اڭىز-تۇلعا لەوناردو دا ءۆينچيدىڭ ەڭ جۇمباق ءارى قۇندى تۋىندىلارىنىڭ ءبىرى – La Bella Principessa ۆارشاۆا كودەكسىنىڭ سفورتسياداسىنان الىنعان سۋرەت. قىلقالام شەبەرىنىڭ پەرگامەنتتەگى جالعىز تۋىندىسى قازاقستان جۇرتشىلىعىنىڭ نازارىنا ۇسىنىلماق.
بۇل مۇمكىندىك استاناداعى يتاليا ەلشىلىگىنىڭ, ForteBank, Mastercard, Scripta Maneant جانە يتاليا مادەنيەت ينستيتۋتىنىڭ, سونداي-اق ەلىمىزدىڭ مادەنيەت جانە اقپارات مينيسترلىگىنىڭ قولداۋىمەن جۇزەگە اسىرىلادى. كورمە استاناداعى ۇلتتىق مۋزەيدە 7 ماۋسىم مەن 4 تامىز ارالىعىندا وتەدى.
La Bella Principessa – XV عاسىردىڭ اياعىندا لەوناردو دا ۆينچي سالعان يتاليالىق اقسۇيەكتەر وتباسىنان شىققان جاس قىزدىڭ پورترەتى. يتاليا ەلشىلىگىنىڭ حابارلاۋىنشا, بۇل تۋىندى – شەبەردىڭ جۇمباق ءارى تارتىمدى تۋىندىلارىنىڭ ءبىرى. بۇعان دەيىن كارتينا الەم بويىنشا 5 رەت قانا قويىلعان.
«مادەنيەتتى ىلگەرىلەتۋ – يتاليا مەن قازاقستان اراسىنداعى ديالوگتىڭ قۋاتتى قوزعالتقىشى. لەوناردو – ماڭگىلىك تالانت پەن شىعارماشىلىق يەسى. ونىڭ ءبىر تۋىندىسىنىڭ
استاناداعى كورمەسى – ەكى ەل اراسىنداعى ىنتىماقتاستىقتى نىعايتۋدىڭ بىرەگەي مۇمكىندىگى», دەيدى يتاليانىڭ قازاقستانداعى ەلشىسى ماركو البەرتي.
«ForteBank» اق باسقارۋشى ديرەكتورى ءاليا ەسجان دا لەوناردو دا ءۆينچيدىڭ ولمەس تۋىندىسىن ءار ادام جوعارى ەموتسيامەن تاماشالايتىنىنا سەنىمدى.