بىرلىك بار جەردە تىرلىك بار دەيدى. بۇل ءسوزدىڭ نەگىزى ءبىزدىڭ ەلىمىزدىڭ حالىقتارىنا قاراتىلىپ ايتىلسا كەرەك. ءوزارا سەنىم مەن باۋىرلاستىق جانە ادامي ىزگى قاسيەتتەردىڭ نىشانى قازىر ايقىن اڭعارىلۋدا. سەبەبى, بۇكىل قازاقستاندىقتاردىڭ ءبىر-بىرىنە دەگەن وسى دوستىعى مەن مەيىرىمدىلىگىنىڭ ارقاسىندا عانا سۋ باسقان ايماقتارعا كومەك قولىن سوزۋ سىندارلى تۇسىنىستىككە ۇلاستى.
اتىراۋ, قوستاناي, قىزىلوردا, شىعىس قازاقستان, اقتوبە جانە ت.ب. وبلىستاردان سۋ العان ايماقتارداعى قينالعان جانداردىڭ جاعدايىنا ءسال دە بولسا قولداۋ بولسىن دەگەن حالىقتىق كومەكتىڭ ماڭىزى ارتۋدا. مىنە, بۇل ورايدا ءبىر بايقاعانىمىز, ۋاقىتشا قيىنشىلىققا قارسى تۇرۋداعى شىدامدىلىققا ۇيىستىرعان باستى جاۋاپكەرشىلىك سىنالار ساتتەگى ىستەر بارىسى قانداي دارەجەدە ەكەندىگى ەندى انىق كورىنىپ جاتىر. سونىڭ بىرقاتارىن كەشە توتەنشە جاعدايلار كوميتەتىنىڭ رەسمي وكىلى رۋسلان يمانقۇلوۆ تا ايتىپ بەردى.
ونىڭ اق قاعازعا تىزىلگەن بايانداما ماتىنىنە قاراعاندا, سۋ تاسقىنىنا قارسى شارالاردى قامتۋ قالىپتاعىداي قارقىندى جالعاسىپ جاتقان كورىنەدى. وسىنداي جۇمىستاردىڭ ارقاسىندا بۇگىندە ەرىگەن قار سۋىن سورۋ جانە بۇرۋ ارقاسىندا 2 288 ۇيدەن سۋ شىعارىلعان. 16 200 ەۆاكۋاتسيالانعان ادامداردىڭ 14 631-ءى ءوز ۇيلەرىنە ورالدى. ەۆاكۋاتسيالاۋ پۋنكتتەرىنە 499 ادام ورنالاستىرىلعانىمەن, ءالى دە 1070 ادام تۋىسقاندارىندا قالدى, دەيدى وكىل.
اقمولا وبلىسىندا سۋ ايدىندارى جاي-كۇيىنە ۇزدىكسىز مونيتورينگ جۇرگىزىلۋدە. قۇتقارۋ قۇرالىمدارىنىڭ كۇشتەرى مەن قۇرالدارى جوعارى ازىرلىك رەجىمىندە تۇر. تسەلينوگراد اۋدانىنىڭ اعاناس اۋىلىندا ادامداردى وتكىزۋ مەن ازىق-ت ۇلىكتى تاسىمالداۋ ۇيىمداستىرىلدى. جول توسەمىن قالپىنا كەلتىرۋ جۇمىستارى باستالدى. اقمولا وبلىسىنىڭ قۇتقارۋشىلارى تاۋلىك بويى كەزەكشىلىك اتقارۋدا. تالاپكەر اۋىلىندا ەرىگەن قار سۋىن سورۋ جۇمىستارى جالعاسۋدا, اۋىلدان بارلىعى 3 980 تەكشە مەتر سورىلدى.
ورازاق اۋىلىندا تۇرعىن ۇيلەردىڭ ماڭىنا بوگەت ءۇيۋ جانە ينەرتتى ماتەريالدار توسەۋ جۇمىسى جۇرگىزىلۋدە. قوسىمشا 275 توننا ينەرتتى ماتەريال اكەلىنگەن. ينەرتتى ماتەريالدار سالىنعان قاپتاردى دايىنداۋ جۇمىستارى دا جۇرگىزىلۋدە, بارلىعى 2 170 قاپ دايىندالىپ قويىلىپتى. وسى جۇمىستارعا قۇتقارۋ بولىمشەلەرىنەن, ۇلتتىق ۇلاننان, جەرگىلىكتى اتقارۋشى ورگاندار مەن باسقا دا تارتىلعان ۇيىمداردان 116 ادام اتسالىسىپ, 11 بىرلىك تەحنيكا جانە 2 قايىق قاتىستىرىلدى. قاراوتكەل اۋىلىنداعى تۇرعىن ۇيلەردىڭ ماڭىنا بوگەت ءۇيۋ جانە قورشاۋ جۇمىستارى جالعاسۋدا. جۇمىستاردى جۇرگىزۋ ءۇشىن 4 460 توننا ينەرتتى ماتەريال اكەلىنگەن. قورعالجىن اۋدانىنىڭ كەڭبيدايىق اۋىلىنىڭ 12 تۇرعىنى الدىن الا جەرگىلىكتى مەكتەپتىڭ عيماراتىنا ەۆاكۋاتسيالاندى. وندا بوگەندى بەكىتۋ جۇمىسى جۇرگىزىلۋدە. قازىرگى ۋاقىتتا ونىڭ 350 م. تۇسى بەكىتىلدى, ينەرتتى ماتەريال سالىنعان 1000 قاپ توسەلدى. جۇمىستارعا قۇتقارۋ بولىمشەلەرىنەن, جەرگىلىكتى اتقارۋشى ورگانداردان جانە باسقا دا تارتىلعان ۇيىمداردان 135 ادام, 6 بىرلىك تەحنيكا جانە 2 قايىق تارتىلدى.
