«Kim-e» ەكى دوڭعالاقتى, ءوزىن-ءوزى تەڭەستىرەتىن ەلەكتر ارباسى ەرەكشە جاندارعا تۇرۋعا, قوزعالۋعا, تولىققاندى ءومىر سۇرۋگە كومەكتەسەدى. ادام ورنىنان تۇرعىسى كەلگەندە, قايشى تۇرىندەگى مەحانيزم ورىندىقتى ءبىر ۋاقىتتا ەڭكەيتىپ, كوتەرەدى.
ونى ليتۆالىق «Chronus Robotics» ستارتاپى قۇردى. قۇرىلعىنىڭ العاشقى باستاماسى 2020 جىلى جاريالانعان-تۇعىن. جاقىندا ونىڭ العاشقى سىناقتارى باستالدى. ونىڭ جامباس بەلدىكتەرى ۇدەرىس كەزىندە ادامنىڭ ورىندىقتان سىرعىپ كەتپەۋىن قامتاماسىز ەتەدى. ورىندىقتى كوتەرۋ مەحانيزمى مەن دوڭگەلەكتەر دەنەنىڭ جوعارعى بولىگىنىڭ قوزعالىسىمەن باسقارىلادى. سوندىقتان پايدالانۋشىنىڭ قولدارى ارقاشان بوس بولادى. «Kim-e» ءبىر زاريادتا 30 كم-گە دەيىن جۇرە الادى. جول تالعامايتىن دوڭگەلەكتەرى بار.
قابىرعا تۇرعىزدى
تسيۋريح عىلىمي زەرتتەۋ ينستيتۋتىنىڭ كومانداسى جاساعان «HEAP» روبوت-ەكسكاۆاتورى ادامنىڭ كومەگىنسىز ءارى تسەمەنتتى قولدانباي تاس قابىرعا تۇرعىزدى.
روبوت 12 توننالىق ەكسكاۆاتور نەگىزىندە جاسالعان. ونى عالىمدار ءوزىنىڭ باعدارلامالىق جاساقتاماسىمەن جابدىقتاپ, وزگەرتتى. ەرەكشە قۇرىلعى ەرىتىندىنى قولدانباي, قۇرعاق تاستان بيىكتىگى 6 مەتر, ۇزىندىعى 65 مەتر قابىرعا تۇرعىزدى. ەكسپەريمەنتتىڭ ءبىر بولىگى رەتىندە «HEAP» قۇرىلىس الاڭىن سكانەرلەپ, ونىڭ 3D كارتاسىن جاسادى. سودان كەيىن روبوت ءاربىر تاستى جەردەن كوتەرىپ, ماشينالىق كورۋ تەحنولوگياسىن قولدانىپ, ونىڭ سالماعى مەن اۋىرلىعىن باعالادى.
مارسقا كەسىرتكە بارادى
نانكين ۋنيۆەرسيتەتىنىڭ عالىمدارى جاڭا ءتورت اياقتى روبوت ويلاپ تاپتى. روبوت-كەسىرتكە بولاشاقتا مارستى زەرتتەمەك.
زەرتتەۋشىلەر مارس رەلەفىنىڭ كۇردەلى قۇرىلىمىنا بايلانىستى ادەتتەگى دوڭعالاقتار مۇلدەم كەلمەيتىنىن ايتتى. ەندى بۇل ماسەلەنى شەشۋگە ءشولدى كەسىرتكەنىڭ قوزعالۋ ءستيلىن كوشىرە الاتىن, يكەمدى دەنە قۇرىلىمى بار بيوميمەتيكالىق جورعالاۋشى روبوت كومەكتەسەدى. قىزىق قۇلتەمىر باۋىرىمەن جورعالاۋشىلارعا ءتان قيمىلدارىن قايتالاي الادى. سەبەبى ءار اياعى تەربەلمەلى قوزعالىستى تۋدىرادى. روبوتتىڭ اياقتارىندا ەكى توپسا مەن تىرناقتان تۇراتىن ءتورت يكەمدى ساۋساق بار.