ايگىلى «دجيرو د’يتاليا» كوپكۇندىگى اياقتالدى. ءۇش اپتادان اسا ۋاقىتقا سوزىلاتىن ءدۇبىرلى دودا يتاليانىڭ تۋرين پروۆينتسياسىنداعى ۆەناريا-رەالە قالاسىنان باستاۋ الىپ, ەجەلگى شاھار ريمدە ءوز مارەسىنە جەتتى. سول ارالىقتا الەمنىڭ ءار قيىرىنان جينالعان ەڭ ۇزدىك ۆەلوشاباندوزدار 3382,8 شاقىرىمدى ءجۇرىپ ءوتتى.
«دجيرو د’يتاليا» دوداسىنىڭ 115 جىلدىق تاريحى بار. اتالعان جارىستىڭ تۇساۋى سوناۋ 1909 جىلى كەسىلدى. سودان بەرى بايراقتى باسەكە 104 مارتە ۇيىمداستىرىلدى. تۇساۋكەسەر تۋرنيردە جەرگىلىكتى سپورتشى لۋيدجي گاننا توپ جاردى. ەڭ كوپ ولجاعا كەنەلگەن ۆەلوشاباندوزداردىڭ ءتىزىمىن يتاليالىق الفرەدو بيندا مەن اندجەلو فاۋستا كوپپي جانە بەلگيالىق ەدۋارد مەركس باستاپ تۇر. بۇل ساڭلاقتاردىڭ ارقايسىسى جالپى ەسەپتە بەس-بەس رەتتەن باس جۇلدەنى ولجالادى. اپەننين تۇبەگىنىڭ تارلاندارى حح عاسىردىڭ العاشقى جارتىسى مەن بەل ورتاسىندا اتوي سالسا, بەلگيانىڭ بەتكەۇستارى 60–70 جىلدارى الدىنا جان سالمادى.
قازاقستاندا نەگىزى قالانعان «استانا» ۆەلوكلۋبىنىڭ مۇشەلەرى «دجيرو د’يتاليادا» ءۇش مارتە دارالاندى. تارقاتىپ ايتساق, 2008 جىلى البەرتو كونتادور قارسىلاس شىداتپاسا, 2013 جانە 2016 جىلدارى ۆينتسەنتسو نيباليگە تەڭ كەلەر ەشكىم تابىلمادى. ودان بولەك, كەزەڭدىك سايىستاردا توپ جارعان سايىپقىراندار دا بار.
بىلتىرعى جارىستا 33 جاستاعى سلوۆەنيانىڭ ساڭلاعى پريموج روگليچ («Jumbo-Vista») جەڭىمپاز اتاندى. ەكىنشى ورىندى ۇلىبريتانيالىق گەراينت حاۋەلل توماس («Ineos Grenadiers») يەلەنسە, پورتۋگاليالىق جۋان پەدرۋ المەيدا («UAE Team Emirates») ۇزدىك ۇشتىكتى تۇيىندەدى. جالپى ەسەپتە «استانانىڭ» ارلاندارى جاقسى ناتيجە كورسەتە المادى. ءبىر قۋانتارلىعى, ەلىمىزدە جاساقتالعان كوماندا ساپىنداعى ۇلىبريتانيالىق سپرينتەر مارك كاۆەنديش ەڭ سوڭعى 21 كەزەڭدە مارە سىزىعىن ءبىرىنشى بولىپ قيىپ ءوتتى.
بيىل «دجيرو د’يتاليا» كوپكۇندىگىندە «استانانىڭ» نامىسىن الەكسەي لۋتسەنكو, سيمونە ۆەلاسكو, حەنوك مۋليۋبىرحان, كريستيان سكاروني, ۆاديم پرونسكي, لورەنتسو فورتۋناتو, داۆيدە باللەريني, ماكس كانتەر سىندى ۆەلوشاباندوزدار قورعادى. سولاردىڭ اراسىنان ۇزدىك كورسەتكىشكە فورتۋناتو قول جەتكىزدى. 28 جاستاعى يتاليالىق لەگيونەر جالپى ەسەپتە 12-ورىندى يەلەندى. وزگە سپورتشىلاردىڭ كورسەتكىشتەرى ودان دا تومەن. ال بيىلعى دودا سلوۆەنيانىڭ سايىپقىرانى تادەي پوگاچاردىڭ («UAE Team Emirates») جەڭىسىمەن اياقتالدى. جەڭىمپازدىڭ ۋاقىتى – 79:14:03. كولۋمبيالىق دانيەل فەليپە مارتينەس («BORA – hansgrohe») پەن ۇلىبريتانيالىق گەراينت توماس («INEOS Grenadiers») ەكىنشى جانە ءۇشىنشى ورىنداردى ءوزارا ءبولىستى.