اقمولا وبلىسى اۆتوموبيل جولدارىنىڭ 5 ۋچاسكەسىندە ەرىگەن قار سۋى اعىپ جاتىر. زاقىمدالعان ۋچاسكەلەرگە اپاراتىن جولداردا ەسكەرتۋ بەلگىلەرى قويىلعان. سۋ اعىپ جاتقان جول بويىنىڭ جۇرۋگە بولاتىن شەتتەرىندە دابىل بەلگىسى بار باعاندار ورناتىلعان. قاراعاندى وبلىسىندا تاۋلىك بويى پاترۋلدەۋ جانە سۋ دەڭگەيىن باقىلاۋ توقتاتىلعان جوق. مۇنداعى وبلىستىق تجد جەدەل-قۇتقارۋ جاساعىنىڭ قۇتقارۋشىلارى قاروي اۋىلىنا قايىقپەن ادامداردى اپارىپ, اكەلىپ جانە ولارعا گۋمانيتارلىق كومەك جەتكىزۋدى جالعاستىرۋدا. اقتوعاي اۋدانى قاراسۋ اۋىلىندا سۋ دەڭگەيىنىڭ تومەندەۋى بايقالدى. كيەۆكا-جاراسپاي اۆتوجولى ارقىلى ەرىگەن قار سۋىنىڭ ءوتۋى توقتادى. قازىر جول توسەمدەرىن قالپىنا كەلتىرۋ بويىنشا جۇمىس جۇرگىزىلۋدە. الايدا, كيەۆكا كەنتى مەن قاروي اۋىلى اراسىنداعى كوپىر سۋ وتۋىنە بايلانىستى جابىلدى.
شىعىس قازاقستان وبلىسىندا بەسقاراعاي اۋدانى گلۋحوۆكا اۋىلىندا سۋ سورۋ جانە تۇرعىن ۇيلەردەن ەرىگەن قار سۋىن بۇرۋ جۇمىستارى جالعاسۋدا. وندا ءىىم بولىمشەلەرى مەن جەرگىلىكتى اتقارۋشى ورگانداردان 45 ادام شىعىپ, 8 بىرلىك تەحنيكا جۇمىس ىستەۋدە. اياگوز جانە جارما اۋداندارىنىڭ اۆتوجولدارىندا قالپىنا كەلتىرۋ جۇمىستارى جۇرگىزىلۋدە.
پاۆلودار وبلىسىندا اۆتوجولداردىڭ زاقىمدالعان ۋچاسكەلەرىن قالپىنا كەلتىرۋ بويىنشا جۇمىستار جالعاسۋدا. سولتۇستىك قازاقستان وبلىسىندا ەسىل اۋدانى كورنەەۆكا اۋىلىندا قۇتقارۋ بولىمشەلەرىنىڭ كۇشتەرىمەن تاسقىنعا قارسى ءىس-شارالار جالعاستىرىلۋدا. شال اقىن, سونداي-اق تايىنشا, تيميريازەۆ, قىزىلجار اۋداندارى اۆتوجولدارىنىڭ 4 ۋچاسكەسىندە ەرىگەن قار سۋىنىڭ اعۋى توقتاماي تۇر. دەگەنمەن, بۇگىنگى كۇنى رەسپۋبليكا بويىنشا اۆتوموبيل جولدارىنىڭ ب ۇلىنگەن 172 ۋچاسكەسىنىڭ 122-ءسى قالپىنا كەلتىرىلدى. 23 138 مەتر ۋاقىتشا بوگەندەر تۇرعىزىلدى, 484 878 تەكشە مەتر ەرىگەن قار سۋى سورىلدى, 97 217 ينەرتتى ماتەريالدار سالىنعان قاپ توسەلدى. جوعارىدا ايتقانىمىزداي, قيىندىققا تاپ بولعان جاندارعا ەلىمىزدىڭ ءار تۇكپىرىنەن گۋمانيتارلىق كومەك جەتكىزۋ جالعاسىپ جاتىر.
الەكساندر تاسبولاتوۆ,
«ەگەمەن قازاقستان».