دۇنيەدەگى ەڭ اۋىر جازا – ءمانسىز ماشاقات. ارەكەتىڭ الەككە اينالىپ, اجەتكە جاراماسا, الەمەت اۋرە سول. كەۋدەڭنىڭ قۇلازىعان قۇبا سۇر قۋىسىندا جوعالعان ارمان, تونالعان اڭسارىڭدى ىزدەيسىڭ. تاپپاعان سوڭ, تاعاتىڭدى تاۋىسقان بايانسىز تىرلىككە تاعى تاڭىلاسىڭ. ەجەلگى گرەك اڭىزدارىنداعى ەڭبەگى ەش, تۇزى سور ءسيزيفتىڭ تاسى سەكىلدى مىنا نارسە.
اجال قۇدايىن الداپ سوققاننان كەيىن ءسيزيفتىڭ ارقاسىندا جەر بەتى تەگىس ولىمنەن قۇتىلادى. دۇنيەنىڭ تەپە-تەڭدىگى زاڭى بۇزىلادى. قاھارلانعان وليمپ قۇدايلارى قىلمىسكەردى ەڭ اۋىر جازاعا كەسەدى. ونىڭ جازاسى مىناۋ: سيزيف ۇلكەن ءبىر تاستى شىڭ باسىنا شىعارۋى كەرەك. بىراق مەجەگە جەتكەن سايىن ادىرە قالعىر الگى تاس ەتەككە قاراي دومالاپ كەتەدى. سيزيف ونى قايىرا كوتەرەدى, تاس قايىرا ىلديعا قۇلديلاي تۇسەدى. وسىلايشا, ماڭگىلىككە تاستى يتەرۋمەن بولادى ول. ءسويتىپ, ماقساتىنا ەشقاشان جەتە المايدى.
مىنە ساعان بايانسىز تىرلىك!
كەيدە اي بويى ايىل جيماي تاپقان-تايانعانى تاماعىنا عانا جەتەتىن باۋىرلاردىڭ وسىناۋ ايانىشتى جاعدايىن كورگەندە, ءسيزيفتىڭ جاعدايى ەرىكسىز ەسكە تۇسەدى...
تاعى سول ءمانسىز ارەكەت! تۇرمىستىق تۇيتكىلدەن كوتەرىلىپ, مىنەز مىنبەسىنەن ءدۇربى سالساق تا, سول كورىنىس كوز الدىمىزعا كەلەدى.
ماقتانگەرلىك ۋاعداسىمەن ماراپاتقا ۇمتىلۋ;
كۇردەلى سويلەپ كۇدىرەيىپ, اقىلدى بولعان سىڭاي تانىتۋ;
ەشكىمگە قاجەتسىز ەڭبەك جازىپ, ەلەندىڭ دەگەن ەمەۋرىن كۇتۋ جۇيكەڭە جۇك, ساناڭا سالماق بولۋعا تاتىمايتىن كۇشەنشەك كىسىنىڭ تىرلىگى عانا. «بايانسىزعا ءبارى قۇل, جىندانباعان پەندە جوق» دەپ ءبىر-اق سوزبەن بۇكىل ويىڭدى بۇكتەي سالعان شاكارىم دە اۋليە عوي, شىركىن.
ايتپاقشى, دومالاپ كەتكەن تاسىن قايتا يتەرۋگە جوعارىدان ءتۇسىپ بارا جاتقان ءساتى بار عوي ءسيزيفتىڭ. سول ۋاقىتتا ول نە ويلادى ەكەن؟