«بايتەرەك» حولدينگى جانە قازاقستان يپوتەكالىق كومپانياسى جالعا بەرىلەتىن تۇرعىن ءۇي باعدارلاماسى بويىنشا شىمكەنت قالاسىنىڭ تۇرعىندارىنا جاڭا پاتەرلەردىڭ كىلتىن تابىس ەتتى.
جاقىندا «بايتەرەك» حولدينگى جانە قازاقستان يپوتەكالىق كومپانياسى جالعا بەرىلەتىن تۇرعىن ءۇي باعدارلاماسى بويىنشا شىمكەنت قالاسىنىڭ تۇرعىندارىنا جاڭا پاتەرلەردىڭ كىلتىن تابىس ەتتى.
سالتاناتتى جيىندى «بايتەرەك» حولدينگى باسقارما توراعاسىنىڭ ورىنباسارى الينا الدامبەرگەن اشىپ, جاڭا قونىس يەلەرىنە باق-بەرەكە تىلەدى. سودان سوڭ باستاپقى تولەماقىسى جوق, پايىزى تومەن تۇرعىن ءۇي كەشەنىن سالۋعا قاتىسقان, «قازاقستان يپوتەكالىق كومپانياسى» يپوتەكالىق ۇيىمى» اق توراعاسىنىڭ ورىنباسارى بولات دوسمۇحامەتوۆ ءسوز الىپ, قازاقستان بويىنشا ەكى مىڭعا تارتا وسىنداي ءۇي پايدالانۋعا بەرىلسە, سونىڭ تەڭ جارتىسىن ءوڭتۇستىكقازاقستاندىقتار قۇراپ وتىرعانىن ەرەكشە اتادى.
العاشقى بولىپ ءوز پاتەرلەرىنىڭ كىلتىن العاندار ءمادينا سەراليەۆا, ءمادينا اۋەلبەكوۆا, نۇربول احمەتوۆ قۋانىشتارىن جۇرتپەن ءبولىسىپ, وسىنداي قامقورلىق جاساعانى ءۇشىن مەملەكەت باسشىسىنا راحمەتتەرىن ايتتى.
تۇرعىن ءۇي باعدارلاماسىنا بايلانىستى «بايتەرەك» حولدينگى باسقارما توراعاسىنىڭ ورىنباسارى الينا الدامبەرگەن جۋرناليستەرگە سۇحبات بەرىپ, تومەندەگى جاعدايدى باياندادى.
جيىرما جىل مەرزىمگە ساتىپ الۋ قۇقىعىمەن جالعا بەرىلگەن وسى پاتەرلەردىڭ اي سايىنعى تولەمدەرى ورتاشا ەسەپپەن 1 ءبولمەلى پاتەرلەر ءۇشىن 21 مىڭ تەڭگە, 2 بولمەلى پاتەرلەر ءۇشىن 35 مىڭ تەڭگە جانە 3 بولمەلى پاتەرلەر ءۇشىن 46 مىڭ تەڭگە بولادى ەكەن.
بيىل «بايتەرەك» حولدينگى جالپى العاندا, جالعا بەرىلەتىن تۇرعىن ءۇيدىڭ 487 مىڭ شارشى مەترىن ساتىپ الۋدى, سالۋدى جانە ولاردى جەرگىلىكتى اتقارۋشى ورگانداردا كەزەكتە تۇرعاندارعا ۇسىنۋدى جوسپارلاپ وتىر. بۇل شامامەن 9 740 پاتەر. باعدارلامانى ىسكە اسىرۋدىڭ 5 جىل ىشىندە جالدامالى تۇرعىن ءۇيدىڭ 1 483 شارشى مەترىن بەرۋ جوسپارلانىپ وتىر. بۇل شامامەن 29 مىڭعا جۋىق پاتەرگە جۋىقتايدى.
«نۇرلى جول – بولاشاققا باستار جول» اتتى قازاقستان حالقىنا جولداۋىندا ەلباسى ن.ءا.نازارباەۆ جالعا بەرىلەتىن تۇرعىن ءۇي قۇرىلىسىنا كوزقاراستى قايتا قاراستىرۋدى تاپسىردى. قر ۇكىمەتى وڭىرلەردى دامىتۋدىڭ 2020 جىلعا دەيىنگى باعدارلاماسىن ازىرلەدى. ول باعدارلامادا جالعا بەرىلەتىن تۇرعىن ۇيگە ەرەكشە نازار اۋدارىلدى. جەڭىلدىك تالاپتارىمەن الەۋمەتتىك جالعا بەرىلەتىن تۇرعىن ءۇيدى بەرۋگە ۇلتتىق قوردان 180 ملرد. تەڭگە بولىنسە, ونىڭ ىشىندە «بايتەرەك» حولدينگىنە جالعا بەرىلەتىن تۇرعىن ءۇيدى سالۋ جانە ساتىپ الۋ ءۇشىن 145 ملرد. تەڭگە بەرىلدى. ال 35 ملرد. تەڭگە جەرگىلىكتى اتقارۋشى ورگاندار ءۇشىن ءبولىندى. ولار قاراجاتتاردى ينجەنەرلىك-كوممۋنيكاتسيالىق ينفراقۇرىلىمدى جۇرگىزۋگە جۇمسايدى. ولاردىڭ ىشىندە 2015 جىلى 92,5 ملرد. تەڭگە, 2016 جىلى 52,5 ملرد. تەڭگە بولىنەدى.
