەرجان مەيراموۆ جۋرناليستەرمەن ءباسپاسوز ءماسليحاتىن وتكىزدى. جاھاندىق كورمە قالاشىعىنىڭ نىساندارى بوي كوتەرەتىن عاسىر قۇرىلىسى الاڭىندا اتقارىلىپ جاتقان كەشەندى جۇمىستار حاقىندا گازەتىمىزدىڭ الداعى ساندارىندا جارىق كورەتىن ارناۋلى بەتتە كەڭ كولەمدە ماعلۇمات بەرىلەتىن بولادى.
جىلقىباي جاعىپار ۇلى,
«ەگەمەن قازاقستان».