دۇنيەجۇزىلىك دەنساۋلىق ساقتاۋ ۇيىمىنا مۇشە مەملەكەتتەر ۇيىمنىڭ كونستيتۋتسياسىندا قاراستىرىلعان پاندەميانىڭ الدىن الۋ, دايىندىق جانە ارەكەت ەتۋ ماسەلەلەرىن جاھاندىق بەكىتۋ تارتىبىنە كەلىستى, دەپ جازادى Egemen.kz.
COVID-19 پاندەمياسىنىڭ اسەرىن جويۋ ماقساتىندا ددۇ-نىڭ 194 مۇشە-مەملەكەتى كونۆەنتسيا ازىرلەۋگە كەلىستى. كونۆەنتسيا بولاشاق ىقتيمال پاندەميالاردىڭ الدىن الۋ مەن ساقتانۋدى كوزدەيدى. جاھاندا مۇنداي داعدارىستار قايتالانسا وراسان زور ادام شىعىنى بولىپ, ەكونوميكالىق, دەموگرافيالىق دامۋ دەڭگەيىنە جاعىمسىز اسەر ەتەتىنى انىق. جيىندا ۇسىنىلعان شارتتار بارلىق ادامنىڭ پاندەميادان قورعانۋىنا بىردەي جاعداي جاساپ, ونىڭ ىشىندە, ۆاكتسينالار, جەكە قورعانىس قۇرالدارى, اقپارات جانە ساراپتاما, دەنساۋلىق ساقتاۋ قىزمەتتەرىنە تەڭ قولجەتىمدىلىكتى قامتاماسىز ەتەدى.
بۇل كەلىسىم جەتپىس جەتىنشى دۇنيەجۇزىلىك دەنساۋلىق ساقتاۋ اسسامبلەياسىنىڭ اياسىندا قابىلداندى. ءىس-شارا 2024 جىلدىڭ 27 مامىرى مەن 1 ماۋسىمى ارالىعىندا شۆەيتساريانىڭ جەنەۆا قالاسىندا ء«بارى دەنساۋلىق ءۇشىن, دەنساۋلىق بارلىعى ءۇشىن» تاقىرىبى اياسىندا ءوتىپ جاتىر.
ء«بىزدىڭ مۇشە-مەملەكەتتەر پاندەميا تۋرالى كەلىسىمنىڭ بولاشاق ۇرپاقتاردى COVID-19 پاندەمياسى كەزىندە باستان وتكەرگەن قاسىرەتتەردەن قورعاۋ ءۇشىن قانشالىقتى ماڭىزدى ەكەنىن تولىق تۇسىنەدى. مەن ولارعا ورتاق نەگىزدى تابۋعا جانە دۇنيەجۇزىلىك دەنساۋلىق ساقتاۋ اسسامبلەياسىنىڭ وسى تاريحي كەلىسىمىن اياقتاۋعا ناقتى مىندەتتەمە بەرگەنى ءۇشىن العىس ايتامىن», دەدى دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس ادحانوم گەبرەيەسۋس.
بۇل كەلىسىمشارت ۇلتتىق جانە جاھاندىق دەڭگەيدە ادامداردىڭ دەنساۋلىعى مەن ءال-اۋقاتىنا اسەر ەتەتىن كوپتەگەن سالالاردا ودان ءارى ىنتىماقتاستىقتى قامتاماسىز ەتۋ جانە نىعايتۋ ءۇشىن جاسالىپ وتىر.
ەرلان كيىكباي,
ل.ن.گۋميلەۆ اتىنداعى ەۇۋ ستۋدەنتى