باعدارلامانى جۇزەگە اسىرۋ اياسىندا 49 مىڭ جاڭا جۇمىس ورنى قۇرىلدى, ونىڭ 20 مىڭى بيىلعى جىلى جانە تاعى 650 مامان سالىنعان ۇيلەردى پايدالانۋعا بەرۋ كەزىندە جۇمىسقا تارتىلادى.
باعدارلاماعا جاو-دا كەزەكتە تۇرعان مىنا ساناتتارعا جاتقىزىلاتىن تۇلعالار قاتىسادى: كوپبالالى وتباسىلار, تولىق ەمەس وتباسىلار, مۇگەدەك بالانى ءتاربيەلەپ وتىرعان وتباسىلار, جەتىم بالالار, ورالماندار, مەملەكەتتىك قىزمەتشىلەر, اسكەري قىزمەتشىلەر, بيۋدجەتتىك ۇيىمداردىڭ قىزمەتكەرلەرى سياقتى ساناتتارعا جاتاتىن جەرگىلىكتى اتقارۋشى ورگانداردىڭ كەزەگىندە تۇرعان ازاماتتارعا ءبىرىنشى كەزەكتە بەرىلەدى. باعدارلاما بويىنشا پاتەرلەردىڭ ەلۋ پايىزى كورسەتىلگەن ساناتتاردىڭ 35 جاسقا دەيىنگى جاس وتباسىلاردىڭ اراسىندا ۇلەستىرىلەدى.
كەزەكتىك تىزىمىنەن جەرگىلىكتى اتقارۋشى ورگاندار ىرىكتەپ العان ازاماتتار تولەم قابىلەتتىلىگىن راستاۋ ءۇشىن «قازاقستان يپوتەكالىق كومپانياسى» يۇ» اق-قا جىبەرىلەدى. كەيىننەن,تولەم قابىلەتتىلىگى بويىنشا ىرىكتەۋدەن وتكەن ادامدار پاتەرلەردى ناقتى ۇلەستىرۋ ءۇشىن اكىمدىكتەردىڭ تۇرعىن ءۇي كوميسسياسىنىڭ شەشىمىمەن بەكىتىلەدى.
ءبىز جاڭا قونىسقا كىرگەندەردىڭ ۇيلەرىنە بارىپ, پاتەر يەلەرىنىڭ قۋانىشىمەن بولىستىك. وبلىستىق ءىىد اكىمشىلىك پوليتسيا باسقارماسىنىڭ اعا ينسپەكتورى, مايور نۇربول احمەتوۆتىڭ قۋانىشىن تۇسىنۋگە بولادى. «ءۇي بولماسا كۇي بولمايدى» دەگەن راس ەكەن, جۇمىسىڭ جاقسى بولعانىمەن كوڭىل قوبالجۋلى. ەندى ءوز ءۇيىم بار, بالا-شاعانىڭ ەرتەڭى ءۇشىن الاڭدامايمىن» دەيدى.
جالعىز باستى انا, ءۇي كەزەگىندە سەگىز جىل تۇرىپ, قاشان قولى جەتەرىنە كوزى جەتپەگەننەن كەيىن يپوتەكالىق ۇيگە اۋىسقان مادينا سەرعازيەۆا «بۇرىن تەلەديداردان ءۇي الىپ جاتقانداردى تۇسىرگەن حاباردى كورىپ «نەتكەن باقىتتى جاندار» دەپ سۇيسىنەتىن ەدىم. قىزىقتىم, قىزعاندىم. سول باقىت مىنە, مەنىڭ باسىما دا كەلدى. قىزىم ەكەۋمىزدىڭ قۋانىشىمىزدا شەك جوق.
سايا سەرعازيەۆا پۋشكين اتىنداعى مەكتەپتىڭ 4-سىنىپ وقۋشىسى, ول دا گۇل-گۇل جايناپ ءجۇر.
– مەن قاتتى قۋانىپ تۇرمىن, – دەيدى ول. – ەڭ الدىمەن نۇرسۇلتان اتاما, سوسىن وسى ءۇيدى سالىپ بەرگەن «بايتەرەك» حولدينگىنە راحمەت ايتامىن. مەنىڭ قازاقستانىم ەڭ كۇشتى مەملەكەت بولادى.
ۇيسىزدىك قامىتىن موينىنان سىپىرىپ تاستاعان تۇرعىندار قۋانىشتارىن وسىلاي بىلدىرۋدە.
باقتيار تايجان,
«ەگەمەن قازاقستان».
شىمكەنت.
Cۋرەتتەردى تۇسىرگەن
حۋسان ازيزوۆ پەن
قايسار شەرىم.